އަންހެންކުދިންނަށް ތައުލީމު ދިނުމުގައި ޠާލިބާންގެ "ފަހަތު ފަޔަށް" ބުރަވެފައިވާ ސިޔާސަތާމެދު ވަރަށް ބޮޑަށް ހިތްހަމަނުޖެހޭކަން ގަތަރުން ހާމަކޮށްފިއެވެ.
ގަތަރުގެ އިސް ޑިޕްލޮމެޓުން މި މޭރުމުން ވާހަކަފުޅު ދައްކަވާފައިވާއިރު އިސްލާމީ ޝަރީޢަތާ އެއްގޮތަށް ގައުމެއް ހިންގުމަށް ގަތަރު މިސާލަކަށް ނެގުމަށް ޠާލިބާންގެ ލީޑަރޝިޕަށް ވަނީ ގޮވާލާފައެވެ. ގަތަރުގެ ފޮރިން މިނިސްޓަރ ޝެއިޚް މުހައްމަދު ބިން އަބްދުއްރަހްމާން އަލް ޘާނީ ވަނީ ޠާލިބާނުން އަފްޣާނިސްތާނުގެ ސެކަންޑްރީއަށް ކިޔަވަމުންދާ އަންހެން ކުދިންނަށް ކިޔެވުމުގެ ފުރުސަތު ފަހިކޮށްދީފައިނުވާތީ އެކަމުގެ ކަންބޮޑުވުން ފާޅުކުރައްވާފައެވެ.
ގަތަރުގެ ފޮރިން މިނިސްޓަރ ވަނީ ބުރާސްފަތި ދުވަހު ޔޫރަޕިއަން ޔޫނިއަން (އީޔޫ)ގެ ފޮރިން ޕޮލިސީ ޗީފް ޔޫސުފް ބޮރެލް އާއެކު ދޯހާގައި ނޫސްވެރިންގެ ބައްދަލުވުމެއް ބާއްވަވާފައެވެ.
މި ނޫސްވެރިންގެ ބައްދަލުވުމުގައި މިނިސްޓަރ ވިދާޅުވީ ފާއިތުވި ދުވަސްތަކުގައި އަފްޣާނިސްތާނުގައި އެކުލަވާލާފައިވާ ޠާލިބާންގެ ސަރުކާރުން ކޮށްފައިވާ ބައެއް ކަންކަމާމެދު ހިތްހަމަނުޖެހޭކަމަށާއި އެއީ އަނެއްކާވެސް ފަހަތަށް އެޅޭ ފިޔަވަޅެއްކަމަށެވެ.
އޮގަސްޓް މަހުގެ 31 ވަނަ ދުވަހު އަފްޣާނިސްތާނުގައި ތިބި އެމެރިކާގެ ހުރިހާ ސިފައިންގެ އިތުރުން ބޭރު ގައުމުތަކުގެ ސިފައިން އަފްޣާނިސްތާނުން ފައިބާފައިވާއިރު، ދޯހާ އަކީ ޠާލިބާނުންނާއި އެގައުމުތައް ގުޅުވައިދިނުމުގައި މައިގަނޑު ރޯލު އަދާކުރަމުންދިޔަ ގައުމެވެ. އަދި އެތައް ހާސް ބަޔަކު އަފްޣާނިސްތާނުން ބޭލުމުގައި އެންމެ އިސްކޮށް އެމެރިކާ އަށް އެހީތެރިވެދީފައިވަނީ ދޯހާއިންނެވެ. މީގެއިތުރުން ޠާލިބާންގެ އައު ސަރުކާރާ އެންމެ ގާތް ގުޅުމެއް ވެސް ބާއްވަމުން އަންނަ އެއް ބަޔަކީ ވެސް ދޯހާއެވެ. ކާބުލްގައި ހުންނަ އެއަރޕޯޓް ހިންގުމުގައި ޠާލިބާނުންނަށް އެންމެ ބޮޑަށް އެހީވެދޭ ތަނަކީ ވެސް ދޯހާއެވެ.
ފޮރިން މިނިސްޓަރ ވިދާޅުވީ ޠާލިބާނުންނާއެކު މަސައްކަތްކުރަންޖެހޭކަމަށާއި އަދި އެމީހުން ކުރަމުން އަންނަ ބައެއް ކަހަލަ ކަންކަން އެގޮތަށް ނުކުރުމަށް ބާރު އަޅަންޖެހޭކަމަށެވެ. މީގެއިތުރުން މުސްލިމު ގައުމުތަކުގައި އިސްލާމީ ޝަރީޢަތް ތަންފީޒުކުރަމުން އަންނަނީ ކިހިނެއްކަމާއި އަންހެނުންގެ މައްސަލަތަކާމެދު އަމަލުކުރަމުން އަންނަނީ ކޮންގޮތަކަށްކަން ޠާލިބާނުންނަށް ބުނެދިނުމަށް ގަތަރުން މަސައްކަތްތަކެއް ކުރަމުން އަންނަކަމަށް ފޮރިން މިނިސްޓަރ ޝެއިޚް މުހައްމަދު ވިދާޅުވިއެވެ.
މިނިސްޓަރ ވިދާޅުވީ ގަތަރުގައި ވެސް ހިންގަމުންދަނީ އިސްލާމީ ޝަރީޢަތްކަމަށާއި ނަމަވެސް އެގައުމުގެ މަސައްކަތްކުރާ އާބާދީގެ އިތުރުން މަތީ ތައުލީމު ހާސިލްކުރުމުގައި ވެސް ގިނަ އަދަދަކަށް އަންހެނުން އުޅޭކަމަށެވެ.
އަފްޣާނިސްތާނުގެ ސެކެންޑްރީ ސްކޫލްތަކުގައި ކިޔަވަމުންދާ އަންހެނުން ކުދިންނަށް ސްކޫލަށް ނުދެވޭތާ ދެ ހަފްތާ ވަނީ ވެފައެވެ. އަދި މިކަމާ ގުޅިގެން އަންހެނުން އަންނަނީ މުޒާހަރާ ވެސް ކުރަމުންނެވެ.
ޝެއިޚް މުހައްމަދު ވަނީ އަފްޣާނިސްތާނުގައި ފާއިތުވި ދުވަސްތަކުގައި ހާސިލްވެފައިވާ ކުރިއެރުންތައް އެގޮތުގައި ދެމެހެއްޓުމަށް ޠާލިބާނުންނަށް ގޮވާލައްވާފައެވެ. އަދި ބައިނަލްއަގްވާމީ މުޖުތަމަޢުއާއި އެކުވެރި ދައުލަތްތަކުން އަފްޣާނިސްތާނު އެކަހެރި ނުކުރުމަށް އިލްތިމާސްކުރައްވާފައެވެ.
