ގައުމު ދޫކުރައްވައި ވަޑައިގަތީ ލޭއޮހުރުވުމަކަށް ނުގޮސް އިންސާނީ ކާރިސާއެއް ހުއްޓުވުމަށް – ރައީސް ޣަނީ
ގައުމު ދޫކުރައްވައި ވަޑައިގެން ފުރަތަމަ ފަހަރަށް އާންމުންނަށް މެސެޖެއް ދެއްވާފައިވަނީ ފެސްބުކް ޕޯސްޓެއް މެދުވެރިކޮށް
އަފްގާނިސްތާންގެ ސަރުކާރުގެ އިސްވެރިންނާއި އެގައުމުގެ ރައީސް ޢަނީ
ޠާލިބާނުން އަފްޣާނިސްތާނުގެ ވެރިރަށް ކާބުލް ހިފަން މަސައްކަތް ކުރަނިކޮށް ގައުމު ދޫކުރައްވައި ވަޑައިގަތީ ލޭއޮހޮރުވުމަކަށް ނުގޮސް އިންސާނީ ކާރިސާއެއް ހުއްޓުވުމަށް ކަމަށް އެ ގައުމުގެ ރައީސް އަޝްރަފް ޣަނީ ވިދާޅުވެއްޖެއެވެ.
ގައުމު ދޫކުރައްވައި އާދީއްތަ ދުވަހު ވަޑައިގެންނެވި ފަހުން ފުރަތަމަ ފަހަރަށް ވާހަކަފުޅުއްދަކަވަމުން ރައީސް ޣަނީ ވަނީ ވެރިކަމުގެ ބާރުތައް އަތުލައިގެން ޠާލިބާނުން ކުރަން އުޅޭ ކަންކަމުގެ މައުލޫމާތު ހާމަކުރެއްވުމަށާއި، ގައުމުގެ ކުރިމަގާ މެދު ސުވާލުމާކެއްގެ ތެރޭގައި ތިބި ރައްޔިތުންނަށް ކަންކަން ސާފުކޮށްދެއްވުމަށް ގޮވާލައްވާފައެވެ.
ޠާލިބާނުން އަފްޣާނިސްތާނުގެ ބާރުތައް އެމީހުންގެ މުށުތެރެއަށް ގެނެސްފައިވަނީ އާދީއްތަ ދުވަހުގެ ވަގުތެއްގައި ކުއްލި ގޮތަކަށް ވެރިރަށް ކާބުލް އެމީހުންގެ އަތްދަށަށް ގެނައުމަށްފަހުގައެވެ. އާދިއްތަ ދުވަހު މީޑިއާތަކުން ރިޕޯޓްކޮށްފައިވަނީ ތާލިބާނުންނާއި ސަރުކާރާއި ދެމެދު ސުލްހައިގެ މަޝްވަރާތަކެއް ކުރެވެމުންދާ ކަމަށާއި، ބާރުތައް ބަދަލު ކުރުމުގެ ކަންކަން އަމާންކަމާއެކު ކުރިއަށް ދިޔަ ކަމަށެވެ.
ނަމަވެސް މާ ގިނައިރު ތަކެއް ނުވަނީސް އެގައުމުގައި ތިބި ބޭރުގެ ޑިޕްލޮމެޓުން އަނބުރާ އެހެން ގައުމުތަކަށް ވަޑައިގެންނަވަން ފެއްޓެވިކަމަށް ރިޕޯޓްކޮށްފައިވާ އިރު، ރައީސް ޣަނީ ވެސް ގައުމު ދޫކުރައްވައި ވަޑައިގެންނެވި ކަމުގެ ޚަބަރުތައް ތާލިބާނުންނާއި ހަވާލާދީ ނޫސްތަކުގައި ރިޕޯޓްކުރިއެވެ.
ގައުމު ދޫކުރައްވައި ވަޑައިގެންނެވި ފަހުން ވާހަކަފުޅު ދައްކަވަމުން ޣަނީ ވިދާޅުވެފައިވަނީ ކުރިމަތި ކުރުވީ އުނދަގޫ ހާލަތަކާއި ކަމަށާއި، އެއްގޮތަކީ ހަތިޔާރު އެޅި ތާލިބާނުންގެ އަތްދަށަށް ދިއުން ކަމަށެވެ. އަނެއް ގޮތަކީ 20 އަހަރު ވަންދެން ޚިދުމަތް ކުރެއްވި ގައުމު ދޫކުރައްވައި ވަޑައިގެންނެވުން ކަމަށެވެ.
އަދި އެމީހުންނާއި ދެކޮޅަށް ނުކުތްނަމަ އެތަކެއް މީހުން މަރުވާނެ ކަމަށާއި، ކާބުލް ސުންނާފަތިވެގެންދާނެ ކަމަށްވެސް ޣަނީ ވިދާޅުވިއެވެ. އަދި މިކަމުގެ ސަބަބުން 6 މިލިއަން މީހުން ދިރިއުޅެމުން އައި ކާބުލްގައި އިންސާނީ ބޮޑު ކާރިސާއެއް ކުރިމަތިވާނެ ކަމަށް ވިދާޅުވިއެވެ.
ފިއްލަވައިގެން ވަޑައިގެންނެވީ ނޫން ކަމަށާއި، ތާލިބާނުން ގަދަބާރުން ވެރިކަމުން ދުރުކުރީ ކަމަށް ޣަނީ ވިދާޅުވިއެވެ. އަދި ލޭ އޮހޮރުވުމަކަށް ދާން ބޭނުންފުޅު ނުވި ކަމަށާއި، ގައުމަށް އެންމެ ރަނގަޅު ގޮތަކީ ދިއުން ކަމަށް ވިދާޅުވިއެވެ.
ޣަނީ ވިދާޅުވީ ރައްޔިތުންގެ އިތުބާރު ހޯދުމަށް ތާލިބާނުން މަސައްކަތްތަކެއް ކުރަން ޖެހޭނެ ކަމަށާއި، އާންމުންނާއި، އެކި ދާއިރާތަކާއި އަންހެނުންނަށް ޔަގީންކަން ދޭން ޖެހޭނެ ކަމަށެވެ.
