ގައުމު ދޫކުރީ ހަމައެކަނި ލާނެ ހެދުން ހިފައިގެން، ފައިސާއެއް ނުގެންނަން، އަނބުރާ ގައުމަށް ދިޔުމާމެދު މިއަންނަނީ ވާހަކަދައްކަމުން: އަޝްރަފް ޣަނީ

ޠާލިބާނުން ކާބުލް ހިފުމާއެކު ގައުމު ދޫކުރައްވާ ޔުނައިޓެޑް އަރަބް އެމިރޭޓްސް (ޔޫއޭއީ) އަށް ވަޑައިގެން ހުންނެވި އަފްޣާނިސްތާނުގެ ރައީސް އަޝްރަފް ޣަނީ ފުރަތަމަ ފަހަރަށް އާންމުންނާ މުޚާތަބުކޮށް ފޭސްބުކް ލައިވް މެދުވެރިކޮށް ވާހަކަދައްކަވައިފިއެވެ.

ފޭސްބުކް ލައިވްގައި ވާހަކަދައްކަވަމުން ޣަނީ ވަނީ ކާބުލް ދޫކުރެއްވީ ލޭ އޮހޮރުވުމަކަށް ގައުމަށް ހިނގައިދާނެތީ އެކަމުން ގައުމު ސަލާމަތްކުރުމަށްކަމަށް ވިދާޅުވެފައެވެ. އަދި ގައުމު ދޫކުރެއްވިއިރު ގިނަ އަދަދެއްގެ ފައިސާ އާއެކު ޣަނީ ވަޑައިގެންނެވިކަމަށް ބުނެ ދައްކަމުންދާ ވާހަކަތައް ވެސް ވަނީ ދޮގުކުރައްވާފައެވެ.

ޠާލިބާނުން ކާބުލް ހިފުމާއެކު ޣަނީ ވަނީ ކުއްލި ގޮތަކަށް ގައުމު ދޫކުރައްވާ ވަޑައިގެންފައެވެ. އެކަމާ ގުޅިގެން ގިނަ ބަޔެއްގެ ފާޑުކިޔުން އަފްޣާނިސްތާނުގެ ތެރެއިންނާއި ބޭރުން ޣަނީއަށް ވަނީ އަމާޒުވެފައެވެ. އަދި ޣަނީ ވަޑައިގެންނެވި ގައުމަކާމެދު ވަނީ ސުވާލު އުފެދިފައެވެ. އެގޮތުން ބުދަ ދުވަހު ޔޫއޭއީން ޣަނީ ހުންނެވީ އެގައުމުގައި ކަން ރަސްމީކޮށް ހާމަކުރުމާ ހަމައަށް ޣަނީ ވަޑައިގެން ހުންނެވީ ތަޖަކިސްތާން، އުޒްބެކިސްތާން ނުވަތަ އޮމާންގައި ކަމަށް ވަނީ ވާހަކަދެކެވިފައެވެ.

ބުދަ ދުވަހު އީޔޫން ނެރުނު ބަޔާނެއްގައި ބުނެފައިވަނީ އިންސާނިއްޔަތަށްޓަކައި އަޝްރަފް ޣަނީ އާއި ޣަނީގެ އާއިލާ ޔޫއޭއީގައި ތިބުމުގެ ކަންކަން ހަމަޖައްސާފައިވާކަމަށެވެ.

ޔޫއޭއީގައި ހުންނަވައި ފޭސްބުކް މެދުވެރިކޮށް ވާހަކަދައްކަވަމުން ޣަނީ ވިދާޅުވީ ގައުމުގައި މަޑުކުރެއްވިނަމަ ކާބުލްގައި ލޭއޮހޮރުވުންތައް ހިނގާނެކަމަށެވެ. އަދި ގައުމު ދޫކުރެއްވީ ސަރުކާރުގެ އޮފިޝަލުންތަކެއްގެ ލަފައާއެކު ކަމަށް ވެސް ޣަނީ ވިދާޅުވިއެވެ.

މީގެއިތުރުން އެތައް މިލިއަނެއް ޑޮލަރަކާއެކު ޣަނީ ވަޑައިގެންނެވިކަމަށް ދައްކަމުންދާ ވާހަކަތައް ދޮގުކުރައްވައި ޣަނީ ވިދާޅުވީ އެއީ އެމަނިކުފާނުގެ އަބުރު ކަތިލުމުގެ ގޮތުން ދައްކަމުންދާ އެއްވެސް އަސާސެއްނެތް ވާހަކަތަކެއްކަމަށެވެ.

ތަޖަކިސްތާނަށް ކަނޑައަޅާފައި ހުންނަވާ އަފްޣާނިސްތާނުގެ ސަފީރު މުހައްމަދު ޒާހިރު އަގްބަރު ބުދަ ދުވަހު ނޫސްވެރިންނާ ބައްދަލުކުރައްވައި ވާހަކަދައްކަވަމުން ވިދާޅުވީ ޣަނީ ގައުމު ދޫކުރައްވާ ވަޑައިގެންނެވީ 169 މިލިއަން އެމެރިކާ ޑޮލަރާއެކު ކަމަށެވެ. އެހެންކަމުން ބައިނަލްއަގްވާމީ ފުލުހުންނަށް ޣަނީ ހައްޔަރުކުރުމަށް މުހައްމަދު ޒާހިރު ވަނީ ގޮވާލައްވާފައެވެ.

