އަބޫދާބީގެ ގްރީން ލިސްޓުން ރާއްޖެ އުނިކޮށްފިއެވެ.

އަބޫދާބީގެ ގްރީން ލިސްޓުން ރާއްޖެ ހިމެނޭ ގޮތަށް 6 ގައުމެއްވަނީ އުނިކޮށްފައެވެ. އޭގެތެރޭގައި ހިމެނެނީ، ރާއްޖޭގެ އިތުރުން އެމެރިކާ، އިސްރާއީލް، އިޓަލީ، އޮސްޓްރިއާ އަދި އަރްމޭނިއާއެވެ. މި ގައުމުތަކުން އަބޫދާބީއަށް ދަތުރުކުރާ މީހުން ކަނޑައަޅާފައިވާ ކަރަންޓީން މުއްދަތު ހަމަކުރަންޖެހެއެވެ.

އަލަށް ގްރީން ލިސްޓަށް އިތުރު ކުރެވުނީ، މޯލްޓާ، އަޔަރލެންޑް އަދި ސްވިޑެންއެވެ. ގްރީން ލިސްޓްގައި ޖުމްލަ 28 ގައުމެއް މިހާރު އެބައޮތެވެ. ގްރީން ލިސްޓްގައި ހިމެނޭ ގައުމުތަކުން އަބޫދާބީއަށް ދަތުރުކުރާ މީހުން ކަރަންޓީންގެ މުއްދަތު ފުރިހަމަކުރާކަށް ނުޖެހެއެވެ. އެހެންނަމަވެސް 72 ގަޑިއިރު ނުވާ ނެގެޓިވް ޕީސީއާރް ޓެސްޓެއް އޮންނަން ޖެހެއެވެ.

ގްރީން ލިސްޓްގައި ހިމެނޭ ގައުމުތަކުން ދަތުރުކުރާ މީހުންގެ ތެރެއިން ވެކްސިން ފުރިހަމަ ކޮށްފައިވާ މީހުން އަބޫދާބީއަށް ދާ ތާރީޚުން ފެށިގެން ހަވަނަ ދުވަހު ޕީސީއާރް ޓެސްޓެއް ހަދަން ޖެހެއެވެ. އަދި ވެކްސިން ނުޖަހާ މީހުން އަބޫދާބީއަށް ދާ ތާރީޚުން ފެށިގެން ހަވަނަ ދުވަހާއި ނުވަ ވަނަ ދުވަހު ޕީސީއާރް ޓެސްޓެއް ހަދަން ޖެހެއެވެ.

އަބޫދާބީގެ ގްރީން ލިސްޓުން ރާއްޖެ އުނިކޮށްފައިވާ މި ދަނޑިވަޅަކީ، ރާއްޖޭގައި ކޮވިޑްގެ ހާލަތު ރަނގަޅުވެފައިވާ ދުވަސްވަރެކެވެ. އެއާއެކު ކޮވިޑާ ގުޅިގެން އަޅާފައިވާ ފިޔަވަޅުތަކަށްވަނީ ލުއިތަކެއް ވެސް ދީފައެވެ.