ރައީސް ނަޝީދު ރާއްޖެ ވަޑައިނުގަންނަވަނީ ރާއްޖޭން ނަފްސާނީ ފަރުވާ ނުލިބޭތީތޯ ސުވާލު އުފެދޭ- އާދަމް ޝަރީފް
ރާއްޖެ ވަޑައިނުގެންނެވޭ ސަބަބު ރައީސް ނަޝީދު ވަނީ ސިޓީއަކުން މަޖިލީހަށް ހުށަހަޅުއްވާފައި
މަޑުއްވަރި ދާއިރާގެ މެންބަރު އާދަމް ޝަރީފް
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ރާއްޖެވަޑައިނުގަންނަވަނީ އެމަނިކުފާނަށް ބޭނުންވާ ނަފްސާނީ ފަރުވާ ރާއްޖެއިން ނުލިބޭތީ ކަމާމެދު ސުވާލު އުފެދޭ ކަމަށް މަޑުއްވަރި ދާއިރާގެ މެންބަރު އާދަމް ޝަރީފް ވިދާޅުވެއްޖެއެވެ.
އަންގާރަ ދުވަހުގެ ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން މެންބަރު ވިދާޅުވީ އިންސާނުންގެ ނަފްސާނީ ދުޅަހެޔޮކަމަށް ބޭނުންވާ ފަރުވާ ނުދެވި އެކަމަށް ބޭނުންވާ ބޭހާއި ވަސީލަތްތައް ރާއްޖޭން އެންމެ އެކަށީގެންވާ ގޮތެއްގައި ލިބެން ނުހުންނަ ކަމަށެވެ. އަދި ރައީސް ނަޝީދު ރާއްޖެ ވަޑައިނުގަންނަވަނީ އެމަނިކުފާނަށް އަމާޒުކޮށް ދިން ހަމަލާގެ ސަބަބުން ބޭނުންވާ ނަފްސާނީ ފަރުވާ ރާއްޖެއިން ނުލިބޭތީތޯ ސުވާލު އުފެދޭ ކަމަށެވެ.
މިކަމަށް ރައްދު ދެއްވައި ބިލެތްދޫ ދާއިރާގެ މެންބަރު އަހުމަދު ހަލީމު ވިދާޅުވީ އެމަނިކުފާނު މަޖިލީހަށް ފޮނުއްވި ސިޓީން ރާއްޖެވަޑައިނުގެން ހުންނެވި ސަބަބު ވަރަށް ރަނގަޅަށް ސާފުވާ ކަމަށެވެ. އަދި މެންބަރު ޝަރީފް ނަފްސާނީ ފަރުވާ ވިދާޅުވެ މުޅިން އެހެން ވާހަކައެއް ދެއްކެވުމަށް މަސައްކަތް ކުރައްވާ ކަމަށެވެ.
މެންބަރު މިހެން ވިދާޅުވެފައިވާއިރު ހޯމަ ދުވަހުގެ ރައްޔިތުންގެ މަޖިލީހުގެ ޖަލްސާގައި އެމަނިކުފާނު މިކަމާ ގުޅިގެން ފޮނުއްވާފައިވާ ސިޓީއެއް ވަނީ އިއްވާފައެވެ. ސިޓީގައި އެމަނިކުފާނު ވިދާޅުވީ 6 މެއިގައި އެމަނިކުފާނަށް ދިން ހަމަލާ ރާވައި ހިންގި ފަރާތްތަކުގެ ތަހުގީގު އަދި ނުނިމި ކުރިއަށްދާކަމަށް ދިވެހި ފުލުހުންގެ ޚިދުމަތުން ބުނެފައިވުމާއެކު އެ ތަހުގީގު ނިމި، އެކަންރާވައި ހިންގި ފަރާތްތައް އިންސާފުގެ ކުރިމައްޗަށް ގެނެވި، ހައްޔަރުގައި ބޭތިއްބުމުގެ ކުރީގައި އެމަނިކުފާނު ރާއްޖެ ވަޑައިގަތުމަކީ އެމަނިކުފާނުގެ އާއިލާއާއި ހެޔޮއެދޭ އެތައް ބަޔަކާއި އަދި އެމަނިކުފާނު ވެސް ޖެހިލުންވާ ކަމެއް ކަމަށެވެ.
މީގެ އިތުރުން އެމަނިކުފާނު ރާއްޖެއިން ބޭރުގައި ހުންނައިރު މަޖިލީހުގެ އެންމެހައި ކަންކަން ގާނޫނު އަސާސީއާއި މަޖިލީހުގެ ގަވާއިދުގައިވާ ގޮތުގެމަތިން މަޖިލީހުގެ އިއްޒަތްތެރި މެންބަރުންގެ އިރުޝާދުގެ ދަށުން މަޖިލީހުގެ ނާއިބު ރައީސް އިސްވެ ހުންނަވައި މަޖިލީހުގެ އިދާރާއިން ހިންގާނެކަމީ އެމަނިކުފާނުގެ ހިތުގައި އެއްވެސް ޝައްކެއް އުފެދޭ ކަމެއް ނޫން ކަމަށެވެ. އަދި ރާއްޖެއިން ބޭރުގައި ހުންނަވާއިރު ރައްޔިތުންގެ މަޖިލީހަށާއި ދިވެހި ދައުލަތަށް ޚިދުމަތްކުރުމުގެ މަސައްކަތް ކުރިއަށް ގެންދަވާނެ ކަމަށެވެ.
