ޕްރޮސެކިއުޓަރ ޖެނެރަލް ހުސައިން ޝަމީމަށް އެއްވެސް އިތުބާރެއް ނެތް ކަމަށް އިދިކޮޅު ކޯލިޝަންގެ އެކްޓިންގ ލީޑަރ އަބްރުއްރަހީމް އަބްދުﷲ ވިދާޅުވެއްޖެއެވެ.
ކޯޓުތަކުގައި ހިނގަމުންދާ، ކުރީގެ ރައީސް ޔާމީންގެ ޝަރީއަތާ ގުޅިގެން ހުރި ކަންބޮޑުވުންތައް ހިއްސާކުރުމަށް ބުރާސްފަަތި ދުވަހު ޕީޖީއާ ބައްދަލުކުރެއްވުމަށްފަހު ނޫސްވެރިންނާ ވާހަކަދައްކަވަމުން އަދުރޭ ވިދާޅުވީ، ޕީޖީއަށް އިތުބާރެއް ނެތްކަމަށާއި، ސަބަބަކީ މިހާތަނަށް ކަންތައްތައް ހިނގާފައިވާ ގޮތުން ކަމަށެވެ. ދައުލަތުގެ ފަރާތުން ރައީސް ޔާމީނާ ދެކޮޅަށް ހުށަހަޅާފައިވާ ހެކިތަކަކީ، ހުށަހަޅައިގެންވާނެ ހެކިތަކެއް ކަމަށް ގަބޫލު ނުކުރެއްވޭ ކަމަށް ވިދާޅުވިއެވެ. ރައީސް ޔާމީނާ ދެކޮޅަށް ހުށަހަޅާ ހެކިތަކުގެ ތެރޭގައި ހިމެނޭ، ކުރީގެ ނައިބު ރައީސް އަހުމަދު އަދީބާއި، އެމްއެމްޕީއާރްސީގެ ކުރީގެ އެމްޑީ އަބްދުﷲ ޒިޔަތުގެ ހެކި ބަހަކީ ހުށަހަޅައިގެންވާނެ ހެކިތަކެއް ކަމަށް ގަބޫލު ނުކުރެއްވޭ ކަމަށް އަދުރޭ ވިދާޅުވިއެވެ. އެހެންކަމުން އެއްވެސް ވަރަކަށް ޕީޖީއަށް އިތުބާރު ނެތްކަމަށް ވިދާޅުވިއެވެ.
އަދުރޭ ވިދާޅުވީ، ދައުލަތުގެ ޕީޖީގެ މަގާމުގައި ހުންނަވާ ބޭފުޅަކާ ބައްދަލު ކުރެއްވުމަކީ ކުރަން ޖެހޭ ކަމަކަށްވާތީ ބައްދަލު ކުރެއްވީ ކަމަށެވެ. އަދި މިފަދަ ކަންބޮޑުވުންތަކާއެކު ބައްދަލު ކުރެއްވޭނީ ވެސް އެމަގާމުގައި ހުންނަވާ ބޭފުޅަކާ ކަމަށެވެ.
ޕީޖީއާ ބައްދަލު ކުރުމުގައި އެއްވެސް ދައްޗެއް ނެތް ކަމަށާއި، އެދިވަޑައިގެންނެވި ކޮންމެ ފަހަރަކު ވެސް ބައްދަލު ކުރެއްވުނު ކަން އަދުރޭ ފާހަގަކުރެއްވިއެވެ. ޕީޖީއާ ހަމައިން މަސައްކަތްތައް ހުއްޓާ ނުލައްވާ ކަމަށާއި، މި ކަންބޮޑުވުންތަކާއެކު އެހެން މުއައްސަސާތަކާ ވެސް ބައްދަލު ކުރައްވާނެ ކަމަށެވެ. އެގޮތުން ޕޮލިސް ކޮމިޝަނަރއާ ބައްދަލު ކުރެއްވުމަށް ވެސް މިހާރު އެދިވަޑައިގެންފާ ކަަމަށް ވިދާޅުވިއެވެ.
ޕީޖީއާއެކު ކުރިއަށްގެންދިޔަ މި ބައްދަލު ކުރެއްވުމުގައި އިދިކޮޅު ކޯލިޝަނުންވަނީ، ފަނޑިޔާރުންގެ އޯޑިއޯ ކަމަށްބުނެ ލީކުވެފައިވާ އޯޑިއޯތައް ރަނގަޅު ތަހުގީގެއް ހިންގުމަށް ޕީޖީ އަރިހުގައި އެދިފައެވެ. އޯޑިއޯތަކުގެ ފޮރެންސިކް ތަހުގީގެއް ހިންގުމަށް ވެސް ޕީޖީ އަރިހުގައި އެދުނު ކަމަށް ކޯލިޝަނުން ބުނެއެވެ.
