ގެތައް ހުސްކުރުމަށް އެންގުމާއެކު ޠާލިބާނުންނާ ދެކޮޅަށް އިޙުތިޖާޖުކޮށްފި

އަފްޣާނިސްތާނުގެ އަސްކަރިއްޔާއަށް ޚިދުމަތްކުރި ގިނަ އަދަދެއްގެ މީހުންގެ އާއިލާ ދިރިއުޅޭ ޒަރާ ފެގްރާ ހިސާބުގަނޑުގެ ގެތައް ހުސްކުރުމަށް ޠާލިބާނުން އެންގުމާއެކު އެ ހިސާބުގަނޑުގައި ދިރިއުޅޭ އެތައް ސަތޭކަ ބަޔަކު އިޙުތިޖާޖު ކޮށްފިއެވެ.

ޒަރާ ފެގްރާ ހިސާބުގަނޑަކީ ފާއިތުވެދިޔަ 20 އަހަރުގެ ތެރޭގައި ޠާލިބާނުންނާ ދެކޮޅަށް ކުރި ހަނގުރާމައިގައި މަރުވެފައިވާ ސިފައިންގެ މީހުންގެ އަނބި ދަރީން ދިރިއުޅެމުން ގެންނާ ހިސާބެކެވެ. އެ ހިސާބުގައި ގާތްގަނޑަކަށް 10،000 މީހުން ދިރިއުޅެމުން ދެއެވެ.

ރިޕޯޓްތައް ބުނާ ގޮތުން އެ ހިސާބުގައި ދިރިއުޅޭ މީހުން ގެތަކުން ނެރުމަށްފަހު އެ ތަންތަން ދިނުމަށް ހަމަޖެހިފައިވަނީ ޠާލިބާން ހަނގުރާމަވެރިންނަށެވެ.

މި ނިންމުމާ ދެކޮޅަށް ކުރި އިޙުތިޖާޖުގައި ފިރިހެނުންނާއި، އަންހެނުންގެ އިތުރުން ކުޑަކުދިންވެސް ވަނީ ބައިވެރިވެފައެވެ. ނަމަވެސް މިދިޔަ މަހު ވެރިކަމަށް އައި ޠާލިބާނުން ވަނީ އެގައުމުގައި މުޒާހަރާ ކުރުން މަނާކޮށްފައެވެ.

ރިޕޯޓްތައް ބުނާ ގޮތުން ޠާލިބާނުގެ ހަނގުރާމަވެރިން ވަނީ އިޙުތިޖާޖުގައި ބައިވެރިވި މީހުންނަށް ފުރައްސާރަކޮށް އަނިޔާކޮށްފައެވެ.