ފެނާއި ކަރަންޓު ބިލްތަކަށް 172.7 މިލިއަން ރުފިޔާގެ ޑިސްކައުންޓް ދީފި

ކޮވިޑް-19ގެ ސަބަބުން އާންމުންގެ ދިރިއުޅުމަށް އައި ލޮޅުމަށް އެހީތެރިވުމުގެ ގޮތުން ސަރުކާރުން ފޯރުކޮށްދިން ސަބްސިޑީގެ އެހީގައި އާންމު ގޭބީސީތަކުގެ ފެން އަދި ކަރަންޓު ބިލްތަކަށް ވަނީ ޑިސްކައުންޓް ދީފައެވެ.

ފިނޭންސް މިނިސްޓްރީން އާންމުކޮށްފައިވާ އެންމެ ފަހުގެ މައުލޫމާތުތައް ދައްކާގޮތުން ޖޫން މަހުގެ ނިޔަލަށް ކަރަންޓު ބިލް ތަކުން 146.7 މިލިއަން ރުފިޔާގެ ޑިސްކައުންޓް ވަނީ ދީފައެވެ. އަދި ފެން ބިލް ތަކުން 26 މިލިއަން ރުފިޔާގެ ޑިސްކައުންޓް ވަނީ ދީފައެވެ.

ތަފާސްހިސާބުތައް ދައްކާގޮތުން 276,203 ގޭބީސީއެއްގެ ކަރަންޓު ބިލަށް ވަނީ ޑިސްކައުންޓް ދީފައެވެ. އެއީ ފެނަކަ ކޯޕަރޭޝަނުން 137,584 ގޭބީސީއަށް 61.7 މިލިއަން ރުފިޔާގެ ޑިސްކައުންޓް، އެމްޑަބްލިއުއެސްސީ އިން 2,093 ގޭބީސީއަށް 8 ލައްކަ ރުފިޔާގެ ޑިސްކައުންޓްގެ އިތުރުން ސްޓެލްކޯ އިން 136,526 ގޭބީސީއަށް 84.2 މިލިއަން ރުފިޔާގެ ޑިސްކައުންޓެވެ.

އޭގެ އިތުރުން 110,966 ގޭބީސީއެއްގެ ފެން ބިލަށް ވަނީ ޑިސްކައުންޓް ދީފައެވެ. އެގޮތުން ފެނަކަ އިން 25,661 ގޭބީސީއަށް 6 ލައްކަ ރުފިޔާގެ ޑިސްކައުންޓް، އެމްޑަބްލިއުއެސްސީ އިން 84,187 ގޭބީސީއަށް 25.2 މިލިއަން ރުފިޔާގެ ޑިސްކައުންޓް އަދި ސްޓެލްކޯ އިން 1,118 ގޭބީސީއަށް 2 ލައްކަ ރުފިޔާގެ ޑިސްކައުންޓް ވަނީ ދީފައެވެ.

މުޅި ރާއްޖޭގެ ހުރިހާ ހިސާބެއްގެ ފެންބިލާއި ކަރަންޓު ބިލުން ބޮޑެތި ލުއިތަކެއް ދެ ވަނަ ފަހަރަށް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ޞާލިޙް ނިންމަވައި އެކަން އިއުލާނުކުރައްވާފައި ވަނީ މެއި 25 ވަނަ ދުވަހުއެވެ. އެގޮތުން މުޅި ރާއްޖޭގެ ހުރިހާ ރަށެއްގެ ފެންބިލުން 30 އިންސައްތައިގެ ޑިސްކައުންޓެއް އަދި ވިޔަފާރިތަކުގެ ފެންބިލުން 20 އިންސައްތައިގެ ޑިސްކައުންޓެއް ދެއްވިއެވެ. ރާއްޖޭގެ ހުރިހާ ރަށަކުން ކަރަންޓު ބިލުން 40 އިންސައްތައިގެ ޑިސްކައުންޓެއް ދެއްވާފައިވާއިރު، ވިޔަފާރިތަކަށް 20 އިންސައްތައިގެ ޑިސްކައުންޓެއް ވަނީ ދެއްވާފައެވެ.

ކޮވިޑް-19ގެ ސަބަބުން އާމްދަނީއަށް ކުރި އަސަރާއެކު ރައްޔިތުންނަށް އެހީތެރިވުމުގެ ގޮތުން އެންމެ ފުރަތަމަ ފެން އަދި ކަރަންޓު ބިލްތަކުން ޑިސްކައުންޓް ދިނުމަށް ނިންމާ އެކަން އިއުލާންކޮށްފައި ވަނީ މިދިޔަ އަހަރުގެ ޖުލައި މަހު އެވެ. އެފަހަރު ކަރަންޓު ބިލުން 40 އިންސައްތައިގެ ޑިސްކައުންޓެއް އަދި ފެން ބިލުތަކުން 30 އިންސައްތައިގެ ޑިސްކައުންޓެއް ވަނީ ދީފައެވެ. އަދި ބިލްތައް ދައްކަން ދަތިވާ އާންމު ފަރުދުންނާއި، ވިޔަފާރިތަކަށް އެކި މަސް މަހަށް ބަހާލައިގެން ބިލަށް ފައިސާ ދެއްކުމުގެ ފުރުސަތު ވެސް ވަނީ ދީފައެވެ.