އަފްޣާނިސްތާނުގެ އިތުރު ބައިމިލިއަން މީހުން މިއަހަރު ނިމުމުގެ ކުރިން ރެފިޔުޖީންނަށް ވާނެ: އދ
28 އޯގަސްޓު 2021 | ހޮނިހިރު 03:36ކޮންމެ ދުވަހަކުވެސް ހާހެއްހާ މީހުން އިރާނަށް ވަންނަމުންދާކަމަށް އދން ބުނޭ
ޗަމަން ބޯޑަރު ހުރަސްކޮށް ޕާކިސްތާނަށް އެތެރެވުމަށްވެސް ގިނަ ބަޔަކު ދަނީ މަސައްކަތްކުރަމުން
އަފްޣާނިސްތާނުގެ އިތުރު ބައި މިލިއަން މީހުން މިއަހަރު ނިމުމުގެކުރިން އެގައުމު ދޫކޮށް ރެފިޔުޖީންގެ ގޮތުގައި އެކި ގައުމުތަކަށް ހިޖުރަކުރާނެ ކަމަށް އދ ގެ ރެފިޔުޖީންނާ ބެހޭ އެޖެންސީ ޔޫއެންއެޗްސީއާރުން ބުނެފިއެވެ.
އދ ގެ ރެފިޔުޖީންނާ ބެހޭ އެޖެންސީން ވަނީ އަފްޣާނިސްތާނާ އިންވެގެންވާ ގައުމުތަކުގެ ބޯޑަރުތައް އަފްޣާނިސްތާން ދޫކޮށް އެގައުމުތަކަށް ދާން ބޭނުންވާ މީހުންނަށް ހުޅުވާލަދިނުމަށްވެސް އެދިފައެވެ. އަފްޣާނިސްތާނުގެ ކޮންޓްރޯލް ތާލިބާނުން އަލުން ހޯދުމާއެކު ފާއިތުވި ދުވަސްތަކުގައި ކޮންމެ ދުވަހަކުވެސް އެތައް ހާސް ބަޔަކު ވަނީ އެއްގަމާއި ވައިގެ މަގުން އަފްޣާނިސްތާން ދޫކޮށް ގޮސްފައެވެ. އެގޮތުން ކޮންމެ ދުވަހަކުވެސް ހާހެއްހާ މީހުން އިރާނަށް ވަންނަމުންދާކަމަށް ރެފިޔުޖީންގެ ކަންތައްތަކާއި ހަވާލުވެފައިވާ އެޖެންސީގެ ޑެޕިޔުޓީ ހައި ކޮމިޝަނަރ ކެލީ ކްލެމެންޓްސް ވިދާޅުވިއެވެ. މީގެއިތުރުން ބައެއް ވިޔަފާރިވެރިން ޕާކިސްތާނާއި އަފްޣާނިސްތާނާ ދެމެދު ދަތުކުރަމުންދާކަމަށްވެސް ކެލީ ވިދާޅުވިއެވެ.
ޖެނީވާގައި އޮތް ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކެލީ ވިދާޅުވީ އެންމެ މަދުވެގެންވެސް ބައި މިލިއަން މީހުން ރެފިޔުޖީންނަށް ކުރިޔަށް އޮތް ހަތަރު މަހު ވެގެންދާނެކަމަށް އަންދާޒާކުރެވޭކަމަށެވެ. އަފްޣާނިސްތާނުން ބޭރަށް އެއް ފަހަރާ ގިނަ އަދަދެއްގެ ބަޔަކު ދާތަން އަދި ނުފެނުނުނަމަވެސް އަފްޣާނިސްތާނުގެ އެތެރޭގައި ކަންކަން ބަދަލުވަމުންދަނީ އެއްވެސް މީހަކަށް އަންދާޒާކޮށްލަންވެސް ނޭންގޭހާ ހަލުވި މިނުގައި ކަމަށް ކެލީ ވިދާޅުވިއެވެ.
ފާއިތުވި ދުވަސްތަކުގައި ޕާކިސްތާނަށް އެތެރެވެފައިވަނީ މަދު އަދަދެއްގެ ބަޔެއްކަމަށްވެސް ކެލީ ވިދާޅުވިއެވެ. ކުރިޔަށް އޮތް ހަތަރު މަހެއްހާ ދުވަސްތެރޭގައި ބައި މިލިއަން މީހުން ރެފިޔުޖީންނަށް ވެގެންދާއިރު އެމީހުން ދާނެ ގައުމުތަކުގެ ގޮތުގައި ބެލެވިފައިވަނީ އިރާނާއި ޕާކިސްތާނުގެ އިތުރުން އޭޝިޔާގެ މެދުތެރޭގައި ހިމެނޭ ގައުމުތަކަށްކަމަށް ކެލީ ވިދާޅުވިއެވެ. އަދި ބައި މިލިއަން ރެފިޔުޖީންގެ ކަންކަން ހަމަޖެއްސުމަށް ކޮންޓިންޖެންސީ ޕްލޭނެއް އެކުލަވާލަމުންދާކަމަށް ކެލީ ވިދާޅުވިއެވެ.
ރެފިޔުޖީންގެ އަދަދު މައްޗަށްދާނެ ސަބަބެއް ކެލީ ހާމައެއްނުކުރައްވައެވެ.
އަނެއްކޮޅުން ރެފިޔުޖީންގެ ކަންކަމާބެހޭ އެޖެންސީގެ ހައިކޮމިޝަނަރ ޕިލިފޯ ގްރާންޑި ވަނީ ޔޫރަޕިއަން ކޮމިޝަންގެ ރައީސް އުރުސުލާ ވެން ޑަރ ލިޔެންގެ އިތުރުން އެހެންވެސް އެހީތެރިކަން ފޯރުކޮށްދޭ ޖަމާއަތްތަކާއި އެކު ރެފިޔުޖީންނަށް ބޯހިޔާވަހިކަން ހަމަޖެއްސުމާއި އެހެނިހެން ކަންކަމުގައި ބޭނުންވާނެ ފައިސާއާ ގުޅޭގޮތުން މަޝްވަރާކުރައްވާފައެވެ.
މީގެއިތުރުން އަފްޣާނިސްތާނުގެ އެތެރޭގައި އަންހެނުންނަށް އެއް ދުވަހުން އަނެއް ދުވަހަށް ކުރިމަތިވަމުން އަންނަ ބިރުވެރިކަން އިތުރުވަމުން އަންނަކަމަށް އޭޝިޔާ ޕެސިފިކް ނެޓްވޯރކުން ވަނީ ބުނެފައެވެ.
