ފަހު މެޗުންވެސް ޒުވާން ގައުމީ ޓީމަށް މޮޅެއް

ޅ. އަތޮޅުގައި ކުރިއަށްގެންދިޔަ ކޭމްޕުގައި ކުޅުނު ފަހު މެޗުންވެސް 23 އަހަރުން ދަށުގެ ގައުމީ ޓީމު މޮޅުވެއްޖެއެވެ.

މި ކޭމްޕުގައި ޒުވާން ގައުމީ ޓީމުން ހަ މެޗެއް ކުޅުނުއިރު، ފަހު މެޗުގައި ނުކުތީ ޅ. ކުރެންދޫއާ ދެކޮޅަށެވެ. އެ ރަށުގައި ކުޅުނު މި މެޗުން ޒުވާން ގައުމީ ޓީމު މޮޅުވީ ފަސޭހަކަމާއެކު 5-0 ގެ ނަތީޖާއަކުންނެވެ.

ހޮނިހިރު ދުވަހުގެ ހަވީރު ކުރެންދޫ ޓާފް ދަނޑުގައި ކުޅުނު މެޗުގައި ޒުވާން ގައުމީ ޓީމުގެ ލަނޑުތައް ޖަހައިދިނީ އަބްދުﷲ ޔާމީން (ޔާން) އާއި، ނޫހް ތައުމީނާއި، މުޙައްމަދު ޖައިލަމް (އޮގީ) އާއި، ޒަޔާން ނަސީރު އަދި މި މެޗުގައި ކެޕްޓަން ބޭންޑް އަޅައިގެން ކުޅުނު އަލީ ޝަމާލެވެ.

ޅ. އަތޮޅުގައި ކުރިއަށްގެންދިޔަ ކޭމްޕް ނިންމާލުމަށްފަހު އާދީއްތަ ދުވަހު ޒުވާން ގައުމީ ޓީމު އެނބުރި މާލެ އަންނައިރު، މި ކޭމްޕުގައި އެ ޓީމުން ވަނީ ނައިފަރާއި ހިންނަވަރުގައި މެޗުތަކެއް ކުޅެފައެވެ. އެގޮތުން ނައިފަރުގައި ކުޅުނު ފުރަތަމަ މެޗުގައި އެ ރަށާ ބައްދަލުކޮށް 1-1 ގެ ނަތީޖާއަކުން އެއްވަރުވިއިރު، ދެވަނަ މެޗުގައި ވަނީ ނ. ހޮޅުދޫއާވެސް 1-1 ގެ ނަތީޖާއަކުން އެއްވަރުވެއްފައެވެ. އެކަމަކު ތިންވަނަ މެޗުން ވަނީ ނ. ކުޑަފަރި އަތުން 8-3 ގެ ނަތީޖާއަކުން މޮޅުވެފައެވެ. ދެން ހިންނަވަރުގައި ކުޅުނު ފުރަތަމަ މެޗުގައި ރ. މީދޫ އަތުން ފަސޭހަކަމާއެކު 7-0 ގެ ނަތީޖާއަކުން ޒުވާން ގައުމީ ޓީމު މޮޅުވިއިރު، ދެވަނަ މެޗުން ވަނީ ހިންނަވަރު އަތުން 4-0 ނަތީޖާއަކުން މޮޅުވެފައެވެ.

ޒުވާން ގައުމީ ޓީމުގެ ކޯޗުގެ މަގާމު ރަސްމީކޮށް އަލީ ސުޒޭނާ ހަވާލުކޮށްފައިވީ ނަމަވެސް، އޭގެ ފަހުން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ ސީނިއާ ގައުމީ ޓީމުގެ ޒިންމާވެސް ސުޒޭނާ ހަވާލުކޮށްފައެވެ. އެހެންކަމުން މި ކޭމްޕުގައި ސުޒޭން ބައިވެރިވެފައި ނުވާއިރު، ޒުވާން ގައުމީ ޓީމުގެ ކަންކަން މިހާރު ބަލަހައްޓަމުން އަންނަނީ އެސިސްޓަންޓް ކޯޗުން ކަމަށްވާ ޒުވާން ކޯޗު ސޮބާހު މުޙައްމަދު އިބްރާހީމް (ސޮބާ) އާއި މުޙައްމަދު ޝާހިދު (ޝާޑު) އެވެ.

އޭޝިއަން ކަޕުގެ ކޮލިފައިންގައި ޒުވާން ގައުމީ ޓީމު ވާދަކުރާއިރު، އެ މުބާރާތުގެ ކޮލިފައިން މެޗުތައް މި އަހަރުގެ އޮކްޓޯބަރު މަހުގެ 27 ވަނަ ދުވަހުން ފެށިގެން 31 ވަނަ ދުވަހުގެ ނިޔަލަށް ކުޅުމަށް ވަނީ ތާވަލުކޮށްފައެވެ. ރާއްޖެ ހިމެނޭ ގްރޫޕް ސީގެ މެޗުތައް ބަހްރޭނުގައި ކުޅޭއިރު، ކޮލިފައިންގައި ރާއްޖެ ހިމެނޭ ގްރޫޕުގައި ދެން އޮތީ ބަހްރޭނުގެ އިތުރުން އިރާގާއި އަފްޣާނިސްތާނެވެ.

ކޮލިފައިންގެ ކުރިން ބަހްރޭނުގައިވެސް 10 ވަރަކަށް ދުވަހު ޒުވާން ގައުމީ ޓީމު ކޭމްޕުކުރާ ގޮތަށް ވަނީ ހަމަޖެހިފައެވެ. މި ފަހަރުގެ ކޮލިފައިންގެ ފުރަތަމަ މެޗުގައި އޮކްޓޯބަރު މަހުގެ 27 ވަނަ ދުވަހު ރާއްޖެ ނުކުންނާނީ އިރާގާ ދެކޮޅަށެވެ. ކޮލިފައިންގެ ދެވަނަ މެޗުގައި އެ މަހުގެ 29 ވަނަ ދުވަހު ބަހްރޭނާ ދެކޮޅަށް ރާއްޖެ ނުކުންނައިރު، ފަހު މެޗުގައި 31 ވަނަ ދުވަހު ނުކުންނާނީ އަފްޣާނިސްތާނާ ދެކޮޅަށެވެ.

ކޮލިފައިންގައި 11 ގްރޫޕް ހިމެނޭއިރު، ކޮންމެ ގްރޫޕެއްގެ އެއްވަނައަށްދާ ގައުމަށް އޭއެފްސީ އޭޝިއަން ކަޕުން ފުރުސަތު ލިބޭނެއެވެ. އަދި އެ 11 ގްރޫޕުން ދެވަނައަށްދާ ގައުމުތަކުގެ ތެރެއިން އެންމެ ރަނގަޅު ނަތީޖާ ނެރޭ ހަތަރު ގައުމަކަށްވެސް މުބާރާތުން ފުރުސަތު ލިބޭނެއެވެ.