އަންހެން ކުދިންނަށް ސްކޫލަށް ނުދެވޭ ވާހަކަ ޠާލިބާނުން ދޮގުކުރިނަމަވެސް، ސްކޫލަށް ދެވޭނެ ދުވަހެއް ހާމައެއް ނުކުރޭ

އަފްޣާނިސްތާނުގެ ސްކޫލްތައް އަލުން ހުޅުވާލިއިރު ހަމައެކަނި ފިރިހެން ކުދިންނަށް ކިޔަވަން ދިއުމުގެ ހުޅުވާލުމުން އަންހެންކުދިން ކިޔެވުމުން މަޙުރޫމްކުރާކަމަށް ދެކެވޭ ވާހަކަތައް ޠާލިބާނުން ދޮގުކޮށްފިއެވެ.

އެކަމާ ގުޅޭގޮތުން ޠާލިބާނުން ބުނެފައިވަނީ, އަންހެންކުދިން ރައްކާތެރިކަމާއެކު ސްކޫލްތަކަށް ދެވޭނެ ދަތުރުފަތުރުގެ ނިޒާމެއް ގާއިމުކުރަން ޖެހޭކަމަށެވެ. ޠާލިބާނުން ވަނީ ގްރޭޑް 6އާ 12ގެ ހުރިހާ ފިރިހެން ކުދިންނަށާއި އެ ގްރޭޑްތަކަށް ކިޔަވައިދޭ ހުރިހާ ޓީޗަރުން ހޮނިހިރު ދުވަހުން ފެށިގެން ސްކޫލްތަކަށް ނިކުތުމަށް އަންގާފައެވެ. އެބަޔާނުގައި އަންހެންކުދިންގެ ވާހަކަ ހިމަނާފައެއްނުވެއެވެ.

އެހެންކަމުން ގިނަ ބަޔެއްގެ ފާޑުކިޔުންތައް ޠާލިބާނުންނަށް ވަނީ އަމާޒުވެފައެވެ. ވަކިން ޚާއްސަކޮށް މީގެކުރިން ޠާލިބާނުން އަފްޣާނިސްތާނުގައި ވެރިކަންކުރިއިރު އަންހެންކުދިން ތައުލީމު އުނގެނުމުން މަހުރޫމްކޮށްފައިވާތީ މިފަހަރުވެސް އެހެން އެގޮތަށް ކޮށްފާނެކަމުގެ ބިރު ވަނީ ހީވެފައެވެ.

ސީއެންއެންއާ ވާހަކަދައްކަމުން ޠާލިބާންގެ ސްޕޯކްސްމަން ޒަބީޙުﷲ މުޖާހިދު ވިދާޅުވީ, އަންހެނުންނަށް ތައުލީމު ހާސިލްކުރުމުގެ ފުރުސަތު އޮންނާނެކަމަށެވެ. ޠާލިބާނުން މިހާރު ގްރޭޑް 6ން ފެށިގެން 12އާ ދެމެދު ކިޔަވާ އަންހެންކުދިން ސްކޫލްތަކަށް ރައްކާތެރިކަމާއެކު ދެވޭނެ ގޮތެއް އިންތިޒާމުކުރަމުން ދާކަމަށް އޭނާ ވިދާޅުވިއެވެ. އަދި އަންހެންކުދިންނަށް ރައްކާތެރި މާހައުލެއް ގާއިމުކުރުމަށް އަމަލުކުރަންޖެހޭ ވަކި ގަވާއިދުތަކެއް ހުންނާނެކަމަށް އޭނާ ވިދާޅުވިއެވެ.

އެހެން އުމުރުފުރާތަކުގެ އަންހެނުންނަށް ކިޔެވުމުގެ ފުރުސަތު ހުޅުވާލާފައިވާކަން ފާހަގަކުރައްވާ ޒަބީޙުﷲ ވިދާޅުވީ, އަމިއްލަ އަދި ސަރުކާރުގެ ޔުނިވަރސިޓީތަކުގައި އަންހެނުންނަށް މިހާރުވެސް ކިޔެވޭނެކަމަށެވެ.

އަންހެންކުދިންނަށް ސްކޫލްތަކަށް ދިޔުމުގެ ފުރުސަތު ބަންދުވުމާއެކު ޔުނިސެފުންވެސް ވަނީ އެކަމުގެ ކަންބޮޑުވުން ފާޅުކޮށްފައެވެ. އަދި ވީއެންމެ އަވަހަކަށް އަންހެން ކުދިންނަށް ކިޔެވުމުގެ ފުރުސަތު ފަހިކޮށްދިނުމަށް ވަނީ ގޮވާލާފައެވެ.