އަފްޣާނިސްތާނުގެ ނިމްރުޒް ޕްރޮވިންސްގެ ވެރިކަން ކުރާ ސިޓީ، ޒަރާންޖް، ތާލިބާނުން ހިފައިފިއެވެ.

ތާލިބާނުން ސަރުކާރާ ދެކޮޅަށް ދެމުންދާ ހަމަލާތައް ވަރުގަދަކޮށްފައިވާއިރު، މިއީ 2020 ވަނަ އަހަރު އެމެރިކާގެ ސިފައިންނާ ތާލިބާނުންނާ ދެމެދު ވެވުނު އެއްބަސްވުމަށް ފަހު އެގައުމުގެ ޕްރޮވިންސެއްގެ ވެރިކަންކުރާ ސިޓީއެއް ތާލިބާނު ޖަމާއަތުގެ ދަށަށް ދިޔަ ފުރަތަމަ ފަހަރެވެ. ޒަރާންޖް ސިޓީ ތާލިބާނުންގެ އަތް ދަށަށް ގޮސްފައި ވަނީ ހުކުރު ދުވަހު ކަމަށް އަލްޖަޒީރާގައި ވަނީ ރިޕޯޓްކޮށްފައެވެ.

އެންމެ ފަހުން ތާލިބާނުންގެ އަތްދަށަށް އަފްގާން ޕްރޮވިންސެއްގެ ވެރިކަން ކުރާ ސިޓީ ގޮސްފައިވަނީ 2016 ވަނަ އަހަރުއެވެ. އެއީ ކުންދުޒް ޕްރޮވިންސްގެ ވެރިރަށް ކުންދުޒް އެވެ.

ތާލިބާނުން ވަނީ އަފްގާނުގެ އިތުރު ދެ ޕްރޮވިންސެއްގައި ސަރުކާރާ ދެކޮޅަށް ދެމުންދާ ހަމަލާތައް އިތުރަށް ވަރުގަދަކޮށްފައެވެ. އަދި ހަލްމަންޑް ޕްރޮވިންސްގެ މައި ސިޓީވެސް ތާލިބާނުންގެ އަތްދަށުވެފައިވާ ކަމުގެ ރިޕޯޓްތައް ވަނީ ފެންމަތިވެފައެވެ. ނަމަވެސް މިކަން އަދި ސީދާ ކަށަވަރުކޮށް ރިޕޯޓްކޮށްފައެއް ނުވެއެވެ.

އަފްޣާނިސްތާނުގެ ދާޚިލީ ހަނގުރާމަ ހޫނުވެފައިވަނީ އެ ގައުމުގައި ތިބި އެމެރިކާ ސިފައިން ފައިބަން ފެށުމާ ގުޅިގެންނެވެ. 20 އަހަރު ދުވަހަށްފަހު އެމެރިކާގެ އިތުރުން ހުޅަނގުގެ އަސްކަރީ އިއްތިހާދު، ނޭޓޯއިންވަނީ އަފްޣާނިސްތާނުން ފޭބުމުގެ މަސައްކަތް ފަށައިފައެވެ. އެ ގޮތުން ނޭޓޯގެ ފައުޖުތަކުގައި ހިމެނޭ އިނގިރޭސިވިލާތާއި ޖަރުމަންވިލާތާއި އިޓަލީވިލާތުގެ ސިފައިންވަނީ އަފްޣާނިސްތާނުން ފައިބައިފައެވެ.

އޮގަސްޓު މަސް ނިމުމުގެ ކުރިން އަފްޣާނިސްތާނުން ފޭބުމުގެ މަސައްކަތް އެމެރިކާގެ ސިފައިން މިހާރު ފަށާފައިވާއިރު، އެގައުމުގެ ކަންދަހާރުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒު ވެސް ވަނީ ސަރުކާރުގެ ސަލާމަތީ ބާރުތަކާ ހަވާލުކޮށްފައެވެ. އެގައުމުގައި އެމެރިކާގެ ސިފައިން މިހާރު ޙަރަކާތްތެރިވަނީ ވެރިރަށް ކާބުލްގެ އިތުރުން އެ ގައުމުގެ ބައިނަލްއަގްވާމީ ވައިގެ ބަނދަރުގެ ސަލާމަތީ ކަންކަން ބެލެހެއްޓުމުގެ މަސައްކަތުގައި އެކަންޏެވެ.

ތާލިބާނު ޖަމާއަތުގެ ބާރު ވަރުގަދަކޮށްފައިވާ މިދަނޑިވަޅުގައި އެ ޖަމާއަތުން ވަނީ އަފްޣާނިސްތާނުން ޕާކިސްތާނާއި ތަޖަކިސްތާނާއި އުޒުބެކިސްތާނާއި އީރާނަށް ދެވެން އޮންނަ މައިމަގުތަކާއި ސަރަހައްދީ ރޮނގުތައް އެ ޖަމާއަތުގެ ބާރުގެ ދަށަށް ގެނެސްފައެވެ. ތާލިބާނުން ބުނާ ގޮތުގައި އަފްޣާނިސްތާނުގެ 85 އިންސައްތަ ސަރަހައްދު އޮތީ އެ ޖަމާއަތުގެ ބާރު ދަށުގައެވެ. ނަމަވެސް އެމެރިކާ އިން ބުނަނީ ތާލިބާނުންގެ ބާރުގެ ދަށުގައި އޮތީ އަފްޣާނިސްތާނުގެ 50 އިންސައްތަ ސަރަޙައްދު ކަމަށެވެ.