އަފްޣާނިސްތާނުގެ އެންމެ ހުޅަނގު ބިތުން އީރާނާ އިންވެގެން އޮންނަ ހެރެތު ޕްރޮވިންސުގެ ސިޓީގެ ޔުނިވާސިޓީތަކުގައި ދެ ޖިންސު މަސްހުނިކޮށްގެން ކިޔަވައިދިނުން މަނާ ކުރަން ތާލިބާނުން ނިންމައިފިއެވެ.
ތާލިބާނުން އަންގާރަ ދުވަހު ބޭއްވި އެ ޖަމާއަތުގެ ފަތުވާ މަޖިލީހުގެ ބައްދަލުވުމަށްފަހު ނިންމާފައިވަނީ ހެރަތު ޕްރޮވިންސްގެ ޔުނިވާސިޓީތަކާއި ކޮލެޖުތަކުގެ އިތުރުން ސްކޫލުތަކުގައި ދެ ޖިންސު އެއްކޮށް ކިޔަވާދިނުން މަނާ ކުރުމަށެވެ. އެކަމަކު މި އުސޫލު ތަންފީޒު ކުރާނީ ސަރުކާރުގެ ތަންތަނުގައެވެ.
ހެރަތުގައި ދެ ޖިންސު އެއްކޮށް ކިޔަވާދިނުން ހުއްޓުމަކަށް ގެނައުމަށް ނިންމީ ޔުނިވާސިޓީތަކާއި ކޮލެޖުތަކުގެ ވެރިންނާއެކު ބޭއްވި ބައްދަލުވުމަކަށްފަހު ކަމަށް ތާލިބާނުން ބުނެއެވެ. އެމީހުން ނެރުނު ބަޔާނެއްގައި ބުނެފައިވަނީ ޕްރައިވެޓް ތަންތަން މި އުސޫލުން އިސްތިސްނާ ވާނެކަމުގައެވެ. ޕްރައިވެޓް ކޮލެޖުތަކުގައި ކުރިންވެސް ކިޔަވައިދެމުން ދިޔަގޮތަށް ދެ ޖިންސު އެއްކޮށް ކިޔަވާދިނުން މަނާ ނުކުރާ ކަމަށް ބުނެއެވެ.
ތާލިބާނުންގެ އޮފިޝަލަކު ބުނެފައިވަނީ ދެ ޖިންސު އެއްކޮށް ކިޔަވާދިނުމަކީ އެކަމުގެ ނޭދެވޭ އަސަރު މުޅި މުޖުތަމައަށް ކުރާނެ ކަމެއް ކަމަށެވެ. ފަސާދައިގެ މަގު ދަރިވަރުން ޚިޔާރުކޮށްފާނެ ކަމަށްވެސް އޭނާ ބުންޏެވެ.
ހެރަތު ޕްރޮވިންސްގެ ވެރިރަށް ހެރަތު ސިޓީއަކީ އަފްޣާނިސްތާނުގެ ދެވަނައަށް އެންމެ އާބާދީ ބޮޑު ސިޓީއެވެ. މި ޕްރޮވިންސްގައި ތާލިބާނުންގެ އައު އިޖުތިމާއީ ގައިދުރުކަމާއި ޖިންސު ދުރުކުރުމުގެ ސިޔާސަތު ތަންފީޒުކުރަން ފަށާފައިވާއިރު އިރުމައްޗާއި އުތުރާއި ދެކުނުގެ ޕްރޮވިންސްތަކުގައި އަދި މިފަދަ ސިޔާސަތެއް އިއުލާން ނުކުރެއެވެ. އެކަމަކު އޮގަސްޓު މަހުގެ 15 ވަނަ ދުވަހު ތާލިބާނުން އަފްޣާނިސްތާނުގެ ވެރިކަމާއި ހަވާލުވުމަށްފަހު ގަވާއިދުތައް ބަދަލުކުރުމުގެ މަސައްކަތް އަންނަނީ ކުރަމުންނެވެ.
