އިޓަލީން އަފްޣާނިސްތާނުގެ ސަރުކާރު ބަލައެއްނުގަތް
27 ސެޕްޓެމްބަރު 2021 | ހޯމަ 03:40ޠާލިބާނުންގެ ސަރުކާރުގައި ޓެރަރިސްޓުން ތިބިކަމަށް ޑި މައިއޯ ވިދާޅުވި
ޠާލިބާން
އިޓަލީގެ ފޮރިން މިނިސްޓަރ ލުއިގީ ޑި މައިއޯ ވިދާޅުވީ އަފްޣާނިސްތާނުގައި އުފައްދާފައިވާ ޠާލިބާނުންގެ ސަރުކާރު ބަލައެއްނުގަނެވޭނެ ކަމަށާއި، ނަމަވެސް އަފްޣާނިސްތާނުގެ ރައްޔިތުންނަށް ޠާލިބާނުންނާ ހެދި ފްރީޒްކޮށްފައިވާ ފައިސާގެ އެހީތައް ލިބެންޖެހޭ ކަމަށެވެ.
މި ވާހަކަފުޅުގައި ލުއިގީ ވިދާޅުވީ ހުރިހާ ބޭރުގެ ގައުމުތަކުން ވެސް، އަފްޣާނިސްތާނުގެ މާލީ ހާލަތު ދަށްވިޔަ ނުދޭން މަސައްކަތް ކުރަންޖެހޭ ކަމަށެވެ. އަދި މިގޮތަށް މިކަން ނުވެއްޖެނަމަ ދެން ފެނިގެންދާނީ ބޮޑު އަދަދެއްގެ ރެފިއުޖީއިންތަކެއް ކަމަށެވެ.
ލުއިގީ އިތުރަށް ވިދާޅުވީ، ޠާލިބާނުންގެ ސަރުކާރު ބަލައިގަތުމަކީ ނުވާނެކަމެއް ކަމަށާއި، އެއީ އެ ސަރުކާރުގެ މިނިސްޓަރުންގެ ތެރޭގައި 17 ޓެރަރިސްޓަކު ހިމެނޭތީކަމަށެވެ. އަދި މި މީހުންގެ އަމަލުތަކުގެ ސަބަބުން ގިނަ އަދަދެއްގެ ކުދި ބޮޑު އަންހެނުންގެ އިންސާނީ ހައްގުތައް ދަނީ ނަގާލަމުންކަމަށެވެ. އަދި އިތުރަށް ވިދާޅުވީ ޠާލިބާނުން މެދުވެރިކޮށް ފައިސާގެ މުއާމަލާތް ނުކުރިކަމުގައިވިޔަސް އިތުރު ގޮތްގޮތުން ވެސް އަފްޣާނުގެ ރައްޔިތުންނަށް އެފައިސާ ފޯރުކޮށްދެވެން އެބައޮތް ކަމަށެވެ.
ޠާލިބާނުންވަނީ މީގެ މަސްދުވަސް ކުރިން އަފްޣާނިސްތާނުން އެމެރިކާ ސިފައިން ފޭބުމާއެކު، އެގައުމުގައި އަމިއްލަ ސަރުކާރެއް އެކުލަވާލާފައެވެ.
