އަފްޣާނިސްތާނުގެ ޑިފެންސް މިނިސްޓަރަށް އަމާޒުކޮށް ހަމަލާއެއްދީފި

އަފްޣާނިސްތާނުގެ ޑިފެންސް މިނިސްޓަރ ބިސްމިﷲ މުހައްމަދީއަށް އަމާޒުކޮށް ބޮމުގެ ހަމަލާއެއްދީފިއެވެ.

އަފްޣާނިސްތާނުގެ ވެރިރަށް ކާބުލްގައި ބޮންތަކެއް ގޮއްވާލާފައިވާއިރު މި ހަމަލާ އަމާޒުވެފައިވަނީ ކާބުލްގެ ގްރީން ޒޯނަކަށެވެ. އެ ސަރަހައްދަކީ ފޮރިން އެމްބަސީތަކާއި ސަރުކާރުގެ އޮފީސްތައް ހުންނަ ސަރަހައްދެއްކަމަށް އޮފިޝަލުން ވަނީ ހާމަކޮށްފައެވެ. މިހަމަލާއާ ގުޅިގެން ސީނިއަރ ސެކިއުރިޓީ އޮފިޝަލަކު ވިދާޅުވީ ހަމަލާ ދީފައިވަނީ ކާރެއް ގޮއްވާލައިގެން ކަމަށާއި ހަމަލާ އަމާޒުކޮށްފައިވަނީ ޑިފެންސް މިނިސްޓަރުގެ އިތުރުން ޕާލިމަންޓުގައި ހިމެނިވަޑައިންނަވާ މެންބަރެއްގެ ގެކޮޅަށް ކަމަށެވެ.

މި ހަމަލާއާ ގުޅިގެން ޑިފެންސް މިނިސްޓަރ މުހައްމަދީގެ ހަށިކޮޅަށް ގެއްލުމެއް ލިބިފައިނުވާއިރު ސެކިއުރިޓީ ގާޑުންނަށް ވަނީ އެކިވަރުގެ އަނިޔާތައްވެފައެވެ. މިކަމާ ގުޅިގެން އިންޓީރިއަރ މިނިސްޓްރީގެ ތަރުޖަމާނު ވިދާޅުވީ ހަތިޔާރު އެޅި މީހުން އެ ސަރަހައްދަށް ވަދެފައިވަނީ ކާރު ގޮއްވާލުމަށް ފަހުގައި ކަމަށެވެ. ތަރުޖަމާނު ވިދާޅުވީ ހަމަލާދިނުމަށް އައި މީހުންގެ ތެރެއިން ތިން މީހުން ހަމަލާ ބަދަލުކުރުންތަކުގައި މަރުވެފައިވާ ކަމަށެވެ.

މި ހާދިސާ ހިނގިތާ ދެ ގަޑިއިރު ވެސް ނުވެ އިތުރު ހަމަލާތަކެއް ވަނީ ދީފައެވެ. އެގޮތުން އެ ސިޓީގެ ހަމަ އެ ސަރަހައްދުގައި ބަޑީގެ އަޑުތަކުން މުޅި ސަރަހައްދު ގުގުމާލި ކަމަށް މީޑިއާ ރިޕޯޓުތައް ބުނެއެވެ. މިކަމާ ގުޅިގެން ސަތޭކައަށް ވުރެ ގިނަ އާންމުން ރައްކާތެރި މާހައުލުތަކަށް ބަދަލުކުރެވިފައިވާއިރު ކާބުލްގެ ޕޮލިސް ޗީފްގެ ތަރުޖަމާނު ފިރްދައުސް ވިދާޅުވީ އެ ސަރަހައްދުގެ ވަކިވަކި ގެތައް ބަލައި ފާސްކުރަމުންދާ ކަމަށެވެ. އެތަނުގައި ވެސް ހަނގުރާމަވެރި މީހުން ފިލާ ތިބުމުގެ ފުރުސަތު އެބަ އޮތް ކަމަށް އޭނާ ވިދާޅުވިއެވެ.

މި ހަމަލާތަކުގެ ސަބަބުން ދިހަ މީހަކަށް އެކިވަރުގެ އަނިޔާތައް ލިބި ހޮސްޕިޓަލަށް ގެންދެވުނުކަމަށް ހެލްތް މިނިސްޓްރީން ބުނެއެވެ. މި ހަމަލާތަކުގެ ޒިންމާ މިހާތަނަށް އެއްވެސް ބަޔަކު ނަގާފައެއް ނުވެއެވެ.

އަފްޣާނިސްތާނުގެ ދާޚިލީ ހަނގުރާމަ ހޫނުވެފައިވަނީ އެ ގައުމުގައި ތިބި އެމެރިކާ ސިފައިން ފައިބަން ފެށުމާ ގުޅިގެންނެވެ. އަފްޣާނިސްތާނުގެ 50 އިންސައްތަ ސަރަޙައްދުތައް އޮތީ ޠާލިބާން ޖަމާޢަތުގެ ބާރުގެ ދަށުގައިކަމަށް އެމެރިކާއިން ވަނީ ބުނެފައެވެ.

