ބުންޑަސްލީގާގައި މާކް ބާޓްރާ އެނބުރި އައި މެޗުން ވާޑަ ބްރޭމަން އަތުން ބްރޫޝިއާ ޑޯޓްމަންޑް މޮޅުވެއްޖެ އެވެ.

ހޮނިހިރު ދުވަހުގެ ރޭ ކުޅުނު މެޗުން ވާޑަބްރޭމަންއާ ވާދަކޮށް ޑޯޓްމަންޑް މޮޅުވީ 3-4 ގެ ނަތީޖާއަކުންނެވެ.

ޑޯޓްމަންޑް ދަނޑުގައި ކުޅުނު މި މެޗު ފެށިގެން ފުރަތަމަ ލަނޑު ޖަހާ ލީޑު ނެގީ ވާޑަބްރޭމަން އިންނެވެ. މި ލަނޑު ހަތްވަނަ މިނެޓުގައި އެޓީމަށް ކާމިޔާބުކޮށްދިނީ ޖުނުޒޮވިކް އެވެ.

މި ލަނޑަށްފަހުވެސް ޖުނުޒޮވިކް އަށް ވަނީ ލީޑު ފުޅާކުރަން ފުރުސަތުތަކެއް ލިބި ބޭކާރުވެފައެވެ. އެހެންނަމަވެސް ވާޑަބްރޭމަން އިން ރަނގަޅަށް ކުޅެމުންދިޔަ ދަނޑިވަޅެއްގައި ޑޯޓްމަންޑްގެ މާކޯ ރެއުސް ވަނީ އެޓީމަށް ނަތީޖާ ހަމަހަމަކޮށްދީފައެވެ.

މި ލަނޑަށްފަހު އެޓީމުން ކުޅުން ރަނގަޅުކޮށްފައިވާއިރު، 42 ވަނަ މިނެޓުގައި އެމެރިކް ވަނީ ޑޯޓްމަންޑަށް ފުރަތަމަ ފަހަރަށް މެޗުގެ ލީޑު ނަގައިދީފައެވެ. މި ލަނޑުތަކާއެކު ފުރަތަމަ ހާފް ނިމުނީ 1-2 ގެ ނަތީޖާއިން ވާޑަބްރޭމަންގެ މައްޗަށް ޑޯޓްމަންޑް ކުރީގައި އޮވެގެންނެވެ.

ދެވަނަ ހަފް ފެށިގެން ވާޑަބްރޭމަން އިން އެޓީމުގެ ކުޅުން ރަނގަޅުކޮށްފައިވާއިރު، 46 ވަނަ މިނެޓުގައި އެޓީމުން ވަނީ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ފިން ބާޓެލްސް އެވެ. މި ލަނޑަށްފަހުވެސް އެޓީމުންދިޔައީ ޑޯޓްމަންޑްގެ ހާފަށް ބާރުބޮޑުކުރަމުންނެވެ.

ޑޯޓްމަންޑުން ދެވަނަ ފަހަރަށް މެޗުގެ ލީޑު ނެގީ 68 ވަނަ މިނެޓުގައި އެޓީމަށް ކާމިޔާބުކޮށްދިނީ މެކްސް ކްރޫޒް އެވެ. އެހެންނަމަވެސް 75 ވަނަ މިނެޓުގައި ދެވަނަ ފަހަރަށް ޑޯޓްމަންޑުން ވަނީ މެޗުގެ ނަތިޖާ ހަމަހަމަކޮށްފައެވެ. މި ލަނޑު އެޓީމަށް ލިބުނު ޕެނަލްޓީއަކުން ކާމިޔާބުކޮށްދިނީ ރެއުސްއެވެ.

ޑޯޓްމަންޑަށް ލީޑު ނަގައިދިނީ ފުރިހަމަވަގުތު ނިމެން މިނެޓަކަށްވެފައިވަނިކޮށް އެމެރިކް އެވެ. މި ނަތީޖާއާއެކު ޑޯޓްމަންޑުން ސީޒަން ނިންމާލީ ކުޅުނު 34 މެޗުން ހޯދި 64 ޕޮއިންޓާއެކު ޕޮއިންޓް ތާވަލުގެ ތިންވަނަ ހޯދައިގެންނެވެ. ވާޑަ ބްރޭމަން އިން ސީޒަން ނިންމާލީ 34 މެޗުން ހޯދި 45 ޕޮއިންޓާއެކު 8 ވަނައިގަ އެވެ.