ޠާލިބާނުންނަށް އަފްޣާނުގައި މާ ގިނަ ދުވަހަކު ވެރިކަމެއް ނުކުރެވޭނެ – ޞަލާހުއްދީން ރައްބާނީ

ޠާލިބާނުންނަށް އަފްޣާނިސްތާނު ހިފައި އެ މީހުންގެ ބާރުގެ ދަށުގައި އަފްޣާން މާ ގިނަ ދުވަހަކު ނޯންނާނެ ކަމަށް އަފްޣާނުގެ ދެވަނައަށް އެންމެ ބޮޑު ސިޔާސީ ޕާޓީ ކަމަށްވާ ޖަމިއްޔަތު އިސްލާމީގެ އިސްވެރިއެއް ކަމަށްވާ ޞަލާހުއްދީން ރައްބާނީ ވިދާޅުވެއްޖެއެވެ.

ޞަލާހުއްދީން ރައްބާނީ އެމަނިކުފާނުގެ ފޭސްބުކްގައި ކުރެއްވި ޕޯސްޓެއްގައި ވިދާޅުވީ ޠާލިބާނުން ވަނީ އަފްޣާނު ހިފައި އެ ޖަމާއަތުގެ ބާރުގެ ދަށަށް މުޅި ގައުމު ގެނެސްފައި ކަމަށެވެ. އަދި މީގެ ކުރީގެ ތަޖުރިބާތަކަށް ބަލާ ކަމުގައި ވަނީނަމަ އެގޮތަށް އަފްޣާނު އެ މީހުންގެ އަތްދަށުގައި މާ ގިނަ ދުވަހަކު ނޯންނާނެ ކަމަށް ޞަލާހުއްދީން ރައްބާނީ ވިދާޅުވިއެވެ.

ޞަލާހުއްދީން ރައްބާނީ އިތުރަށް ވިދާޅުވީ، ޠާލިބާނުން ގައުމު ހިފުމަށްފަހު ހުރިހާ ނަސްލަކާއި ދީނެއް ހިމެނޭނެ ސަރުކާރެއް އެކުލަވާލާނެ ކަމަށް ބުނި ކަމަށާއި، އެކަމަކު، ދާދި ފަހުން އެކުލަވާލި ސަރުކާރުގައި ބަހާއި އަމަލު ދިމާނުވާކަން އެނގޭ ކަމަށެވެ.

އޭނާ އިތުރަށް ވިދާޅުވީ އަފްޣާނުގެ އެކުވެރި ގައުމުތަކުން ޠާލިބާން ސަރުކާރު ބަލައިނުގަތުމަށް އެދޭކަމަށާއި، ޠާލިބާނުންނާއެކު އަފްޣާނުގެ ރައްޔިތުން ވޭތުކުރާނީ އަނދިރި ދުވަސްތަކެއް ކަމަށެވެ. އަދި އެ ޖަމާއަތަކީ ހަމައެކަނި ހަނގުރާމަ ކުރަން އެނގޭ ބަޔެއް ކަމަށް ޞަލާހުއްދީން ރައްބާނީ ވިދާޅުވިއެވެ.

ޠާލިބާނުން އެކުލަވާލި ސަރުކާރަށް އިސްލާމިކް އެމިރޭޓް އޮފް އަފްޣާނިސްތާނު ކިޔާފައިވާއިރު، އަންގާރަ ދުވަހު ވަނީ އައު ސަރުކާރު އިއުލާން ކޮށްފައެވެ. ޠާލިބާނުން އިއުލާންކުރި ސަރުކާރުގައި 33 ކެބިނެޓު މެމްބަރުން ހިމެނެއެވެ. އަދި ކެބިނެޓުގައި އަންހެން މެމްބަރަކު ނުހިމެނުމުން އެކަމާ ފާޑުކިޔުން ވަނީ އަމާޒުވެފައެވެ.