މާލޭގެ ކޮންމެ ބްލޮކަކަށް ވެރިޔަކު ހޮވުމަށް ބާއްވާ އިންތިޚާބު އޮކްޓޯބަރު މަހު
ރަސްމީ ނަތީޖާ އިޢުލާން ކުރުމަށް ހަމަޖެހިފައިވަނީ 2021 އޮކްޓޯބަރ 14ގައި
މާލެ ސިޓީ ކައުންސިލުން ގަލޮޅު އަވަށުގެ ރައްޔިތުންނާ ބައްދަލުކުރުން - މި ބައްދަލުވުމުގައި، ބްލޮކް ވެރިން އިންތިޚާބު ކުރުމަށް ރާވާފައިވާކަމަށް މޭޔަރ ވިދާޅުވި
މާލޭގެ ހުރިހާ ރައްޔިތުން ރަމްޒުވާނެ ގޮތަށް ކޮންމެ ބްލޮކަކަށް ވެރިއަކު އިންތިޚާބުކޮށްގެން ކައުންސިލްގެ މަސައްކަތްތައް ކުރިއަށް ގެންދިއުމަށް މާލެ ސިޓީ ކައުންސިލުން ނިންމާފައިވާ ނިންމުމުގެ ދަށުން، "ބްލޮކް ވެރިން" ހޮވުމަށް ބާއްވާ އިންތިޚާބު އޮކްޓޯބަރު މަހު އޮންނާނެކަމަށް ކައުންސިލުން ބުނެފިއެވެ.
މާލެ ސިޓީ ކައުންސިލުން ބުނީ، މާލޭ ސިޓީގައި އައްޔަނުކުރެވޭ ބުލޮކުތަކުގެ ވެރިންގެ އުޞޫލުގެ 7ވަނަ މާއްދާގެ ދަށުން، މާލޭ ސިޓީގެ ބުލޮކްތަކުގެ ވެރިންނަން, ބުލޮކްގައި ދިރިއުޅޭ ރައްޔިތުންގެ ތެރެއިން އެމީހުން އިންތިޚާބުކުރާ ބުލޮކްވެރިޔާ ހޮވުމަށް ބާއްވަންޖެހޭ އިންތިޚާބު 2021 އޮކްޓޯބަރ މަހުގެ 9ވާ ހޮނިހިރު ދުވަހު ބާއްވާގޮތަށް ހަމަޖައްސާފައިވާ ކަމަށެވެ. އެގޮތުން މާލޭ ސިޓީގައި އައްޔަނުކުރެވޭ ބުލޮކްތަކުގެ ވެރިންގެ އުޞޫލުގެ 14ވަނަ މާއްދާގެ (ހ)ގައި ބަޔާންކޮށްފައިވާ, މާލޭ ސިޓީ ބުލޮކު ވެރިޔާއަށް ކުރިމަތިލުމަށް އެދޭ މީހުންނަށް އެ ފުރުޞަތު 2021 އޮގަސްޓް މަހުގެ 8ވާ އާދީއްތަ ދުވަހުގެ 10:00ން ފެށިގެން 2021 އޮގަސްޓް މަހުގެ 26ވާ ބުރާސްފަތި ދުވަހުގެ 14:00އާ ހަމަޔަށް ވަނީ ހުޅުވާލާފައެވެ.
މާލޭސިޓީގެ ބުލޮކް ވެރިޔާ އިންތިޚާބަށް ކުރިމަތިލާ މީހެއްގެ ހުންނަންޖެހޭ ޝަރުތުތައްވެސް މާލެ ސިޓީ ކައުންސިލުން ވަނީ ބަޔާންކޮށްފައެވެ. އެގޮތުން މީލާދީގޮތުން 18 އަހަރު ފުރިފައިވާ ދިވެއްސެއްކަމުގައި ވުމާއި، އެމީހަކު އެ ކުރިމަތިލާ ބުލޮކެއްގައި ދިރިއުޅޭ މީހެއްކަމުގައިވުމާއި، ވައްކަން، ޓެކުން، ފޭރުން، ނުވަތަ ކޮރަޕްޝަނުގެ ކުށެއް ސާބިތުވެފައިނުވާ މީހެއް ކަމުގައިވުން ހިމެނެއެވެ. އަދި މުސްތަޤިއްލު މުއައްސަސާއެއްގެ ނުވަތަ ސިޔާސީ މަޤާމެއް ފުރާ ފަރާތެއް ކަމުގައި ނުވުމާއި، ޖިނާއީ ކުށެއް ސާބިތުވެފައި ވާނަމަ ޙުކުމް ތަންފީޒު ކުރެވުނުތާ 3 އަހަރު ވެފައިވުން ފަދަ ގިނަ ޝަރުތުތަކެއް ބަޔާންކޮށްފައިވެއެވެ.
މި އިންތިޚާބަށް ކުރިމަތިލުމަށް އެދޭ ފަރާތްތަކުގެ އެޕްލިކޭޝަން ފޯމު ބަލައިގަތުމަށް ހަމަޖެހިފައިވަނީ 2021 އޮގަސްޓް މަހުގެ 8ވަނަ ދުވަހުގެ 10:00ން ފެށިގެން 2021 އޮގަސްޓް މަހުގެ 26ވާ ބުރާސްފަތި ދުވަހުގެ 14:00ގެ ނިޔަލަށް މާލޭ ސިޓީ ކައުންސިލް (އެމްޑަބްލިޔު އެސްސީ ކަސްޓަމަރ ސަރވިސް ހަތަރުވަނަ ފަންގިލާ)އިން ކަމަށް ސިޓީ ކައުންސިލުން މައުލޫމާތު ދެއެވެ.
ކައުންސިލުން މައުލޫމާތު ދޭ ގޮތުގައި މާލޭ ސިޓީގެ ބުލޮކުތަކުގެ ވެރިޔާގެ އިންތިޚާބުގެ ވޯޓު ނެގުމަށް ހަމަޖެހިފައިވަނީ 2021 އޮކްޓޯބަރ މަހުގެ 9ވާ ހޮނިހިރު ދުވަހުގެ 10:00އިން 16:00އަށެވެ. އަދި ވޯޓު ގުނަން ފަށާނީ, ވޯޓު ނަގާނިމޭތާ 30 (ތިރީސް) މިނެޓުގެ ހުސްވަގުތު ކޮޅަކަށްފަހުގައެވެ. މި އިންތިޚާބުގެ ރަސްމީ ނަތީޖާ އިޢުލާން ކުރުމަށް ހަމަޖެހިފައިވަނީ 2021 އޮކްޓޯބަރ 14ވާ ބުރާސްފަތި ދުވަހުގައެވެ.
