މާލޭގެ ކުނީގެ މައްސަލަ ހައްލު ކުރުމަށް ގޭބީސީތަކުން ކުނި ނެގުމަށާއި، މާލޭގެ އާންމު ތަންތަނުން ކުނި ނެގުމަށް ކުރަމުންދާ މަސައްކަތް މާލޭގެ މޭޔަރ ޑރ. މުހައްމަދު މުއިއްޒަށް އޮޅިވަޑައިގެންފައިވާ ކަމަށާއި، ގޭބީސީތަކުން ކުނި ނެގުމުގެ އިންތިޒާމަށް ބަދަލެއް ގެންނަން މަޝްވަރާ ނުކުރެވޭ ކަމަށް ވޭސްޓް މެނޭޖްމަންޓް ކޯޕަރޭޝަން (ވެމްކޯ) އިން ބުނެފިއެވެ.

މާލޭގެ ގޭބީސީތަކަށް ވަދެ ކުނި ނެގުމުގެ ކަންކަން ފެށުމަށް މި މަހުގެ 21 ވަނަ ދުވަހު އަލުން ފެށުމަށް ވެމްކޯއާއި މަޝްވަރާ ކޮށްފައިވާ ކަމަށް ސިޓީ ކައުންސިލުން ބުނެފައިވާ އިރު، އެ މައްސަލަ ވަނީ ހޫނުވެފައެވެ. މިކަމާއި ގުޅޭގޮތުން ރާއްޖެ އެމްވީއަށް ދެއްވި އިންޓަރވިއުއެއްގައި އެ ކޯޕަރޭޝަންގެ މެނޭޖިން ޑިރެކްޓަރ އާދަމް މުހައްމަދު ވިދާޅުވީ ގޭބީސީތަކުން ކުނި ނެގުމަށް ބަދަލެއް ގެނައުމަށް މަޝްވަރާ ކޮށްފައި ނުވާ ކަމަށާއި، މާލޭގެ މޭޔަރު ޑރ. މުހައްމަދު މުއިއްޒު ކުރިން ހައުސިން މިނިސްޓަރ ކަމުގައި ހުންނެވި އިރު އެގްރީމެންޓް ކުރެވިފައިވަނީ މާލޭގެ އާންމު ސަރަހައްދުތައް ކުނި ނަގާ ސާފްކުރުމުގެ މަސައްކަތް ކަމަށެވެ.

އާދަމް ވިދާޅުވީ މާލެ ސަރަހައްދުގެ ގޭބީސީތަކުން ކުނި ނެގުމުގެ އިންތިޒާމްތަކަށް ބަދަލު ގެނެސްފައިވަނީ ސިއްހީ ކުއްލި ނުރައްކަލުގެ ހާލަތުގެ ދަށުން ހެލްތް ޕްރޮޓެކްޝަން އެޖެންސީ (އެޗްޕީއޭ) އާއި ސަރުކާރާއި މަޝްވަރާ ކުރުމަށްފަހުގައި ކަމަށެވެ. އަދި މި މަސައްކަތަކީ ވެމްކޯއިން ކުރަމުން އަންނަ މަސައްކަތެއް ކަމަށާއި، މިކަމަކީ ސިޓީ ކައުންސިލްގެ މެންޑޭޓްގައި ހިމެނޭ ކަމެއް ނޫން ކަމަށެވެ. އަދި މި އުސޫލަށް ބަދަލެއް ގެންނަ ނަމަ އެކަން ކުރާނީ ކޮވިޑްގެ ހާލަތަށް ރިއާޔަތްކޮށް އެޗްޕީއޭއާއި ސަރުކާރާއި މަޝްވަރާ ކުރުމަށްފަހުގައި ކަމަށެވެ.

އާދަމް ވިދާޅުވީ މުއިއްޒު ސޮއިކުރެއްވި އެގްރީމެންޓެއް އޭނާއަށް އޮޅިވަޑައިގެންފައިވާ ކަމަށާއި، ކުނި ނެގުމުގެ ވަގުތަށް އަދި އުސޫލަށް ވެސް ބަދަލު ގެނައުމަށް ސިޓީ ކައުންސިލާއި ވެމްކޯއާއި މަޝްވަރާ ނުކުރާ ކަމަށެވެ. ގޭބީސީތަކުން ކުނި ނެގުމުގެ މަސައްކަތަކީ ވެމްކޯއިން ހިންގާ ވަކި ޕްރޮޖެކްޓެއް ކަމަށާއި، އެއީ އޭޑީބީގެ އެހީގެ ދަށުން ކުރަމުން އަންނަ ކަމެއް ކަމަށެވެ.

