ޠާލިބާނުން އަފްޣާންގެ ކަންދަހާރު ސިޓީ ހިފައިފި

ޠާލިބާން ހަނގުރާމަވެރިން އަފްޣާނިސްތާނުގެ ދެވަނައަށް އެންމެ ބޮޑު ސިޓީ ކަންދަހާރު ހިފައިފިއެވެ.

އަފްޣާންގެ ދެކުނުގައި އޮންނަ ކަންދަހާރު ހިފާފައިވަނީ ހުކުރު ދުވަހުއެވެ. ޠާލިބާނުން ވަނީ ކަންދަހާރުގެ އިތުރުން އަފްޣާނިސްތާނުގެ ތިންވަނައަށް އެންމެ ބޮޑު ސިޓީ ހެރަތު ވެސް ހިފާފައެވެ. އަދި ކަންދަހާރު ހިފުމަށްފަހު މިހާރު ވަނީ ޕޫލްއެއާލަމް ވެސް ހިފާފައެވެ. މިއާއެކު އަފްޣާންގެ ޕްރޮވިންސްތަކުގައި ވެރިކަންކުރާ 16 ސިޓީއެއް ޠާލިބާނުންގެ ބާރުގެ ދަށަށް ދިޔައީއެވެ.

ހުޅަނގުގެ ގައުމުތަކުން ވަނީ، ކާބުލްގައި ހުންނަ އެމްބަސީތައް ހުސް ކުރުމުގެ މަސައްކަތް ފަށާފައެވެ. ބުރާސްފަތި ދުވަހުގެރޭ ދަންވަރު ވަރުގަދަ ހަމަލާތަކެއް ބަދަލުކުރުމަށް ފަހު، ސިޓީގެ ކޮންޓްރޯލް ޠާލިބާނުން ނެގީ ހުކުރު ދުވަހުގެ ހެނދުނުގެ ވަގުތެއްގައެވެ.

ކާބުލްގައި ހުންނަ އެމެރިކާގެ އެމްބަސީ އެއްކޮށް ހުސްކުރުމަށް ސިފައިން ފޮނުވާނެކަމަށް އެ ގައުމުން ވެސް ވަނީ ބުނެފައެވެ. ޠާލިބާނުން އަފްޣާނިސްތާނުގެ ސިޓީތައް އެމީހުންގެ ބާރުގެ ދަށަށް ގެންނަން ފަށާފައި މިވަނީ، 20 އަހަރަށް ފަހު އެމެރިކާއާއި އެހެން ގައުމުތަކުގެ ސިފައިން އަފްޣާނިސްތާނުން ފައިބަން ފެށުމުންނެވެ.

އަފްޣާންގެ ގިނަ އަދަދެއްގެ ރައްޔިތުން ބޯޑަރުތަކާ ދިމާއަށް މިސްރާބު ޖަހާފައިވާއިރު، ބައެއް ރައްޔިތުން ތިބީ ގެއިން ބޭރަށް ނުނިކުމެ ގޭގައި ބަންދުވެގެންނެވެ. ޕާކިސްތާނުގެ ބޯޑަރާއި އީރާންގެ ބޯޑަރު ކައިރިއަށް ގިނަ އަދަދެއްގެ ރައްޔިތުން ޖަމާވަމުން އަންނަ ކަމަށް ސަރުކާރުގެ އޮފިޝަލަކާ ހަވާލާދީ ރޮއިޓާރސްގައި ރިޕޯޓުކޮށްފައިވެއެވެ.