ޣަނީ އަފްޣާނިސްތާނު ދޫކޮށް ވަޑައިގެންނެވީ 169 މިލިއަން އެމެރިކާ ޑޮލަރާއެކު ކަމުގެ ތުހުމަތުތަކެއް

އަފްޣާނިސްތާނުގެ ރައީސް އަޝްރަފް ޣަނީ ގައުމު ދޫކުރައްވާ ވަޑައިގެންނެވީ 169 މިލިއަން އެމެރިކާ ޑޮލަރު ހިއްޕަވައިގެންކަމަށް ވިދާޅުވެ ޣަނީ ހައްޔަރުކުރުމަށް އަފްޣާނިސްތާނުން ތަޖިކިސްތާނަށް ކަނޑައަޅާފައި ހުންނަވާ ސަފީރު މުހައްމަދު ޒާހިރު ގަބަރު ގޮވާލައްވައިފިއެވެ.

ބުދަ ދުވަހު ބޭއްވި ނޫސްވެރިންގެ ބައްދަލުވުމެއްގައި ސަފީރު ވިދާޅުވީ ޣަނީ ގައުމު ދޫކުރައްވާ ފިއްލެވީ ގައުމަށް ގައްދާރުވުމަށްފަހު ކަމަށެވެ. އަދި އަފްޣާނިސްތާނުގެ މިހާރުގެ ރައީސަކަށް ގާނޫނީ ގޮތުން ވާނީ ޣަނީގެ ޑެޕިޔުޓީ އަމްރުﷲ ސަލާހް ކަމަށް ވެސް ސަފީރު ޒާހިރު ވިދާޅުވިއެވެ.

އަޝްރަފް ޣަނީ ވަޑައިގެންނެވީ ޠާލިބާނުންނަށް ގައުމު ދީފައިކަމަށް ޒާހިރު ވިދާޅުވިއެވެ. 350،000ށް ވުރެ ގިނަ ފައުޖު އަފްޣާނިސްތާނުގައި އޮތް ކަމަށާއި އެ އެންމެންނަކީ ވެސް އެންމެ ފަހުގެ ހަތިޔާރާއެކު މިލިޓަރީ ތަޖުރިބާ ލިބިފައިވާ މީހުންކަމަށް ޒާހިރު ވިދާޅުވިއެވެ. ނަމަވެސް އެއިން އެއްވެސް ބަޔަކު ޠާލިބާނުންނާ ދެކޮޅަށް ހަނގުރާމަނުކުރާ ކަމަށް ޒާހިރު ވިދާޅުވިއެވެ.

މިކަން ފެނިގެންދިޔައީ އަފްޣާނިސްތާނުގެ އުތުރުގައި ތަޖިކިސްތާނު ބޯޑަރު ކައިރި ސަރަހައްދުގައި ކަމަށް ޒާހިރު ވިދާޅުވިއެވެ. އެސަރަހައްދުގެ 20 ޑިސްޓްރިކްޓް ޠާލިބާނުންގެ ބާރުގެ ދަށަށް ދިޔައީ ފަސޭހަކަމާއެކު ކަމަށާއި ޠާލިބާނުންނާ ދެކޮޅަށް އަފްޣާނިސްތާނުގެ ސިފައިން ހަނގުރާމަނުކުރާކަން ވަނީ ޒާހިރު ފާހަގަކުރައްވާފައެވެ.

ޒާހިރު ވަނީ ޣަނީ ކުރީބައިގައި ޠާލިބާނުންނާއެކު އެއްބަސްވުމަކަށް އައިސްފައިވެދާނެކަމަށް ވިދާޅުވެފައެވެ.

ޒާހިރު އިތުރަށް ވިދާޅުވީ ޠާލިބާން ފަދަ ހަނގުރާމަވެރި ޖަމާއަތެއް އަފްޣާނިސްތާނުގައި ވެރިކަންކޮށް އަވަށްޓެރި ގައުމުތަކަށް ބިރަކަށްވުމަށް އެދިވަޑައިނުގަންނަވާކަމަށެވެ. ޠާލިބާނުންގެ ތެރޭގައި މިފަހަރު ބޭރު ގައުމުތަކުގެ ހަނގުރާމަވެރިން ވެސް އުޅޭކަމަށް ޒާހިރު ވިދާޅުވިއެވެ.

ޣަނީގެ ޑެޕިޔުޓީ ކަމުގައި ހުންނެވި އަމްރުﷲ ސަލާހު ވެސް ވަނީ އެ ގައުމުގެ ރައީސް ނެތް ވަގުތެއްގައި، މަރުވެއްޖެނަމަ ނުވަތަ ފިލައިގެން ގޮސްފިނަމަ ރައީސްކަމަށް އަންނާނީ ޑެޕިޔުޓީ ކަމަށް ގާނޫނު އަސާސީގައި އޮންނަކަމަށް ވިދާޅުވެފައެވެ.

އަފްޣާނިސްތާނުގެ ބޮޑު ބައި ކޮންޓްރޯލްކުރަމުން އަންނަ ޠާލިބާނުން އަންނަނީ އައު ސަރުކާރެއް އެކުލަވާލުމުގެ ޕްލޭންތައް ރާވަމުންނެވެ. އަދި ސަލާހު ވިދާޅުވި ވިދާޅުވުމާ ގުޅޭގޮތުން ޠާލިބާނުން އަދި އެއްޗެއް ބުނެފައެއް ނުވެއެވެ.

ގިނަ އަދަދެއްގެ ފައިސާ ހިފައިގެން ޣަނީ ވަޑައިގެންނެވިކަމަށް ދެކެވޭ ވާހަކަތައް ޣަނީ ވަނީ ދޮގުކުރައްވާފައެވެ. އެގޮތުން މިވަގުތު ޔޫއޭއީގެ ހިމާޔަތުގައި އެގައުމުގައި ހުންނެވި ޣަނީ ފޭސްބުކް މެދުވެރިކޮށް ވާހަކަދައްކަވަމުން ވިދާޅުވެފައިވަނީ ގައުމު ދޫކުރެއްވީ ހަމައެކަނި ލާނެ ހެދުން ހިފައިގެންކަމަށެވެ. ފައިސާ ނުގެންނަކަމަށާއި އެއީ އަބުރުކަތިލުމުގެ ގޮތުން ދައްކާ ވާހަކަތަކެއްކަމަށް ޣަނީ ވިދާޅުވިއެވެ.