އެންމެ މުހިންމީ ނޫސްވެރިކަމުގެ މިނިވަންކަން - ނަޝީދު

ދިވެހިރާއްޖެއަށް އެންމެ މުހިއްމީ ނޫސްވެރިކަމުގެ މިނިވަންކަން ކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ، މިހާރު ރައްޔިތުންގެ މަޖިލީހަށް ހުށަހަޅާފައިވާ ހެއްކާބެހޭ ބިލަށް އިޝާރާތް ކުރައްވާފައެވެ. އެބިލުގައި, ނޫސްވެރިން ލިޔާ ޚަބަރުތަކުގެ މަސްދަރު ހާމަކުރަން ޖެހޭކަމަށް ބުނާ މާއްދާއަށް އިޝާރާތްކުރައްވާ އެމަނިކުފާނު ވިދާޅުވީ، ހެއްކާ ބެހޭ ބިލުގައި އޮތް މާއްދާއާ ބެހޭގޮތުން މީޑިއާ މިނިވަންކަމާއި އިންސާނީ ހައްގުތަކާ ބެހޭ ޖަމްއިއްޔާތަކުން ކަންބޮޑުވުން ފާޅުކޮށްފައި ނުވާ ކަމަށެވެ. އަދި މަސްދަރު ހާމަ ކުރަންޖެހޭ ކަމަށް ބިލުގައި ހިމަނާފައިވަނީ އޮސްޓްރޭލިއާގެ އުސޫލަކަށް ބިނާކޮށް ކަމަށެވެ.

އެ މާއްދާ އެހެން އޮތްކަމުގައިވީ ނަމަވެސް މާއްދާ އިސްލާހު ކުރެވިދާނެ ކަމަށް އޭޖީ ދެކެވަޑައިގަންނަވާ ކަމަށެވެ. އަދި ރާއްޖެއަށް އެންމެ މުހިންމީ ނޫސްވެރިކަމުގެ މިނިވަންކަން ކަމަށެވެ.

ބިލުގެ 136ވަނަ މާއްދާގެ (ށ)ގައި ބުނެފައިވަނީ، މައްސަލައެއްގެ ޚަޞްމަކު ހުށަހަޅާ ހުށަހެޅުމެއްގެ މައްޗަށް ބިނާކޮށް، ޝަރީޢަތުން ފައިސަލާކޮށްގޮތެއް ކަނޑައަޅަންޖެހޭ ކަންކަމުގެ މައްޗަށް ރިޢާޔަތްކުރާއިރު، ނޫސްވެރިޔާއަށް މަޢުލޫމާތު ދިން މީހާއަކީ ކާކުކަން ހާމަކުރުމުގައިއޮތް ޢާންމު މަޞްލަޙަތު ބޮޑުކަމުގައިޝަރީޢަތަށް ބުރަވެވޭނަމަ، ނޫސްވެރިޔާއަށް މަޢުލޫމާތު ދިންމަސްދަރު ޝަރީޢަތަށް ހާމަކުރުމަށް ނޫސްވެރިޔާގެ މައްޗަށް ނުވަތަ އޭނާ ވަޒީފާ އަދާކުރާ ތަނުގެ މައްޗަށް މަޖުބޫރުކުރެވިދާނެ ކަމަށެވެ.

ހެއްކާ ބެހޭ ބިލުގެ ބަހުސް މިހާރު މަޖިލީހުގެ ތަޅުމުގައި ކުރިއަށްދެއެވެ. ސަރުކާރުގެ ފަރާތުން ތިނަދޫ އުތުރު ދާއިރާގެ މެމްބަރު އަބްދުލް މުޣުނީ ހުށަހެޅުއްވި މި ބިލު ގާނޫނަކަށް ވެގެން އަންނައިރު ކޯޓުުތަކާއި ޓްރައިބިއުނަލްތައް އަދި ފިޔަވަޅުއެޅުމުގެ ބާރު ލިބިގެންވާ ތަންތަނަށް ހެކީގެ ބާވަތްތައް ކަނޑައެޅުމުގައި ފަސޭހަތަކެއް ވެގެންދާނެއެވެ. އިންސާފުން ޝަރީއަތް ކޮށްދިނުމުގެ މައިގަނޑު އަސާސް ކަމުގައިވާ ހެކި ހުށަހެޅުމަށްޓަކައި ހެއްކާ ބެހޭ ގާނޫނީ އޮނިގަނޑެއްް އެކުލަވާލުމަކީ މި ބިލުގެ މަގުސަދެކެވެ.

މިހާރު ރާއްޖެއިން އަމަލު ކުރަމުން އަންނަ ހެއްކާ ބެހޭ އުސޫލުތަކާއި، މިހާރު ތަންފީޒު ކުރަމުން ދާ ގާނޫނުތައް މި ބިލާއެކު އުވިގެންދާނެއެވެ.

ބިލުގައިވާ ގޮތުން ހެކި ހުށަހެޅުމަށްޓަކައި، މައިގަނޑު ތިން ބައެއް އޮވެއެވެ. އެގޮތުން ހެކީގެ ވަސީލަތަށް ބަލައި ހެކި ބައި ކުރެވިދާނެއެވެ. ދަރަޖައަށް ބަލައި ހެކި ބައިކުރުމާއި، ހެކީގެ ގުޅުމަށް ބަލައި ހެކި ބައިކުރެވިދާނެ ގޮތުގެ ތަފްސީލް ބިލުގައި ވަނީ ހިމަނާފައެވެ.

އުމުރުން 15 އަހަރުން ދަށުގެ ކުދިންގެ ހެކިބަސް ގަބޫލް ކުރެވޭނެ އުސޫލުތަކާއި އަންހެނުންގެ ހެކިބަސް ނެގޭނެ ހާލަތާއި، ނެގޭނެ ގޮތްވެސް ބިލުގައި ހިމަނާފައިވެއެވެ. ހަމަ މިއާއެކު ހެކިވަޒަން ކުރުމުގެ އުސޫލުވެސް ވަނީ ފާހަގަކޮށްފައެވެ.

އެއްވެސް ޝައްކެއް ނެތް މިންވަރަށް ކަމެއް ސާބިތުވާ ހާލަތުގައި ހެކި ހުށަހެޅުމެއްނެތި އެކަން ސާބިތުވާނެ ކަމާއި، އެގޮތަށް ސާބިތުވާނެ ކަންކަން ތަފްސީލް ކޮށްފައި ވެއެވެ. ހެކީގެ ގޮތުގައި ހުށަނޭޅޭނެ ކަންކަންވެސް ބަޔާން ކޮށްފައިވެއެވެ.