އަފްޣާނިސްތާނުގެ މާލިއްޔަތުން ޣަނީ 169 މިލިއަން އެމެރިކާ ޑޮލަރު ވަގަށް ނެގުމަށްފަހު އަމިއްލަ ފްލައިޓެއްގައި ގައުމަށް ގައްދާރުވުމަށްފަހު ފިލީ ކަމަށް ސަފީރު ވަނީ ތުހުމަތުކުރައްވާފައެވެ.

މިތުހުމަތުތައް ޣަނީ އާ އަރިސް، ކުރީގެ ކެބިނެޓްގެ ބޭފުޅުން ގެންދަވަނީ ޓްވީޓް ކުރައްވަމުންނެވެ. އޭގެތެރޭގައި ހިމެނިވަޑައިގަންނަވާ އެއް ބޭފުޅަކީ ޣަނީގެ ޑިފެންސް މިނިސްޓަރ ބިސްމިﷲ ޚާން އެވެ.

ބިސްމިﷲ ޚާން ކުރެއްވި ޓްވީޓެއްގައި ވިދާޅުވެފައިވަނީ އެމީހެއްގެ އަމިއްލަ ގައުމު ވިއްކާ މީހުން ހައްޔަރުކޮށް އަދަބު ދޭންޖެހޭކަމަށެވެ. މީގެއިތުރުން ބިސްމިﷲގެ ޓްވީޓްގައި ވަނީ ހޭޝްޓެގް އިންޓަރޕޯލްއެރެސްޓްޣަނީ ބޭނުންކުރައްވާފައެވެ.

ފޭސްބުކް ލައިވްގައި ވާހަކަދައްކަވަމުން ޣަނީ އިތުރަށް ވިދާޅުވީ ޠާލިބާނުންނާއި އަފްޣާނިސްތާނުގެ ކުރީ ސަރުކާރުގެ އިސް އޮފިޝަލުންނާ ދެމެދު މިހާރު ހިނގަމުންދާ ވާހަކަތަކަށް ތާއީދުކުރައްވާކަމަށެވެ. އަދި ޔޫއޭއީން ހިމާޔަތްހޯއްދަވާފައި ހުންނެވިނަމަވެސް އަނބުރާ އަފްޣާނިސްތާނަށް ވަޑައިގަތުމުގެ ވާހަކަތައް ދައްކަވަމުން ގެންދަވާކަމަށް ޣަނީ ވިދާޅުވިއެވެ.

އަފްޣާނިސްތާނުގެ ކުރީގެ ރައީސް ހާމިދު ކަރުޒާއީ އާއި އަބްދުﷲ އަބްދުﷲ އާއެކު ކުރިޔަށްދާ ވާހަކަތަކަށް ތާއީދުކުރައްވާކަމަށާއި އެވާހަކަތައް ކާމިޔާބުވުމަށް އެދިވަޑައިގަންނަވާކަމަށް ޣަނީ ވިދާޅުވިއެވެ.

ޔޫއޭއީ އަކީ 1996 ވަނަ އަހަރުން ފެށިގެން 2001 ވަނަ އަހަރާ ދެމެދު އަފްޣާނިސްތާނުގައި ވެރިކަން ކުރި ޠާލިބާން ސަރުކާރު ގަބޫލުކުރި ތިން ގައުމުގެ ތެރެއިން އެއް ގައުމެވެ. އޭރުގެ ޠާލިބާންގެ ސަރުކާރު ދެން ގަބޫލުކުރި އަނެއް ދެ ގައުމަކީ ސައުދީ އަރަބިއްޔާ އާއި ޕާކިސްތާނެވެ.

ކާބުލް ޠާލިބާންގެ ބާރުގެ ދަށަށް ދިޔުމާއެކު ގިނަ ބަޔަކު އަފްޣާނިސްތާން ދޫކޮށް ދިޔުމަށް އަންނަނީ މަސައްކަތްކުރަމުންނެވެ. އެގޮތުން އެއަރޕޯޓްތައް މީހުންނައިގެން ފުރިފައިވާއިރު ބައެއް މީހުން ވަނީ މަރު ވެސް ވެފައެވެ.

އަފްޣާނިސްތާނުގައި ޠާލިބާނުންގެ ބާރު ގަދަވާން ފަށާފައިވަނީ އެގައުމުގައި ތިބި ބޭރު ގައުމުތަކުގެ ފައުޖުތައް މި އަހަރުތެރޭގައި ފައިބާނެކަން ހާމަކުރުމާއެކުއެވެ. އެއާއެކު ޠާލިބާނުންގެ ބާރުގަދަވެ އެގައުމުގައި އުފެދިފައިވާ ސަރުކާރު ވަނީ ނިމުމަކަށް އައިސްފައެވެ. އަދި ޠާލިބާނުންވަނީ އަފްޣާނިސްތާނުގައި ކުރިޔަށްދިޔަ ހަނގުރާމަ ނިމިފައިވާކަން އިއުލާންކޮށްފައެވެ. އަދި މިހާރު މަސައްކަތްކުރަމުން އަންނަނީ އައު ސަރުކާރެއް އެކުލަވާލުމަށްކަމަށް ޠާލިބާނުން ވަނީ ހާމަކޮށްފައެވެ.