ޠާލިބާނުން އަފްޣާނިސްތާނުގެ ވެރިރަށް ކާބުލް ހިފަން މަސައްކަތް ކުރަނިކޮށް ލޭއޮހޮރުވުމަކަށް ނުގޮސް އިންސާނީ ކާރިސާއެއް ހުއްޓުވުމަށް ކަމަށް ވިދާޅުވެ ގައުމު ދޫކުރައްވައި ވަޑައިގެންނެވި ރައީސް އަޝްރަފް ޣަނީ މިހާރު ހުންނެވީ އޮމާނުގައި ކަމަށް ރަޝިއާއިން ތުހުމަތު ކޮށްފިއެވެ.
ފުރަތަމަ ޚަބަރު ފެތުރުނީ ރައީސް ޣަނީ ގައުމު ދޫކުރައްވައި ވަޑައިގެންނެވީ ތަޖިކިސްތާނަށް ކަމަށެވެ. ކާބުލްގައި ހުންނަ ރަޝިއާގެ އެމްބަސީން ހޯމަ ދުވަހު ބުނީ ރައީސް ޣަނީ ގައުމު ދޫކުރައްވައި ވަޑައިގެންނެވީ ހަތަރު ކާރާއި ހެލިކޮޕްޓަރެއް ފުރެންދެން ފައިސާޔާއެކު ކަމަށެވެ. އެއަށް ނުލެވުނު ފައިސާ ބެހެއްޓެވީ ކަމަށްވެސް ބުނެފައިވެއެވެ.
އަފްޣާން ރައީސް ހުންނެވީ އޮމާނުގައި ކަމަށް ރަޝިއާއިން ތުހުމަތު ކުރި ނަމަވެސް އޭނާ ސީދާ ހުންނެވީ ކޮންތަނެއްގައިކަން ޔަގީން ނުވާކަމަށްވެސް ބުނެފައިވެއެވެ. ރަޝިއާގެ އެމްބަސީން ބޮޑަށް ގަބޫލުކުރަނީ ކާބުލްއިން އޮމާނަށް ދަތުރު ކުރެއްވީ ކަމަށް ބުނެފައިވެއެވެ.
ރައީސް ޣަނީ ދަތުރުކުރެއްވި އެއްވެސް ބޯޓެއް ތަޖިކިސްތާނުގެ ވައިގެ ސަރަހައްދަށް ވަދެފައި ނުވާކަމަށް އެ ގައުމުގެ ކަމާ ގުޅުންހުރި ފަރާތްތަކާ ހަވާލާދީ ރިޕޯޓުކޮށްފައިވެއެވެ. އަލްޖަޒީރާއިން އޭގެ ފަހުން ރިޕޯޓުކޮށްފައިވަނީ ރައީސް ޣަނީ އުޒްބެކިސްތާނަށް ދަތުރު ކުރެއްވި ކަމަށެވެ. އަފްޣާން ޑިޕްލޮމެޓަކާ ހަވާލާދީ ރިޕޯޓުކޮށްފައިވާ ގޮތުން ރައީސް ޣަނީ ސީދާ ވަޑައިގެންނެވީ ކޮން ތަނަކަށްކަން ކަށަވަރެއް ނުވެއެވެ.
ގައުމު ދޫކުރައްވައި ވަޑައިގެންނެވި ފަހުން ވާހަކަފުޅު ދައްކަވަމުން ޣަނީ ވިދާޅުވެފައިވަނީ ކުރިމަތި ކުރުވީ އުނދަގޫ ހާލަތަކާއި ކަމަށާއި އެއްގޮތަކީ ހަތިޔާރު އެޅި ތާލިބާނުންގެ އަތްދަށަށް ދިއުން ކަމަށެވެ. އަނެއް ގޮތަކީ 20 އަހަރު ވަންދެން ޚިދުމަތް ކުރެއްވި ގައުމު ދޫކުރައްވައި ވަޑައިގެންނެވުން ކަމަށެވެ.
އަދި އެމީހުންނާއި ދެކޮޅަށް ނުކުތްނަމަ އެތަކެއް މީހުން މަރުވާނެ ކަމަށާއި ކާބުލް ސުންނާފަތިވެގެންދާނެ ކަމަށްވެސް ޣަނީ ވިދާޅުވިއެވެ. އަދި މިކަމުގެ ސަބަބުން 6 މިލިއަން މީހުން ދިރިއުޅެމުން އައި ކާބުލްގައި އިންސާނީ ބޮޑު ކާރިސާއެއް ކުރިމަތިވާނެ ކަމަށް ވިދާޅުވިއެވެ.
ފިއްލަވައިގެން ވަޑައިގެންނެވީ ނޫން ކަމަށާއި ތާލިބާނުން ގަދަބާރުން ވެރިކަމުން ދުރުކުރީ ކަމަށް ޣަނީ ވިދާޅުވިއެވެ. އަދި ލޭ އޮހޮރުވުމަކަށް ދާން ބޭނުންފުޅު ނުވި ކަމަށާއި ގައުމަށް އެންމެ ރަނގަޅު ގޮތަކީ ދިއުން ކަމަށް ވިދާޅުވިއެވެ.
ޣަނީ ވިދާޅުވީ ރައްޔިތުންގެ އިތުބާރު ހޯދުމަށް ތާލިބާނުން މަސައްކަތްތަކެއް ކުރަން ޖެހޭނެ ކަމަށާއި އާންމުންނާއި އެކި ދާއިރާތަކާއި އަންހެނުންނަށް ޔަގީންކަން ދޭން ޖެހޭނެ ކަމަށެވެ.
