އަތޮޅު ފެރީ އުޅަނދުފަހަރު ލަފައި ފުރާ ސަރަހައްދުގައި ޓެކްސީ މަޑުކުރުމަށް ޚާއްޞަ ތަނެއް ހެދުމުގެ މަސައްކަތް ފަށައިފި
4 އޯގަސްޓު 2021 | ބުދަ 01:50މިސަރަހައްދުގައި ތަރުތީބެއް ނެތުމުގެ ސަބަބުން ލަފާ ފުރާ މީހުންނަށް ގިނަ ދަތިތައް ކުރިމަތިވަމުންދޭ
ޓެކްސީ މަޑުކުރާނެ ޖާގައެއް ހެދުމުގެ މަސައްކަތުގެ ތެރެއިން
މާލޭގެ އުތުރުފަރާތުން އަތޮޅުތަކަށް ދަތުރުކުރާ ފެރީ އުޅަނދުފަހަރު ލަފައި ފުރާ ސަރަހައްދުގައި ޓެކްސީ މަޑުކުރާނެ ޖާގައެއް ހެދުމުގެ މަސައްކަތް މާލޭ ސިޓީ ކައުންސިލުން ފަށައިފިއެވެ.
އަންގާރަ ދުވަހު ފެށި މި މަސައްކަތާ ބެހޭ ގޮތުން ސިޓީ ކައުންސިލުން ބުނީ މި ސަރަހައްދަކީ ގިނަ ބަޔަކު ލަފައި ފުރާ ސަރަހައްދެއް ކަމަށާއި، މިތަނުގެ ތަރުތީބެއް ނެތުމުގެ ސަބަބުން ލަފައި ފުރާ މީހުންނާއި އަދި ވެހިކަލް ދުއްވާ މީހުންނަށް ވެސް ދަތިތަކާ ކުރިމަތިވަމުންދާ ކަމަށެވެ. އަދި ނުރައްކާތެރި ހާދިސާއެއް ހިނގުމަށް ވެސް މަގުފަހިވާނެ ކަމަށް ފެންނާތީ އެކަންކަން ހައްލުކޮށް ފަސޭހަ އިންތިޒާމްތަކެއް ހަމަޖެއްސުމުގެ ބޭނުމުގައި ފެށި މަސައްކަތެއް ކަމަށް ކައުންސިލުން ބުނެއެވެ.
ޓެކްސީ މަދުކުރާނެ ޖާގަ ހަދަނީ މާލޭގެ އުތުރުފަރާތުން އިއްޒުއްދީން ފާލަމުގެ ހުޅަނގުން މޯލްޑިވްސް މަނިޓަރީ އޮތޯރިޓީ (އެމްއެމްއޭ)އިން ކުރިމައްޗަށް ވާގޮތަށް އޮންނަ ސަރަހައްދުގައެވެ. ކައުންސިލުން ބުނީ އަތޮޅުތަކުން މާލެ އަންނަ އަދި ރަށްރަށަށް ފުރާ ގިނަ މީހުން ބޭނުންކުރަނީ މިތަނުގައި އޮންނަ ތޮށި ކަމަށެވެ. އެގޮތުން އެކިއެކި ބަންދުތަކާ ގުޅިގެން މި ސަރަހައްދަށް ބާރުބޮޑުވެ ތޮއްޖެހުން އިތުރުވެގެންދާ ކަމަށާއި، މަގު ތޮއްޖެހި، މީހުން ޓެކްސީތަކަށް އެރުމުގައި ދަތިތަކާ ކުރިމަތިވާ ކަމަށެވެ. އަދި ޓެކްސީތައް މަޑުކުރުމުގައި ވެސް ދަތިތަކާ ކުރިމަތިވަމުންދާކަން ކައުންސިލުން ފާހަގަކުރިއެވެ.
މާލޭގެ އެކި ސަރަހައްދުގައި އެކި ކަންކަމަށް ހަރަކާތްތެރިވާ ފަރާތްތްކަށް ފަސޭހަ ގޮތްތައް ހަމަޖެއްސުމަށް މާލޭ ސިޓީ ކައުންސިލުން ދަނީ މަސައްކަތްކުރަމުންނެވެ. އެގޮތުން ޕާކިންގް ޒޯންތައް ހަދައި މަގުތައް ތަރުތީބުކުރުމުގެ މަސައްކަތްތައް ވެސް ކުރަމުންދާކަން ފާހަގަކުރެވެއެވެ.
