ޠާލިބާނުން އަފްޣާނިސްތާންގެ އިތުރު ސިޓީއެއް ހިފައިފިއެވެ.
މިއީ، ހަތަރު ދުވަހުގެ ތެރޭގައި ޠާލިބާނުން ހިފި އަފްޣާންގެ 6 ވަނަ ސިޓީއެވެ.
ޠާލިބާން ހަގުރާމަވެރި ޖަމާއަތުގެ ތަރުޖަމާން ހޯމަދުވަހު ހެނދުނު ވަނީ، އަފްޣާނިސްތާނުގެ އުތުރުގެ ޕްރޮވިންސެއްކަމުގައިވާ ސަމަންގާގެ ކެޕިޓަލް ސިޓީ ކަމުގައިވާ އައިބާކް އެމީހުންގެ ބާރުގެ ދަށަށް ގެނެސްފައިވާ ކަމަށް ވިދާޅުވެ މީޑިއާތަކަށް މައުލޫމާތުދީފައެވެ. އަދި ސަމަންގާންގެ ޑެޕިއުޓީ ޕްރޮވިންޝަލް ގަވަރުނަރު ވަނީ މިކަން އޭއެފްޕީ ނިއުސް އެޖެންސީއަށް ވެސް ކަށަވަރުކޮށްދީފައެވެ.
އައިބާކު ސިޓީގެ ސަރުކާރުގެ ހުރިހާ އިމާރާތްތަކާއި އަދި ފުލުހުންގެ ހުރިހާތަނެއް ވެސް މުޅިން ސާފުކޮށް ނިންމާލެވިފައިވާކަން ހާމަކޮށް ޠާލިބާން ހަގުރާމަވެރިންގެ ތަރުޖަމާނު ޓުވީޓް ކުރިތާ ކުޑަ ވަގުތުކޮޅެއްގެ ތެރޭގައި ޑެޕިއުޓީ ޕްރޮވިންޝަލް ގަވަރުނަރު ވިދާޅުވެފައި ވަނީ، އެމީހުން ވަނީ ފުރިހަމަ ކޮންޓްރޯލް ނަގާފައި ކަމަށެވެ.
މިހާތަނަށް ޠާލިބާނުން ހިފާފައިވާ ޕްރޮވިންސްތައް ކަމުގައިވާ ޖޯވްޒްޖާން އާއި ކުންޑުޒްއާއި އަދި ސާރ-އީ-ޕޯލްއާ ޚިލާފަށް ސަމަންގަން ބެލެވިފައިވަނީ ޠާލިބާނުން އެންމެ މަދުން އުޅޭ، އަދި އެންމެ ރައްކާތެރިކަމަށް މިހާތަނަށް ބެލެވިފައިވާ ސިޓީތައް ކަމަށް ރިޕޯޓުތައް ބުނެއެވެ. އެހެންނަމަވެސް ފާއިތުވި ތިން އަހަރެއްހާ ދުވަހުގެ ތެރޭގައި އެ ޕްރޮވިންސްގައި ޠާލިބާނުންގެ ހަރަކާތްތައް އެ ސިޓީތަކުގައި ވަނީ އިތުރުވާން ފަށާފައެވެ.
ޠާލިބާނުން އެ މީހުގެ ބާރުގެ ދަށަށް އަފްޣާންގެ ސިޓީތައް ގެންނަމުންދާތީ، މިހާރު ވެސް ބާރު ބޮޑުވެފައިވާ ސަރުކާރުގެ އަސްކަރިއްޔާއަށް އިތުރު ގޮންޖެހުންތަކާ ވަނީ ކުރިމަތިލާން ޖެހިފައެވެ.
