އަފްޣާނިސްތާނުގެ ސްކޫލްތައް ފިރިހެންކުދިންނަށް ހުޅުވާލައިފި، އަންހެންކުދިންނަށް ހުޅުވާނެ ދުވަސް ހާމައެއް ނުކުރޭ
18 ސެޕްޓެމްބަރު 2021 | ހޮނިހިރު 03:00ސަރުކާރާއި އަމިއްލަ ސްކޫލްތަކުގެ ތެރެއިން ޕްރައިމަރީ އަދި ސެކަންޑްރީއަށް ކިޔަވައިދޭ ސްކޫލްތައް ހޮނިހިރު ދުވަހުން ފެށިގެން ހުޅުވާނެ
އަފްޣާނިސްތާންގެ އަންހެނުންތަކެއް
އަފްޣާނިސްތާނުގެ ސްކޫލްތައް ހޮނިހިރުން ދުވަހުން ފެށިގެން ފިރިހެން ކުދިންނަށް ހުޅުވާލާނެކަމަށް އެގައުމުގައި އަލަށް އެކުލަވާލާފައިވާ ތާލިބާން ސަރުކާރުގެ އެޑިޔުކޭޝަން މިނިސްޓްރީން ބުނެފިއެވެ.
އެޑިޔުކޭޝަން މިނިސްޓްރީން ނެރެފައިވާ ބަޔާނެއްގައި ފިރިހެން ކުދިންނަށް ސްކޫލްތައް އަލުން ހުޅުވާލިނަމަވެސް އަންހެން ކުދިންނަށް ސްކޫލްތައް ހުޅުވާލާނެ ތާރީޚެއް ހާމަކޮށްފައެއްނުވެއެވެ. އަފްޣާނިސްތާނުގެ ކޮންޓްރޯލް ތާލިބާނުން ހޯދިތާ މަސް ދުވަސްވެފައިވާއިރު ވެރިރަށް ކާބުލްގެ ތައުލީމު ދޭ ގިނަ ތަންތަން ހުރީ ބަންދުކޮށްފައެވެ. އެއީ އަލުން އާންމު ހާލަތަށް ރުޖޫއަވުމަށާއި އެގައުމުގެ އިގްތިސާދު ހަމައަކަށް އެޅުވުމަށް ތާލިބާނުންނަށް ވަގުތު ބޭނުންވާތީއެވެ.
އަފްޣާނިސްތާނުގެ ބައެއް ސަރަހައްދުތަކުގައި ހުރި ސްކޫލްތައް ގްރޭޑް ހަޔަކާ ހަމައަށް އަންހެން ކުދިންނަށް އަންނަނީ ކިޔަވައިދެމުންނެވެ. އަދި ބައެއް އަންހެނުން ޔުނިވަރސިޓީއަށްވެސް ދެއެވެ. ނަމަވެސް މަތީ ގްރޭޑްތަކުގައި ކިޔަވާ އަންހެންކުދިންނަށް ސްކޫލްތައް ވަނީ ބަންދުކޮށްފައެވެ.
ތާލިބާންގެ އައު ސަރުކާރެއް އެކުލަވާލާފައިވާއިރު ތާލިބާނުން ބުނަމުން އަންނަނީ ކުރިން އަފްޣާނިސްތާނުގައި ވެރިކަން ކުރިއިރު ގެންގުޅުނު ސިޔާސަތުތައް މިފަހަރު ނުގެންގުޅޭނެކަމަށެވެ. އެގޮތުން ކުރިން އަންހެންކުދިންނަށް ތައުލީމު ހާސިލްކުރުމުގެ ފުރުސަތު ބަންދުކޮށްފައި އޮތްނަމަވެސް މިފަހަރު އަންހެންކުދިންނަށް ތައުލީމު ހާސިލްކުރުމުގެ ފުރުސަތު ދޭނެކަމަށް އަންނަނީ ބުނަމުންނެވެ. ނަމަވެސް ކުލާސްތަކުގައި ތިބެންޖެހޭނީ ފިރިހެންކުދިންނާ ވަކިންކަމަށް ވަނީ ބުނެފައެވެ.
