އަފްޣާން ރައްޔިތުން ކާބޯތަކެއްޗަށް ޖެހިދާނެ ކަމުގެ އިންޒާރު އދ. އިން ދީފި
2 ސެޕްޓެމްބަރު 2021 | ބުރާސްފަތި 07:28އިންސާނީ ހައްގުތަކުގެ ނަޒަރުން ބަލާއިރު އަފްޣާންގެ ހާލަތު ވަރަށް ގޯސް
ޗަމަން ބޯޑަރު ހުރަސްކޮށް ޕަކިސްތާނަށް އެތެރެވުމަށް ވެސް ގިނަ ބަޔަކު ދަނީ މަސައްކަތްކުރަމުން
މަހެއްހާ ދުވަހުގެ ތެރޭގައި، އަފްޣާނިސްތާނުގައި ކާބޯތަކެއްޗަށް ޖެހިދާނެ ކަމުގެ އިންޒާރު އދ. އިން ދީފިއެވެ.
އދ. އިން މިހެން ބުނެފައި މިވަނީ ޠާލިބާނުން އައު ސަރުކާރެއް އެކުލަވާލުމުގެ މަސައްކަތްކުރަމުންދާ ދަނޑިވަޅެއްގައެވެ. އދ.ގެ ހިއުމެނިޓޭރިއަން ކޯޑިނޭޓަރ ރާމިޒް އަލަކްބަރޮވް ވިދާޅުވީ، އިންސާނީ ހައްގުތަކުގެ ނަޒަރުން ބަލާއިރު އަފްޣާންގެ ހާލަތު ވަރަށް ގޯސް ކަމަށެވެ. ގައުމުގެ ދެބައިކުޅަ އެއްބައި ކުދިން ކޮންމެ ދުވަހަކު ވެސް ކާނެ އެއްޗެއް ހޯދުމަށް ތަކްލީފު އުފުލަން ޖެހޭ ކަމަށެވެ.
އަފްޣާނިސްތާނުގައި ކާބޯތަކެތީގެ އަގު ދެގުނައަށް އުފުލިފައިވާއިރު، ތެލުގެ އަގުވަނީ ތިން ގުނައަަށް މައްޗަށް ޖެހިލާފައެވެ. އިންސާނީ އެހީތައް ދޭ ޖަމާއަތްތަކުން އެހީތައް ދިނުން ހުއްޓާލާފައިވާއިރު، ސަރުކާރު މުވައްޒަފުންގެ މުސާރަ ވެސް ނުދެވޭ ކަމަށް ރިޕޯޓުކޮށްފައިވެއެވެ.
އަފްޣާނިސްތާނުގެ ދިހަ މިލިއަން ކުޑަކުދިން އިންސާނީ އެހީއަށް ބޭނުންވެފައިވާ ކަމަށް ޔުނިސެފުން ވެސް އޮގަސްޓް މަހުވަނީ ބުނެފައެވެ.
ޔުނިސެފުން މިހެން ބުނެފައި ވަނީ ޔޫއެންގެ ވޯރލްޑް ފުޑް ޕްރޮގްރާމުން 200 މިލިއަން ޑޮލަރުގެ ކާބޯތަކެތީގެ އެހީއަށް އެދި ގޮވާލާފައިވާ ދަނޑިވަޅެއްގައެވެ. މި އަހަރުގެ ތެރޭގައި ވެސް ކާބޯތަކެތި ނުލިބުމުގެ ސަބަބުން މިލިއަނެއްހާ ކުޑަކުދިންގެ ފުރާނައަށް ނުރައްކާވާނެ ކަމަށް ޔުނިސެފުން ވަނީ އަންދާޒާ ކޮށްފައެވެ.