މާލޭގެ އާންމު ތަންތަން ސާފުކުރުމާއި، މާލޭގެ ގޭބީސީތަކުން ކުނި ނެގުމަކީ ތަފާތު ދެކަމެއް ކަމަށާއި، މި މަސައްކަތް ކުރުމުގައި ވެމްކޯއިން ގެންގުޅޭނެ އުސޫލުތައް އާންމުކޮށްފައިވާނެ ކަމަށެވެ. އަދި ގޭބީސީތަކުން ކުނި ނަގާ ގަޑިއަށް ނުވަތަ ކުނި ނަގާ އުސޫލަށް ބަދަލު ގެންނަ ނަމަ ކަސްޓަމަރުންނަށް އެ މައުލޫމާތު އަންގަމުންދާނެ ކަމަށް ވެސް ވިދާޅުވިއެވެ.

މިމަހުގެ 21 ވަނަ ދުވަހުން ފެށިގެން މާލެ ސަރަހައްދުގެ ގޭބީސީތަކުން ކުނި ނަގާނީ ގޭގެއަށް ގޮސްގެން ކަމަށް ނިންމައި މާލެ ސިޓީ ކައުންސިލުން ވަނީ ވެމްކޯއަށް ސިޓީއެއް ފޮނުވާފައެވެ. އެހެންނަމަވެސް ވެމްކޯއިން ވަނީ މިފަދަ ކަމެއް ކުރަން އެއްބަސްނުވާ ކަމަށް ބުނެ ނޫސްބަޔާނެއް ނެރެފައެވެ.

މިކަމާ ގުޅިގެން މާލެ ސިޓީ ކައުންސިލުން ބޭއްވި ނޫސްވެރިންގެ ބައްދަލުވުމެއްގައި ޑެޕިއުޓީ މޭޔަރ އަހުމަދު ނަރީޝް ވިދާޅުވީ ސިޓީ ކައުންސިލުން މި ނިންމުން ނިންމީ ވެމްކޯއާއެކު ބައްދަލުވުމެއް ބާއްވައި މިކަމުގެ މަޝްވަރާތައް ކުރުމަށް ފަހުގައި ކަމަށެވެ. އެ ބައްދަލުވުމުގައި ވެމްކޯއިން މިކަންކަން ކޮށްދޭނެކަމަށް އެއްބަސްވެފައިވާކަމަށް ނަރީޝް ވިދާޅުވިއެވެ. އެހެންނަމަވެސް ވެމްކޯގެ ފަރާތުން ފަހުން ފެނުނީ މިއާ ޚިލާފަށް އަމަލުކުރިތަން ކަމަށް ނަރީޝް ވިދާޅުވިއެވެ.

ނަރީޝް ވިދާޅުވީ ވެމްކޯއިން މިފަދަ ކަމެއް ކުރަން ނިންމާފައި ނުވާކަން ފާހަގަކޮށް ބަޔާން ނެރުމުން އަނެއްކާވެސް އެ ކުންފުންޏާ ބައްދަލުކޮށްފައިވާކަމަށެވެ. އެ ބައްދަލުވުމުގައި ވެސް މިކަންކަން ކޮށްދޭނެ ކަމަށް ވެމްކޯއިން ބުނި ކަމަށް ނަރީޝް ވިދާޅުވިއެވެ. އަދި އެ ކުންފުންޏަށް ދިމާވާ ބައެއް ދަތިތައް ވެސް ހިއްސާކޮށްފައިވާ ކަމަށާއި، މިކަންކަން ހިއްސާކުރުމުން ވެމްކޯއަށް ފަސޭހަ ދުވަހަކުން އެ މަސައްކަތް ފެށުމަށް ފުރުސަތު ދީފައިވާކަމަށް ނަރީޝް ވިދާޅުވިއެވެ. އެހެންނަމަވެސް މިއަދާ ހަމައަށް ވެސް ވެމްކޯއިން ޖަވާބެއް ދީފައިނުވާކަމަށް ނަރީޝް ވަނީ ވިދާޅުވެފައެވެ.

ވެމްކޯއިން ބުނެފައިވަނީ ސިޓީ ކައުންސިލަކީ ދައުލަތުގެ އިދާރާއެއް ކަމުން އެ އިދާރާއިން އެދެމުންދާ ކަންކަން ހައްލުކޮށްދޭނެ ކަމަށާއި، ނަމަވެސް ވެމްކޯއިން ދެމުންދާ ޚިދުމަތަކަށް ބަދަލެއް ގެންނަށް މަޝްވަރާ ނުކުރާ ކަމަށެވެ. އަދި ސިޓީ ކައުންސިލްގެ ވާހަކަތައް ވެމްކޯއިން ވަނީ ދޮގުކޮށްފައެވެ.