ރައްޔިތުންގެ މަޖިލީހުގެ ދަފްތަރަށް ބަދަލުތަކެއް

ރައްޔިތުންގެ މަޖިލީހުގެ ދަފްތަރަށް ބަދަލުތަކެއް އައިސްފައިވާ ކަމަށް މަޖިލީހުގެ ނާއިބު ރައީސް އީވާ ވިދާޅުވެއްޖެއެވެ.

ހޯމަ ދުވަހު ބޭއްވި މި އަހަރުގެ ތިންވަނަ ދައުރުގެ ފުރަތަމަ ޖަލްސާގައި ރިޔާސަތުން އަންގަވާ އެންގެވުންތައް އަންގަވަމުން އީވާ ވިދާޅުވީ މަޖިލީހުގެ ދަފްތަރަށް ބަދަލުތަކެއް އައިސްފައިވާ ކަމަށެވެ. އެގޮތުން ރައްޔިތުންގެ މަޖިލީހުގެ ދަނގެތީ ދާއިރާގެ މެންބަރު މުހައްމަދު ނާޒިމާއި ތިމަރަފުށި ދާއިރާގެ މެންބަރު އަބްދުﷲ ރިޔާޒް ޖުމްހޫރީ ޕާޓީން ވަކިވެވަޑައިގެންފައިވާކަން އިލެކްޝަނުން އަންގަވާފައިވާ ކަމަށެވެ.

އަދި ރައްޔިތުންގެ މަޖިލީހުގެ ގަވައިދުގެ 34 ވަނަ މާއްދާގެ (ށ)ގައި ބަޔާންކޮށްފައިވާ ލިޔުންތައް ހުށަހަޅުއްވާފައިވާތީ އެ މާއްދާގެ (ބ)ގެ ދަށުން އެކަން އިއުލާނު ކުރާ ކަމަށެވެ. މިިއާއެކު މިހާރު ޖުމްހޫރީ ޕާޓީ ތަމްސީލު ކުރައްވާ މެންބަރުންގެ އަދަދު ވަނީ 3ށް ދަށްވެފައެވެ. އަދި ވަކި ޕާޓީއަކަށް ނިސްބަތްވެވަޑައިނުގަންނަވާ މިނިވަން މެންބަރުންގެ ގޮތުގައި 8 މެންބަރުން ތިއްބަވާނެއެވެ.

އެމްޑީޕީގެ ފަަރާތުން މަޖިލީހުގައި ތިއްބަވަނީ 65 މެންބަރުންނެވެ. މީގެ އިތުރުން ޕީޕީއެމަށް ނިސްބަތްވެވަޑައިންނަވާ 6 މެންބަރުން، ޕީއެންސީގެ 3 މެންބަރުން އަދި އެމްޑީއޭގެ 2 މެންބަރުން މަޖިލީހުގައި ތިއްބަވައެވެ.

މެންބަރު ނާޒިމް އަދި ރިޔާޒް ޖުމްހޫރީ ޕާޓީން ވަކިވެވަޑައިގެންފައިވާއިރު އެ ދެ މެންބަރުންގެ އިތުރުން މަޖިލީހުގައި ތިއްބަވާ ނިލަންދޫ ދާއިރާގެ މިނިވަން މެންބަރު އަބްދުލްމުހްސިން ހަމީދު އަދި ނޮޅިވަރަމް ދާއިރާގެ މިނިވަން މެންބަރު މުހައްމަދު ނަޝީދު އަބްދުﷲ އަދި ވިލިމާލެ ދާއިރާގެ މެންބަރު އަހުމަދު އުޝާމަށް އިލެކްޝަންސް ކޮމިޝަނުން ވަނީ މޯލްޑިވްސް ނޭޝަނަލް ޕާޓީ (އެމްއެންޕީ)ގެ ނަމުގައި ޕާޓީއެއް އުފެއްދެވުމަށް މަސައްކަތް ކުރުމަށް ހުއްދަ ދީފައެވެ.

އެމްއެންޕީ އުފެއްދުމާ ގުޅޭގޮތުން ނާޒިމް ވިދާޅުވީ ޕާޓީއަށް މެމްބަރުން އިތުރުކުރުމުގެ މަސައްކަތް މިހާރު ފަށާފައިވާކަމަށާއި، އެ ޕާޓީއަށް ގިނަ މެމްބަރުންތަކެއް ވަންނާނެކަމަށް ގަބޫލުކުރައްވާކަމަށެވެ. އެގޮތުން ރާއްޖޭގެ 50 އިންސައްތަ މީހުންނަކީ ޕާޓީއަކާ ގުޅިފައިނުވާ މީހުން ކަމަށާއި، ޕާޓީތަކާ ގުޅިގެން ތިބި މީހުން ތިބީ ދެފަރާތަށް ގޮސް ހުސްވެފައިކަމަށެވެ. އަދި މެދުތެރޭގައި ވަރަށް ބޮޑު ބައެއް އެބަ އުޅޭކަމަށާއި، މެދުތެރޭގައި އޮތް ފިކުރަކީ އެމްއެންޕީގެ ފިކުރު ކަމަށް ގަބޫލުކުރައްވާކަމަށެވެ. މި ފިކުރާއެކު ޕާޓީއަށް މެމްބަރުން އިތުރުކުރެވޭނެ ކަމަށާއި، ޕާޓީން އަބަދުވެސް މެމްބަރުންނަށް މަރުހަބާ ކިޔާނެ ކަމަށެވެ.

އެމްއެންޕީ މަޖިލީހުން ބަލައިގަންނާނީ، އެ ޕާޓީ އީސީގައި ރަސްމީކޮށް ރަޖިސްޓަރީ ކުރުމަށްފަހު އެކަން މަޖިލީހަށް ހުށަހެޅުމުންނެވެ. އީސީން އެ ޕާޓީ ރަޖިސްޓަރީ ކޮށްދޭނީ 3،000 މެންބަރުންގެ ސޮޔާއެކު ހުށަހެޅުމުންނެވެ.