އދ.ގެ އާންމު މަޖިލީހުގައި ތަޤުރީރު ކުރަން ޠާލިބާނުން ހުށަހަޅައިފި
ކުރީގެ މަންދޫބު ޣުލާމް އިސްޙާޤްޒާއީގެ ހައިސިއްޔަތެއް މިހާރު ނެތް
ޠާލިބާނުން އދ.އަށް ކަނޑައެޅުއްވި މަންދޫބު ސުހައިލް ޝާހީން
އދ.ގެ 76 ވަނަ އާންމު މަޖިލީހުގައި އަފްޣާނިސްތާނުގެ ފަރާތުން ތަޤުރީރު ކުރުމުގެ ފުރުސަތު އެގައުމުގެ މިހާރުގެ ސަރުކާރުކަމަށްވާ ޠާލިބާނުންގެ ސަރުކާރަށް ދިނުމަށް އެދި އދ.ގެ ސެކްރެޓޭރިއަޓްއަށް ހުށަހަޅައިފިއެވެ.
އދ.ގެ ސެކްރެޓަރީ ޖެނެރަލްގެ ތަރުޖަމާނު ސްޓެފަނީ ޑުޖަރިޗް ވިދާޅުވީ އދ.ގެ 76 ވަނަ އާންމު މަޖިލީހުގައި އަފްޣާނިސްތާނުގެ ފަރާތުން ތަޤުރީރު ކުރުމުގެ ފުރުސަތު ދިނުމަށް އެދި ޠާލިބާން ސަރުކާރުގެ ޚާރިޖީ ވަޒީރު އަމީރު ޚާން މުއްތަޤީ އދ.ގެ ސެކްރެޓަރީ ޖެނެރަލް އެންޓޯނިއޯ ގުތަރެޝްއަށް ސިޓީއެއް ފޮނުއްވާފައިވާ ކަމަށެވެ.
މީގެ އިތުރުން އަފްޣާނިސްތާނުން އދ.އަށް ކަނޑައަޅާފައިވާ ދާއިމީ މަންދޫބަކީ މުޙައްމަދު ސުހައިލް ޝާހީންކަމަށާއި އަފްޣާނިސްތާނުގެ ކުރީގެ ސަރުކާރުން އދ.އަށް ކަނޑައަޅާފައި ހުންނެވި ދާއިމީ މަންދޫބު ޣުލާމް އިސްޙާޤްޒާއީއަކީ އަފްޣާނިސްތާނު ތަމްސީލު ކުރުމުގެ ހައިސިއްޔަތު މިހާރު އޮތް ބޭފުޅެއް ނޫން ކަމަށް އެ ސިޓީގައި ބުނެފައިވާ ކަމަށް ޑުޖަރިޗް ވިދާޅުވިއެވެ.
ސުހައިލް ޝާހީން އަކީ ގަތަރުގައި ހުންނަ ޠާލިބާންގެ ސިޔާސީ އޮފީހުގެ ތަރުޖަމާނެއްގެ ގޮތުގައި މަސައްކަތް ކުރައްވާފައިވާ ބޭފުޅެކެވެ. އަދި އޭނާއަކީ އިނގިރޭސިބަހުން ފަސޭހައިން ވާހަކަ ދައްކަވާ ފަރާތެކެވެ.
އަފްޣާނިސްތާނުގެ ވައްޓާލި ސަރުކާރުގެ ފަރާތުން އދ.އަށް ކަނޑައަޅާފައި ހުންނެވި ސަފީރު ޣުލާމް އިސްޙާޤްޒާއީވެސް ވަނީ އދ.ގެ އާންމު މަޖިލީހުގައި ތަޤުރީރު ކުރެއްވުމުގެ ފުރުސަތު ދެއްވުން އެދި ގުތަރެޝްއަށް ސިޓީއެއް ފޮނުއްވާފައިވާކަމަށް ޑުޖަރިޗް ހާމަކުރެއްވިއެވެ.
