ޠާލިބާނުން އަފްޣާނިސްތާނުގެ 8 ވަނަ ސިޓީ ހިފައިފި
11 އޯގަސްޓު 2021 | ބުދަ 06:52އެންމެ ފަހުން ޠާލިބާނުން ހިފީ އަފްޣާންގެ ހުޅަނގު ދެކުނު ޕްރޮވިންސްގައި އޮންނަ ފަރަހް ސިޓީ
ޠާލިބާން ހަނގުރާމަވެރިން ފަރަހް ސިޓީގެ ތެރޭގައި
ޠާލިބާނުން އަފްޣާނިސްތާނުގެ 8 ވަނަ ސިޓީ އެމީހުންގެ ބާރުގެ ދަށަށް ގެންގޮސްފިއެވެ.
އެންމެ ފަހުން އެމީހުންގެ ބާރުގެ ދަށަށް ގެންދިޔައީ އަފްޣާންގެ ހުޅަނގު ދެކުނު ޕްރޮވިންސްގައި އޮންނަ ފަރަހް ސިޓީއެވެ. މިއީ، ހުކުރު ދުވަހުގެ ފަހުން އެމީހުންގެ ބާރުގެ ދަށަށް ގެންދިޔަ 8 ވަނަ ސިޓީއެވެ.
ޠާލިބާނުން ފަރަހް ސިޓީގެ ތެރެއަށް ވަދެފައިވަނީ، ސަލާމަތީ ބާރުތަކާ ހަނގުރާމަ ކުރުމަށްފަހުގައެވެ. އެމީހުން މިހާރުވަނީ، ފަރަހް ސިޓީގެ ގަވަރުނަރުގެ އޮފީހާއި، ފުލުހުންގެ އިދާރާ ވެސް ހިފާފައެވެ. ގާނޫނުހަދާ މަޖިލީހުގެ މެމްބަރު އަބްދުލް ނަސްރީ ފަރަހީއާ ހަވާލާދީ އަލްޖަޒީރާގައި ބުނެފައިވަނީ، އެ ޕްރޮވިންގެ ޖަލު ވެސް އެމީހުންގެ ބާރުގެ ދަށަށް ގެންގޮސްފައިވާ ކަމަށެވެ.
ފަރަހް ސިޓީއަކީ ހުޅަނގު ދެކުނު ޕްރޮވިންސުން ޠާލިބާނުންގެ ބާރުގެ ދަށަށް ގެންދިޔަ ދެވަނަ ސިޓީއެވެ. މިއާއެކު މިހާރު އަފްޣާންގެ 34 ޕްރޮވިންސް ކެޕިޓަލް ސިޓީގެ ތެރެއިން 8 ސިޓީއެއް މިވަނީ ޠާލިބާނުންގެ ބާރުގެ ދަށުގައެވެ.