ބައެއް ރިޕޯޓްތައް ބުނާގޮތުގައި އަންހެނުން މަސައްކަތް ކުރުމަށް ތާލިބާނުން އަންނަނީ ހުރަސް އަޅަމުންނެވެ. އަދި އަންހެނުންނަށް ތައުލީމާއި ވަޒީފާގެ ފުރުސަތު ފަހިކޮށްދިނުމަށް އެދި އަފްޣާނިސްތާނުގައި އަންހެނުން މުޒާހަރާވެސް ކޮށްފައިވެއެވެ.
ތާލިބާނުން އަފްޣާނިސްތާނުގެ ކޮންޓްރޯލް ހޯދުމަށްފަހު ސްކޫލްތައް ބަންދުކުރަން އަންގާފައެއްނުވެއެވެ. ނަމަވެސް ސަލާމަތީ ސަބަބުތަކަށްޓަކައި އަންހެނުންނަށް އޭގެކުރިން ކުރުމުގެ ހުއްދައޮތް ކަންކަން ކުރިޔަށް އޮތްތަނުގައި ނުކުރެވޭނެކަމަށް ބުނެއެވެ. އެއަށްފަހު ނެރުނު މިބަޔާނުގައި އަންހެން ކުދިންގެ ވާހަކަ އެއްވެސް ވަރަކަށް ހިމަނާފައިނުވެއެވެ.
ބަޔާނުގައި ބުނެފައިވަނީ ސަރުކާރާއި އަމިއްލަ ސްކޫލްތަކުގެ ތެރެއިން ޕްރައިމަރީ އަދި ސެކަންޑްރީ އަށް ކިޔަވައިދޭ ސްކޫލްތަކުގެ އިތުރުން ރަސްމީކޮށް ދީނީ ތައުލީމު ދެމުންގެންދާ ސްކޫލްތައް ހޮނިހިރު ދުވަހުން ފެށިގެން ހުޅުވާނެކަމަށެވެ. އަދި ހުރިހާ ޓީޗަރުންނާއި ފިރިހެން ކުދިން ކިޔެވެމަށް ސްކޫލަށް ހާޒިރުވާންޖެހޭނެކަމަށް ބަޔާނުގައި ބުނެފައިވެއެވެ.
އަނެއްކޮޅުން ތާލިބާނުން ވަނީ ހުކުރު ދުވަހު ސަރުކާރުގެ އަންހެނުންނާ ބެހޭ ވުޒާރާ ބަންދުކޮށް ޑިޕާޓްމަންޓަކަށް ބަދަލުކޮށްފައެވެ. މިއީ ދީނީ ކަންކަން ތަންފީޒުކުރުމަށް އުފައްދާފައިވާ ޑިޕާޓްމަންޓެކެވެ.
މިބަދަލާއެކު އެމިނިސްޓްރީގައި މަސައްކަތްކުރާ ގިނަ އަދަދެއްގެ މުވައްޒަފުން އެއިދާރާގެ ބޭރުގައި ތިބެގެން މުޒާހަރާކުރަމުން ދާތަނުގެ ވީޑިއޯތައް އަންނަނީ ޓްވިޓަރ ގައި ދައުރުވަމުންނެވެ. މިދިޔަ ހަފްތާގެ ކުރީކޮޅު އަފްޣާނިސްތާނުގެ ގައުމީ ފުޓް ބޯޅަ ޓީމުވެސް ޕާކިސްތާނު ބޯޑަރު ހުރަސްކޮށް ވަނީ ފިލާފައެވެ.
ޕާކިސްތާނުގެ އިންފޮރމޭޝަން މިނިސްޓަރ ވިދާޅުވެފައިވަނީ ކުޅުންތެރިންއަތުގައި ދަތުރުކުރުމުގެ ހުއްދަ އޮތް ކަމަށެވެ.
