ޠާލިބާންގެ ޑެޕިޔުޓީ ލީޑަރ އަބްދުލްޣަނީ ބަރާދަރު އަވަހާރަވެފައިވާކަމަށް ދެކެވޭ ވާހަކަތައް އޭނާ ދޮގުކުރައްވައިފި
17 ސެޕްޓެމްބަރު 2021 | ހުކުރު 02:57ހުންނެވީ ހެޔޮ ހާލުގައިކަމަށް ވަނީ ވިދާޅުވެފައި
ޠާލިބާންގެ ޑެޕިޔުޓީ ލީޑާރ އަދި އަފްޣާނިސްތާނުގައި ތާލިބާނުން އެކުލަވާލާފައިވާ އައު ސަރުކާރުގެ ޑެޕިޔުޓީ ޕްރައިމް މިނިސްޓަރ އަބްދުލްޣަނީ ބަރާދަރު
ޠާލިބާންގެ ޑެޕިޔުޓީ ލީޑަރ އަދި އަފްޣާނިސްތާނުގައި ޠާލިބާނުން އެކުލަވާލާފައިވާ އައު ސަރުކާރުގެ ޑެޕިޔުޓީ ޕްރައިމް މިނިސްޓަރ އަބްދުލްޣަނީ ބަރާދަރު އަވަހާރަވެފައިވާކަމަށް ދެކެވޭ ވާހަކަތައް އޭނާ ދޮގުކުރައްވައިފިއެވެ.
އަފްޣާނިސްތާނުގެ ބާރު ޠާލިބާނުން ހޯދިތާ ގާތްގަނޑަކަށް މަސްދުވަސްވެފައިވާއިރު ޠާލިބާނުންގެ ތެރޭގައި ބައިބައިވުންތައް އުފެދިފައިވާކަމުގެ އަޑުތައް ވަނީ ގަދަވެފައެވެ. އަދި އައު ސަރުކާރު އެކުލަވާލުމަށްފަހު މިހާތަނަށްވެސް ބަރާދަރު ފެނިފައިނުވާތީ އޭނާ އަވަހާރަވީކަމުގެ އަޑުތައް އަންނަނީ ފެތުރެމުންނެވެ. އެވާހަކަތައް ދޮގުކުރައްވައި އަފްޣާނިސްތާނުގެ ނޭޝަނަލް ބްރޯޑްކާސްޓަރަށް ދެއްވި އިންޓަވިއުއެއްގައި ވިދާޅުވީ އޭނާ ކާބުލްއިން ދަތުރުކުރައްވަނި ކަމަށެވެ. އަދި ހުންނެވީ ހެޔޮ ހާލުގައިކަމަށް ވަނީ ވިދާޅުވެފައެވެ.
މީގެއިތުރުން ޠާލިބާނުންގެ ތެރޭގައި ބައިބައިވުން އުފެދިފައިވާކަމަށް ބުނެ މީޑިޔާގައި ފަތުރަމުން އަންނަނީ ދޮގު ޚަބަރެއްކަމަށް ވެސް ބަރާދަރު ވަނީ ވިދާޅުވެފައެވެ. ޠާލިބާނުންނަކީ ބޮޑު އާއިލާއެއްކަމަށާއި ތާލިބާނުންގެ ތެރޭގައި ބައިބައިވުން އޮތް ކަަމަށް ބުނެ ދައްކަމުންދާ ވާހަކަތަކަށް ކަންބޮޑުނުވުމަށް ބިރާދަރު ވަނީ އެދިވަޑައިގެންފައެވެ. ކަންބޮޑުވާންޖެހޭ އެއްވެސް މައްސަލައެއްނެތް ކަމުގެ ޔަގީންކަން އަފްޣާނިސްތާނުގެ ރައްޔިތުންނަށާއި، މުޖާހިދުންނަށް އަދި ޒުވާނުންނާއި މުސްކުޅިންނަށް އަރުވާކަމަށް ބަރާދަރު ވިދާޅުވިއެވެ.
ޠާލިބާނުން ވަނީ ބަރާދަރު ކަންދަހާރުގައި ކުރިޔަށްގެންދެވި ބައްދަލުވުމެއްގެ ވީޑިއޯއެއް ވެސް އާންމުކޮށްފައެވެ. ބަރާދަރަކީ ޠާލިބާނުންނާއި އެމެރިކާ އާ ދެމެދު ކުރިޔަށްގެންދިޔަ ސުލްހައިގެ ވާހަކަތަކުގައި އެންމެ އިސްކޮށް ހަރަކާތްތެރިވި މީހާއެވެ.
ފާއިތުވި ދުވަސްތަކުގައި ފެތުރިފައިވާ ޚަބަރުތަކަށް ބަލާލާއިރު ބިރާދަރުގެ ސަޕޯޓަރުންނާއި ސިރާޖުއްދީން ހައްޤާނީގެ ސަޕޯޓަރުންނާ ދެމެދު ވަނީ ހަމަނުޖެހުންތަކެއް ހިނގާފައެވެ. ސިރާޖުއްދީން ހައްޤާނީ އަކީ ހައްޤާނީ ނެޓްވޯރކްގެ އެންމެ އިސްމީހާއެވެ. އަދި އަލަށް އެކުލަވާލާފައިވާ ސަރުކާރުގެ އިންޓީރިއަރ މިނިސްޓަރު ވެސް މެއެވެ.
ހައްޤާނީ ނެޓްވޯރކަކީ ޕާކިސްތާން ބޯޑަރު ސަރަހައްދުގައި ހަރަކާތްތެރިވާ ހަނގުރާމަވެރި ޖަމާއަތެކެވެ. އަދި އެންމެ ނުރައްކާތެރި ޖާނުންފިދާވުމުގެ ހަމަލާތައް ދީފައިވަނީ މި ޖަމާއަތުންކަމަށް ވެސް ބެލެވެއެވެ.
ޠާލިބާނުންގެ އެތެރޭގައި މައްސަލަތަކެއް އުޅޭކަމަށް ދެކެވޭ ވާހަކަތައް ޠާލިބާނުން އަންނަނީ ތަކުރާރުކޮށް ދޮގުކުރަމުންނެވެ.
ބަރާދަރަކީ ތާލިބާނުން އަފްޣާނިސްތާނުގައި އެކުލަވާލާ އައު ސަރުކާރުގެ އެންމެ އިސްމީހާ ކަމަށް ކުރިން ވަނީ ބެލެވިފައެވެ. ނަމަވެސް އައު ސަރުކާރު އެކުލަވާލިއިރު ބަރާދަރަކީ އެ ސަރުކާރުގެ ދެވަނަ އަށް އެންމެ އިސްމީހައެވެ. އަދި އައު ސަރުކާރު އެކުލަވާލިފަހުން ބަރާދަރު އާންމުންގެ ތެރެއިން ވެސް ފެނިފައެއްނުވެއެވެ. މީގެއިތުރުން ގަތަރުގެ ފޮރިން މިނިސްޓަރާ ބައްދަލުކުރި އަފްޣާނިސްތާނު ސަރުކާރުގެ ވަފުދުގައި ވެސް ބަރާދަރު ހިމެނިފައެއް ނުވެއެވެ.
މީގެއިތުރުން ޠާލިބާނުންގެ ސުޕްރީމް ލީޑަރ ނުވަތަ ރޫހީ ލީޑަރު ހިބަތުﷲ އަޚުންޒާދާ ވެސް އޮގަސްޓް މަހުގެ 15 ވަނަ ދުވަހުގެ ފަހުން އާންމުންގެ ތެރެއިން ފެނިފައެއްނުވެއެވެ.