އެމެރިކާގެ ދިފާޢީ ވުޒާރާގައި ބޭއްވި ނޫސްވެރިންގެ ބައްދަލުވުމުގައި ޖޮއިންޓު ޗީފް އޮފް ސުޓާފުގެ ޗެއާމަން ޖެނެރަލް މާކު މިލީ ވިދާޅުވީ އަފްޣާނިސްތާނުގައި ޠާލިބާނުން ބޮޑެތި ކުރިއެރުންތަކެއް ހޯދަމުންދާކަމަށެވެ. އެ ގޮތުން އަފްޣާނިސްތާނުގައި ޙަރަކާތްތެރިވާ ބޭރުގެ ފައުޖުތައް އެ ގައުމުން ފައިބަމުންދާ ދަނޑިވަޅެއްގައި ޠާލިބާނުންގެ ޙަމަލާތައް ވަރަށް ބޮޑަށް އިތުރުކޮށް ވަރުގަދަކޮށްފައިވާކަމަށާއި މުހިންމު ސަރަޙައްދީ ރޮނގުތައް ވެސް އޮތީ އެ ޖަމާޢަތުގެ ބާރުގެ ދަށުގައިކަމަށް ޖެނެރަލް މިލީ ވިދާޅުވިއެވެ. އަދި އަފްޣާނިސްތާނުގެ 419 ޑިސްޓްރިކްޓްގެ ތެރެއިން 200 ޑިސްޓްރިކްޓް އޮތީ ޠާލިބާނުންގެ ބާރުގެ ދަށުގައިކަމަށް އޭނާ ވިދާޅުވިއެވެ.

20 އަހަރު ދުވަހަށްފަހު އެމެރިކާގެ އިތުރުން ހުޅަނގުގެ އަސްކަރީ އިއްތިހާދު، ނޭޓޯއިންވަނީ އަފްޣާނިސްތާނުން ފޭބުމުގެ މަސައްކަތް ފަށައިފައެވެ. އެ ގޮތުން ނޭޓޯގެ ފައުޖުތަކުގައި ހިމެނޭ އިނގިރޭސިވިލާތާއި ޖަރުމަންވިލާތާއި އިޓަލީވިލާތުގެ ސިފައިންވަނީ އަފްޣާނިސްތާނުން ފައިބައިފައެވެ. އަދި އަންނަ އޮގަސްޓު މަސް ނިމުމުގެ ކުރިން އަފްޣާނިސްތާނުން ފޭބުމުގެ މަސައްކަތް އެމެރިކާގެ ސިފައިން ވެސް ވަނީ ފަށާފައެވެ.

އެގޮތުން އަފްޣާނިސްތާނުގެ ކަންދަހާރުގައި ގާއިމުކޮށްފައިވާ އެމެރިކާގެ އަސްކަރީ މަރުކަޒު ވެސް ވަނީ އަފްޣާނިސްތާނުގެ ސަލާމަތީ ބާރުތަކާ ހަވާލުކޮށްފައެވެ. އަފްޣާނިސްތާނުގައި އެމެރިކާގެ ސިފައިން މިހާރު ޙަރަކާތްތެރިވަނީ ވެރިރަށް ކާބުލްގެ އިތުރުން އެ ގައުމުގެ ބައިނަލްއަގްވާމީ ވައިގެ ބަނދަރުގެ ސަލާމަތީ ކަންކަން ބެލެހެއްޓުމުގެ މަސައްކަތުގައި އެކަންޏެވެ.

ބޭރުގެ ފައުޖުތަކުން އަފްޣާނިސްތާނުން ފައިބަމުންދާ ދަނޑިވަޅެއްގައި ޠާލިބާން ޖަމާޢަތުގެ ހަނގުރާމަވެރިންގެ ބާރުވަނީ ވަރުގަދަކޮށްފައެވެ. ޠާލިބާނުންވަނީ އަފްޣާނިސްތާނުން ޕާކިސްތާނާއި ތަޖަކިސްތާނާއި އުޒުބެކިސްތާނާއި އީރާނަށް ދެވެން އޮންނަ މައިމަގުތަކާއި ސަރަހައްދީ ރޮނގުތައް އެ ޖަމާއަތުގެ ބާރުގެ ދަށަށް ގެނެސްފައެވެ. ޠާލިބާނުން ބުނާ ގޮތުގައި އަފްޣާނިސްތާނުގެ 85 އިންސައްތަ ސަރަޙައްދުތައް އޮތީ އެ ޖަމާޢަތުގެ ބާރު ދަށުގައެވެ.