ހެރަތު ސިޓީ ހިފައި، އަފްޣާނިސްތާނުގެ އަސްކަރީ ކޮމާންޑަރު އިސްމާއިލް ޚާން ޠާލިބާނުން ހައްޔަރުކޮށްފިއެވެ.

އަފްޣާން ސަރުކާރު ސިފައިންނާއި ޠާލިބާނުންނާއި ދެމެދު ކުރިއަށްދާ ދާޚިލީ ހަނގުރާމަ ހޫނުވެފައިވާއިރު، ޤައުމުގެ އެތެރޭގެ ހާލަތު ވަނީ ވަރަށް ނުރައްކާތެރި ފައްތަރަކަށް ގޮސްފައެވެ. އަފްޣާނިސްތާނުގެ ގިނަ ސަރަހައްދުތައް ޠާލިބާންގެ އަތްދަށުގައިވާއިރު، އެ ސަރަހައްދުތަކުގައި ދިރިއުޅޭ ރައްޔިތުންނަށް ވަނީ ގެދޮރު ދޫކޮށް ރައްކާތެރި ހިސާބުތަކަށް ބަދަލުވާން ޖެހިފައެވެ. އަލްޖަޒީރާއިން ޠާލިބާނުންނާއި ހަވާލާދީ އެންމެ ފަހުން އާންމުކޮށްފައިވާ މައުލޫމާތު ދައްކާގޮތުން ޖުމުލަ 18 ޕްރޮވިންޝަލް ސިޓީއެއް ޠާލިބާނުންގެ ބާރުގެ ދަށަށް ގެނެސްފައިވެއެވެ. މީގެ ތެރޭގައި ޤަލަތު، ޓެރެންކޮޓް، ޕުލްއެ-އަލަމް، ފެރުޒް ކޯ، ޤަލާ-އެނޯ، ލަޝްކަރް ގާވަނީ ޠާލިބާނުންގެ ބާރުގެ ދަށަށް ގެނެސްފައެވެ.

އަދި ޠާލިބާން ހަނގުރާމަވެރިން އަފްޣާނިސްތާނުގެ ދެވަނައަށް އެންމެ ބޮޑު ސިޓީ ކަންދަހާރުވެސް ވަނީ ހިފައިފައެވެ. އަފްޣާންގެ ދެކުނުގައި އޮންނަ ކަންދަހާރު ހިފާފައިވަނީ ހުކުރު ދުވަހުއެވެ. ޠާލިބާނުން ވަނީ ކަންދަހާރުގެ އިތުރުން އަފްޣާނިސްތާނުގެ ތިންވަނައަށް އެންމެ ބޮޑު ސިޓީ ހެރަތު ވެސް ހިފާފައެވެ. އަދި ކަންދަހާރު ހިފުމަށްފަހު މިހާރު ވަނީ ޕޫލްއެއާލަމް ވެސް ހިފާފައެވެ. ހުޅަނގުގެ ގައުމުތަކުން ވަނީ، ކާބުލްގައި ހުންނަ އެމްބަސީތައް ހުސް ކުރުމުގެ މަސައްކަތް ފަށާފައެވެ. ބުރާސްފަތި ދުވަހުގެރޭ ދަންވަރު ވަރުގަދަ ހަމަލާތަކެއް ބަދަލުކުރުމަށް ފަހު، ސިޓީގެ ކޮންޓްރޯލް ޠާލިބާނުން ނެގީ ހުކުރު ދުވަހުގެ ހެނދުނުގެ ވަގުތެއްގައެވެ. ކާބުލްގައި ހުންނަ އެމެރިކާގެ އެމްބަސީ އެއްކޮށް ހުސްކުރުމަށް ސިފައިން ފޮނުވާނެކަމަށް އެ ގައުމުން ވެސް ވަނީ ބުނެފައެވެ. ޠާލިބާނުން އަފްޣާނިސްތާނުގެ ސިޓީތައް އެމީހުންގެ ބާރުގެ ދަށަށް ގެންނަން ފަށާފައި މިވަނީ، 20 އަހަރަށް ފަހު އެމެރިކާއާއި އެހެން ގައުމުތަކުގެ ސިފައިން އަފްޣާނިސްތާނުން ފައިބަން ފެށުމުންނެވެ.

މި ހަނގުރާމާގައި ހުކުރު ދުވަހުގެ ހަވީރުގެ ވަގިތެއްގައި ވަނީ އަފްޣާނިސްތާނުގެ ތިންވަނައަށް އެންމެ ބޮޑު ސިޓީ ހެރަތު ހިފާފައެވެ. ހެރަތު ހިފުމާއެކު އެ ސަރަހައްދުގެ ކަންކަން ބަލަހައްޓަމުންދާ އަދި އަފްޣާންގެ އެންމެ ނުފޫޒުގަދަ އެއް ކޮމާންޑަރ ވަނީ ހައްޔަރުކޮށްފައެވެ. އަފްޣާން ސަރުކާރުގެ ރަސްމީ އޮފިޝަލަކު ވަނީ އުމުރުފުޅުން 70 އަހަރުން މަތިވެފައިވާ އަފްޣާނިސްތާނުގެ އަސްކަރީ ކޮމާންޑަރު އިސްމާއިލް ޚާން ހައްޔަރުކުރި މަންޒަރުތައް އާންމުކޮށްފައެވެ.

އިސްމާއިލް ޚާން ބަލި ޤަބޫލުކޮށް އަމިއްލައަށް ޠާލިބާނުންގެ ހައްޔަރަށް ދާ މަންޒަރު މި ފޮޓޯތަކުން ފެނެއެވެ. ބަލި ޤަބޫލުކޮށް އަމިއްލައަށް ޠާލިބާނުންގެ ހައްޔަރަށް ދިއުމުން އެއްވެސް އަނިޔާއެއް އަދި ނުރައްކަލެއް ޠާލިބާނުންގެ ފަރާތުން ނޯންނާނެކަމަށް އެ ޖަމިއްޔާއިން ވަނީ ބުނެފައެވެ. މިއާއެކު ހެރަތުގައި އެ ޖަމާއަތަށް ނުހިފި އޮތް ހެރަތު އެއަރޕޯޓްގެ 15 ކިލޯ މީޓަރުގެ ސަރަހައްދަކާއި، އަސްކަރީ މަރުކަޒުވެސް ވަނީ އެ ޖަމާއަތުގެ ބާރުގެ ދަށަށް އައިސްފައެވެ.

އަފްޣާންގެ ގިނަ އަދަދެއްގެ ރައްޔިތުން ބޯޑަރުތަކާ ދިމާއަށް މިސްރާބު ޖަހާފައިވާއިރު، ބައެއް ރައްޔިތުން ތިބީ ގެއިން ބޭރަށް ނުނިކުމެ ގޭގައި ބަންދުވެގެންނެވެ. ޕާކިސްތާނުގެ ބޯޑަރާއި އީރާންގެ ބޯޑަރު ކައިރިއަށް ގިނަ އަދަދެއްގެ ރައްޔިތުން ޖަމާވަމުން އަންނަ ކަމަށް ސަރުކާރުގެ އޮފިޝަލަކާ ހަވާލާދީ ރޮއިޓާރސްގައި ރިޕޯޓުކޮށްފައިވެއެވެ.