ވެމްކޯއަށް ފައިސާ ދައްކަން ބޭނުންވާ ބަޖެޓް ދޭން ބުނެފިންް: މުއިއްޒު

މާލެ ސިޓީ ކައުންސިލުން ވެމްކޯއަށް ދައްކަންޖެހޭ 30 މިލިއަން ރުފިޔާ ދައްކަން ބޭނުންވާ ބަޖެޓަށް އެދިފައިވާނެ ކަމަށް މާލޭގެ މޭޔަރ ޑރ. މުހައްމަދު މުއިއްޒު ވިދާޅުވެއްޖެއެވެ.

ވެމްކޯއިން އެންމެ ފަހުން ބޭއްވި ނޫސްވެރިންގެ ބައްދަލުވުމުގައި ވެމްކޯގެ މެނޭޖިން ޑިރެކްޓަރ އާދަމް މުހައްމަދު ވަނީ މާލެ ސިޓީ ކައުންސިލުން ވެމްކޯއަށް ދައްކަންޖެހޭ ފައިސާއެއްގެ ވާހަކަ ފާހަގަކުރައްވާފައެވެ. 30 މިލިއަނަށްވުރެ ގިނަ ރުފިޔާ ސިޓީ ކައުންސިލުން ވެމްކޯއަށް ދައްކަންޖެހޭ ކަމަށް އާދަމް ވިދާޅުވިއެވެ.

މިކަމާއި ގުޅިގެން މޭޔަރ ޑރ. މުއިއްޒު ވިދާޅުވީ ސިޓީ ކައުންސިލުން ވެމްކޯއަށް ދައްކަންޖެހިފައިވާ 30 މިލިއަން ރުފިޔާއަކީ ސިޓީ ކައުންސިލްގެ މި ދައުރާ ހަވާލުވެވަޑައިގެންނެވި އިރުވެސް ދައްކަންޖެހިފައިވާ ފައިސާއެއް ކަމަށެވެ. މި ފައިސާ ދައްކަން ބޭނުންވާ ބަޖެޓަށް މިހާރު ވާނީ އެދިފައި ކަމަށް މޭޔަރު ވިދާޅުވިއެވެ. އަދި ބަޖެޓު ހަމަޖެހުނުހާ އަވަހަކަށް އެ ފައިސާ ދައްކާނެ ކަމަށް ކައުންސިލުން ވަނީ ބުނެފައެވެ.

ވެމްކޯއިން ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގައި ވެމްކޯގެ ޗީފް ފައިނޭންޝިއަލް އޮފިސަރު ވިދާޅުވީ ފައިސާގެ ކަންކަމުގައި ދެ ފަރާތުގެ ދެމެދުގައި އަބަދުވެސް މުއާމަލާތުު ކުރެވޭކަމަށެވެ. އަދި ނުދެއްކި ހުރި ފައިސާ ދައްކަން ހަނދާން ކޮށްދޭން ސިޓީ ވެސް ފޮނުވާކަމަށް ވިދާޅުވިއެވެ.