ވާދޫއަށް ދިމާވެފައިވާ ރަށްގިރުމުގެ މައްސަލަ ރައީސްގެ ސަމާލުކަމަށް!
9 ސެޕްޓެމްބަރު 2021 | ބުރާސްފަތި 02:15ބަނދަރުގެ ދަތިކަމާއި ފުޓްބޯޅަ ދަނޑު ބޮޑުކުރުމާއި ފުލުހުންގެ ޚިދުމަތް ފުޅާކުރުމާބެހޭ ގޮތުން މަޝްވަރާކުރެއްވި
ވާދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީއާއެކު ބޭއްވެވި ބައްދަލުކުރެއްވުމުގެ ތެރެއިން
ރ. ވާދޫއަށް ދިމާވެފައިވާ ރަށްގިރުމުގެ މައްސަލަ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހުގެ ސަމާލު ކަމަށް ގެންނަވައިފިއެވެ.
ރައީސް ޞާލިހު ވާދޫ ކައުންސިލާއި އަންހެނުންގެ ތަރައްގީއަށް މަސައްކަތްކުރާ ކޮމެޓީއާއެކު ބުދަ ދުވަހު ބޭއްވެވި ބައްދަލުކުރެއްވުމުގައި އެރަށު ކައުންސިލުން ވަނީ ސަރުކާރުން ވާދޫގެ ތަރައްގީއަށް ކުރިޔަށްގެންދަވާ ބޮޑަތި ބައެއް މަޝްރޫއުތައް ފާހަގަކުރައްވައި ސަރުކާރާއި ރައީސުލްޖުމްހޫރިއްޔާއަށް ޝުކުރު އަދާކުރައްވާފައެވެ.
ކައުންސިލުން ވަނީ އެރަށުގެ ތަރައްގީއަށް ކުރަމުން އަންނަ މަސައްކަތްތަކާއި ކުރިޔަށް ރޭވިފައިވާ ތަރައްގީގެ ޕްލޭންތައް ހިމެނޭ ޕްރެޒެންޓޭޝަނެއް ހުށަހަޅާފައެވެ. މީގެ އިތުރުން ކައުންސިލުން ވަނީ ރަށްގިރުމުގެ މައްސަލައާއި ބަނދަރުގެ ދަތިކަމާއި ފުޓްބޯޅަ ދަނޑު ބޮޑުކުރުމާއި ފުލުހުންގެ ޚިދުމަތް ފުޅާކުރުމާއި، އަދި ރަށުގެ ތަރައްގީއަށް މުހިންމު އެކި މަސައްކަތްތައް ފާހަގަކުރައްވައިފައެވެ. އަދި ވާދޫ އަންހެނުންގެ ތަރައްގީއަށް މަސައްކަތްކުރާ ކޮމެޓީން ވަނީ ކޮމެޓީގެ މެންބަރުންގެ އެލަވަންސް ބޮޑުކުރަން ބޭނުންވާކަން ފާހަގަކުރައްވާފައެވެ.
މި ބައްދަލުކުރެއްވުމުގައި ރައީސް ވަނީ ވާދޫ ކައުންސިލުން ރަށުގެ ތަރައްގީއަށް ޕްލޭންތައް ތައްޔާރުކޮށް ގިނަ މަސައްކަތްތަކެއް ކުރިޔަށްގެންދާތީ އެކަމަށް ކައުންސިލުގެ މެންބަރުންނަށް ތައުރީފުކުރައްވާފައެވެ. އަދި ރަށުގެ ތަރައްގީއަށް ކައުންސިލުން އެކުލަވާލާފައިވާ ޕްލޭންތަކާއި ކުރިޔަށްގެންދާ މަސައްކަތްތަކުގައި ސަރުކާރުގެ އެހީތެރިކަން ފުރިހަމައަށް ލިބިގެންދާނެކަން އެމަނިކުފާނު ފާހަގަކުރެއްވިއެވެ. މީގެ އިތުރުން ކައުންސިލުން ފާހަގަކުރެއްވި ކަންކަމުގައި ކަމާބެހޭ އިދާރާތަކާ މަޝްވަރާކުރައްވައިގެން ހައްލު ހޯއްދަވައިދެއްވުމަށް މަސައްކަތްކުރައްވާނެ ކަމުގައި އެމަނިކުފާނު ވިދާޅުވިއެވެ.
މި ބައްދަލުކުރެއްވުން ނިންމަވާލެއްވުމަށްފަހު ރައީސް ވަނީ ވާދޫގައި އަލަށް އިމާރާތްކުރާ މިސްކިތުގެ މަސައްކަތް ކުރިޔަށްދާގޮތް ބައްލަވާލައްވާފައެވެ. މި މިސްކިތަކީ 300 މީހުންގެ ޖާގައިގެ މިސްކިތެކެވެ. މީގެެ އިތުރުން ރައީސް ވަނީ އެރަށުގައި ނަރުދަނާ ނިޒާމު ގާއިމުކުރުމުގެ މަސައްކަތް ހިނގާ ސަރަހައްދަށް ވެސް ޒިޔާރަތްކުރައްވާފައެވެ.
