އަފްޣާނުގެ އިތުރު ތިން ޕްރޮވިންސެއްގެ ވެރިކަންކުރާ ސިޓީ ޠާލިބާނުންގެ އަތްދަށަށް

ޠާލިބާނުންގެ އަތްދަށަށް އަފްޣާނިސްތާނުގެ އިތުރު ތިން ސިޓީއެއް ގޮސްފައިވާ ކަމަށް ބޭރު ދުނިޔޭގެ ރިޕޯޓްތައް ބުނެފިއެވެ.

އަރަބް ނިއުސްގައި ރިޕޯޓުކޮށްފައިވާ ގޮތުން އިތުރު ތިން ޕްރޮވިންސެއްގެ ވެރިކަންކުރާ ސިޓީ ޠާލިބާން ޖަމާއަތުގެ އަތްދަށް ގޮސްފައި ވަނީ އާދީއްތަ ދުވަހުއެވެ. މިއާއެކު ފަސް ޕްރޮވިންސެއްގެ ވެރި ސިޓީ މިހާރު އޮތީ އެ ޖަމާއަތުގެ އަތްދަށުގައިކަމަށް ރިޕޯޓުތައް ބުނެއެވެ. އެ ސިޓީތަކަކީ ކުންދުޒް، ތޮލަގަން، ސަރެޕުލް އަދި ޒަރަންޖް ސިޓީގެ އިތުރުން ޝެބެރްގާން ސިޓީ އެވެ.

ސަރުކާރާ ދެކޮޅަށް އެ ޖަމާއަތުން ދެމުންދާ ހަމަލާތައް ވަރުގަދަކޮށްފައިވާއިރު، 2020 ވަނަ އަހަރު އެމެރިކާގެ ސިފައިންނާ ޠާލިބާނުންނާ ދެމެދު ވެވުނު އެއްބަސްވުމަށް ފަހު އަނެއްކާވެސް އެގައުމުގެ ޕްރޮވިންސްތަކުގެ ވެރި ސިޓީތައް މިވަނީ އެ ޖަމާއަތުގެ އަތްދަށަށް ދާން ފަށާފައެވެ. އެންމެ ފަހުން ޠާލިބާނުންގެ އަތްދަށަށް އަފްޣާން ޕްރޮވިންސެއްގެ ވެރިކަން ކުރާ ސިޓީ ގޮސްފައިވަނީ 2016 ވަނަ އަހަރުއެވެ. އެއީ ކުންދުޒް ޕްރޮވިންސްގެ ވެރިރަށް ކުންދުޒް އެވެ.

އަފްޣާނިސްތާނުގެ ދާޚިލީ ހަނގުރާމަ ހޫނުވެފައިވަނީ އެ ގައުމުގައި ތިބި އެމެރިކާ ސިފައިން ފައިބަން ފެށުމާ ގުޅިގެންނެވެ. 20 އަހަރު ދުވަހަށްފަހު އެމެރިކާއާއި ހުޅަނގުގެ އަސްކަރީ އިއްތިހާދު (ނޭޓޯ)އިންވަނީ އަފްޣާނިސްތާނުން ފޭބުމުގެ މަސައްކަތް ފަށައިފައެވެ. އެ ގޮތުން ނޭޓޯގެ ފައުޖުތަކުގައި ހިމެނޭ, އިނގިރޭސިވިލާތާއި ޖަރުމަންވިލާތާއި އިޓަލީވިލާތުގެ ސިފައިންވަނީ އަފްޣާނިސްތާނުން ފައިބާފައެވެ.

އޮގަސްޓު މަސް ނިމުމުގެ ކުރިން އަފްޣާނިސްތާނުން ފޭބުމުގެ މަސައްކަތް އެމެރިކާގެ ސިފައިން މިހާރު ފަށާފައިވާއިރު، އެގައުމުގެ ކަންދަހާރުގައި ޤާއިމުކޮށްފައިވާ އެމެރިކާގެ އަސްކަރީ މަރުކަޒު ވެސް ވަނީ ސަރުކާރުގެ ސަލާމަތީ ބާރުތަކާ ހަވާލުކޮށްފައެވެ. އެގައުމުގައި އެމެރިކާގެ ސިފައިން މިހާރު ޙަރަކާތްތެރިވަނީ ވެރިރަށް ކާބުލްގެ އިތުރުން އެ ގައުމުގެ ބައިނަލްއަގްވާމީ ވައިގެ ބަނދަރުގެ ސަލާމަތީ ކަންކަން ބެލެހެއްޓުމުގެ މަސައްކަތުގައި އެކަންޏެވެ.

ޠާލިބާން ޖަމާއަތުގެ ބާރު ވަރުގަދަކޮށްފައިވާ މިދަނޑިވަޅުގައި އެ ޖަމާއަތުން ވަނީ އަފްޣާނިސްތާނުން ޕާކިސްތާނާއި ތަޖަކިސްތާނާއި އުޒުބެކިސްތާނާއި އީރާނަށް ދެވެން އޮންނަ މައިމަގުތަކާއި ސަރަހައްދީ ރޮނގުތައް އެ ޖަމާއަތުގެ ބާރުގެ ދަށަށް ގެނެސްފައެވެ. ޠާލިބާނުން ބުނާ ގޮތުގައި އަފްޣާނިސްތާނުގެ 85 އިންސައްތަ ސަރަހައްދު އޮތީ އެ ޖަމާއަތުގެ ބާރު ދަށުގައެވެ. ނަމަވެސް އެމެރިކާ އިން ބުނަނީ ޠާލިބާނުންގެ ބާރުގެ ދަށުގައި އޮތީ އަފްޣާނިސްތާނުގެ 50 އިންސައްތަ ސަރަޙައްދު ކަމަށެވެ.