ދައުލަތުން 140 މީހަކަށް ގާނޫނީ ވަކީލުން ފޯރުކޮށްދީފީ

މިއަހަރުގެ އޮގަސްޓު މަހުގެ ނިޔަލަށް ދައުލަތުގެ ފަރާތުން 140 މީހަކަށް ގާނޫނީ ވަކީލުންގެ އެހީތެރިކަން ފޯރުކޮށްދީފައިވާކަމަށް އެޓަރނީ ޖެނެރަލްގެ އޮފީހުން ބުނެފިއެވެ.

އޭޖީ އޮފީހުން އާންމުކޮށްފައިވާ މައުލޫމާތުގައި ވާގޮތުން މިއަހަރުގެ ޖެނުއަރީން ފެށިގެން އޮގަސްޓުގެ ނިޔަލަށް 140 މީހަކަށް ގާނޫނީ ވަކީލުންގެ އެހީތެރިކަން ފޯރުކޮށްދީފައިވެއެވެ. މީގެ ތެރޭގައި އުމުރުން 18 އަހަރު ނުފުރޭ 74 ކުދިންނަށް ގާނޫނީ ވަކީލުންގެ އެހީތެރިކަން ފޯރުކޮށްދީފައިވާ ކަމަށާއި، 18 އަހަރާ 30 އަހަރާ ދެމެދުގެ 28 މީހަކަށް މި އެހީތެރިކަން ފޯރުކޮށްދީފައިވާއިރު، 31 އަހަރާއި 50 އަހަރާ ދެމެދުގެ 31 މީހެއްގެ އިތުރުން 51 އަހަރުން މަތީގެ 7 މީހަކަށް ގާނޫނީ ވަކީލެއްގެ އެހީތެރިކަން ފޯރުކޮށްދީފައިވާކަމަށް އޭޖީ އޮފީހުން ބުނެފައިވެއެވެ.

އޭޖީ އޮފީހުން ބުނީ ކުޑަކުދިންގެ ތެރެއިން އެންމެ ގިނައިން މި އެހީތެރިކަން ފޯރުކޮށްދީފައިވަނީ މަސްތުވާތަކެތީގެ މައްސަލަތަކާ ގުޅިގެން ކަމަށެވެ. މަސްތުވާތަކެތީގެ މައްސަލަތަކުގައި 40 ކުއްޖަކަށް ގާނޫނީ އެހީތެރިކަން ފޯރުކޮށްދީފައިވެއެވެ. 18 އަހަރުން މަތީގެ މީހުންގެ ތެރެެއިންވެސް އެންމެ ގިނަ ބަޔަކަށް މި އެހީތެރިކަން ފޯރުކޮށްދީފައިވަނީ މަސްތުވާތަކެތީގެ މައްސަލަތަކުގައި ކަމަށް އޭޖީ އޮފީހުން ބުނެފައިވެއެވެ. އެގޮތުން މަސްތުވާތަކެތީގެ މައްސަލަތަކުގައި 38 މީހަކަށް ވަނީ ގާނޫނީ އެހީތެރިކަން ފޯރުކޮށްދީފައެވެ. މީގެ އިތުރުންވެސް އިޖުތިމާއީ އެހެނިހެން މައްސަލަތަކުގައި ދައުލަތުގެ ފަރާތުން ގާނޫނީ ވަކީލުންގެ އެހީތެރިކަން ފޯރުކޮށްދީފައިވެއެވެ.

ގާނޫނުއަސާސީގެ 53 ވަނަ މާއްދާގެ (ށ)ގައި ވާގޮތުން ޖިނާއީ ބޮޑެތި މައްސަލަތަކުގައި ތުހުމަތުކުރެވޭ މީހާއަކީ ގާނޫނީ ވަކީލެއްގެ އެހީތެރިކަން ހޯދޭފަދަ މާލީ ތަނަވަސްކަމެއް ނެތް މީހަކު ނަމަ، އޭނާއަށް ދައުލަތުގެ ފަރާތުން ގާނޫނީ ވަކީލެއް އައްޔަންކޮށްދޭން ވާނެއެވެ. އަދި މައްސަލައެއްގެ ތުހުމަތުގައި ހައްޔަރުކުރާ ކުޑަ ކުއްޖަކަށް ގާނޫނީ ވަކީލަކު ބޭނުންވެ، އެ ކުއްޖާގެ ފަރާތުން އެކަން ކުރެވެން ނެތް ނަމަ، އެކުއްޖާއަށް ދައުލަތުގެ ފަރާތުން ގާނޫނީ ވަކީލަކު ހަމަޖައްސައިދޭން ޖެހެއެވެ.