ޅ. އަތޮޅުގައި ކުރިއަށްގެންދާ ކޭމްޕުގައި 23 އަހަރުން ދަށުގެ ގައުމީ ޓީމުން ކުޅުނު ފަސްވަނަ މެޗުން އެ އަތޮޅު ހިންނަވަރު އަތުން ފަސޭހަކަމާއެކު މޮޅުވެއްޖެއެވެ.

ހިންނަވަރު ޓާފް ދަނޑުގައި ކުޅުނު މި މެޗުން ޒުވާން ގައުމީ ޓީމު މޮޅުވީ 4-0 ނަތީޖާއަކުންނެވެ.

ހުކުރު ދުވަހުގެ ހަވީރު ކުޅުނު މި މެޗުގައި ގައުމީ ޓީމުން ކާމިޔާބުކުރި ލަނޑުތައް ޖަހައިދިނީ މުޙައްމަދު ސަޔާމް ސައީދާއި، ކެޕްޓަން ބޭންޑް އަޅައިގެން ކުޅުނު މުޙައްމަދު ޖައިލަމް (އޮގީ) އާއި، އިސްމާޢީލް ޒާން އާމިރު އަދި ނޫހު ތައުމީނެވެ. މި މެޗުގައި ހިންނަވަރު ޓީމަށް އިރުޝާދުދީފައިވަނީ މި ވަގުތު އެ ރަށުގައި ކޯޗިންގެ ހަރަކާތްތަކެއް ކުރިއަށްގެންދަމުން އަންނަ ތަޖުރިބާކާރު ކޯޗު މުޙައްމަދު ނިޒާމް (ނިޒާމްބެ) އެވެ.

ހިންނަވަރުގައި ކުޅުނު ދެވަނަ މެޗުން ޒުވާން ގައުމީ ޓީމު މޮޅުވިއިރު، އެ ރަށުގައި ކުޅުނު ފުރަތަމަ މެޗުން ޒުވާން ގައުމީ ޓީމު ވަނީ ރ. މީދޫ އަތުން ފަސޭހަކަމާއެކު 7-0 ގެ ނަތީޖާއަކުން މޮޅުވެފައެވެ. އަދި މީގެ ކުރިން ޒުވާން ގައުމީ ޓީމު ވަނީ ނައިފަރުގައި ތިން މެޗެއް ކުޅެފައެވެ. އެގޮތުން ނައިފަރުގައި ކުޅުނު ފުރަތަމަ މެޗުގައި އެ ރަށާ ބައްދަލުކޮށް 1-1 ގެ ނަތީޖާއަކުން އެއްވަރުވިއިރު، ދެވަނަ މެޗުގައި ވަނީ ނ. ހޮޅުދޫއާވެސް 1-1 ގެ ނަތީޖާއަކުން އެއްވަރުވެއްފައެވެ. އެކަމަކު ތިންވަނަ މެޗުން ވަނީ ނ. ކުޑަފަރި އަތުން 8-3 ގެ ނަތީޖާއަކުން މޮޅުވެފައެވެ.

ހިންނަވަރުގައި ޒުވާން ގައުމީ ޓީމުން ކުޅޭ ފަހު މެޗުގައި ހޮނިހިރު ދުވަހު ނުކުންނާނީ ޅ. ކުރެންދޫއާ ދެކޮޅަށެވެ. މި ކޭމްޕް ނިންމާލުމަށްފަހު ޒުވާން ގައުމީ ޓީމު އެނބުރި މާލެ އައުމަށް ހަމަޖެހިފައިވަނީ އާދީއްތަ ދުވަހެވެ.

މީގެ ކުރިން ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަމުން 23 އަހަރުން ދަށުގެ ގައުމީ ޓީމުގެ ކޯޗު އަލީ ސުޒޭން ވަނީ އެ މެޗުތަކުގައި ރަނގަޅު ކުޅުންތެރިން ފާހަގަވެއްޖެނަމަ، ޒުވާން ގައުމީ ޓީމުން ފުރުސަތު ދޭނެ ކަމަށް ބުނެފައެވެ. ޒުވާން ގައުމީ ޓީމާ ސުޒޭން ހަވާލުވި ނަމަވެސް، އޭގެ ފަހުން އެފްއޭއެމުން ވަނީ ސީނިއާ ގައުމީ ޓީމުގެ ޒިންމާވެސް ސުޒޭނާ ހަވާލުކޮށްފައެވެ. އެހެންކަމުން މި ކޭމްޕުގައި ސުޒޭން ބައިވެރިނުވާއިރު، މި ވަގުތު ޒުވާން ގައުމީ ޓީމުގެ ކަންކަން ބަލަހައްޓަމުން އަންނަނީ އެސިސްޓަންޓް ކޯޗުން ކަމަށްވާ ޒުވާން ކޯޗު ސޮބާހު މުޙައްމަދު އިބްރާހީމް (ސޮބާ) އާއި މުޙައްމަދު ޝާހިދު (ޝާޑު) އެވެ.

އޭޝިއަން ކަޕުގެ ކޮލިފައިންގައި ޒުވާން ގައުމީ ޓީމު ވާދަކުރާއިރު، އެ މުބާރާތުގެ ކޮލިފައިން މެޗުތައް މި އަހަރުގެ އޮކްޓޯބަރު މަހުގެ 27 ވަނަ ދުވަހުން ފެށިގެން 31 ވަނަ ދުވަހުގެ ނިޔަލަށް ކުޅުމަށް ވަނީ ތާވަލުކޮށްފައެވެ. ރާއްޖެ ހިމެނޭ ގްރޫޕް ސީގެ މެޗުތައް ބަހްރޭނުގައި ކުޅޭއިރު، ކޮލިފައިންގައި ރާއްޖެ ހިމެނޭ ގްރޫޕުގައި ދެން އޮތީ ބަހްރޭނުގެ އިތުރުން އިރާގާއި އަފްޣާނިސްތާނެވެ.

ކޮލިފައިންގެ ކުރިން ބަހްރޭނުގައިވެސް 10 ވަރަކަށް ދުވަހު ޒުވާން ގައުމީ ޓީމު ކޭމްޕުކުރާ ގޮތަށް ވަނީ ހަމަޖެހިފައެވެ. މި ފަހަރުގެ ކޮލިފައިންގެ ފުރަތަމަ މެޗުގައި އޮކްޓޯބަރު މަހުގެ 27 ވަނަ ދުވަހު ރާއްޖެ ނުކުންނާނީ އިރާގާ ދެކޮޅަށެވެ. ކޮލިފައިންގެ ދެވަނަ މެޗުގައި އެ މަހުގެ 29 ވަނަ ދުވަހު ބަހްރޭނާ ދެކޮޅަށް ރާއްޖެ ނުކުންނައިރު، ފަހު މެޗުގައި 31 ވަނަ ދުވަހު ނުކުންނާނީ އަފްޣާނިސްތާނާ ދެކޮޅަށެވެ.

ކޮލިފައިންގައި 11 ގްރޫޕް ހިމެނޭއިރު، ކޮންމެ ގްރޫޕެއްގެ އެއްވަނައަށްދާ ގައުމަށް އޭއެފްސީ އޭޝިއަން ކަޕުން ފުރުސަތު ލިބޭނެއެވެ. އަދި އެ 11 ގްރޫޕުން ދެވަނައަށްދާ ގައުމުތަކުގެ ތެރެއިން އެންމެ ރަނގަޅު ނަތީޖާ ނެރޭ ހަތަރު ގައުމަކަށްވެސް މުބާރާތުން ފުރުސަތު ލިބޭނެއެވެ.