ފައިމަގުގައި އުޅުމަށް ކަނޑައަޅާފައިވާ ވަގުތުގައި ކޮންމެ ޓެކްސީ ސެންޓަރަކަށް ދޫކުރާނީ 2 ސްޓިކާ
20 ޖުލައި 2021 | އަންގާރަ 09:05މިވަގުތުގައި ވެހިކަލް ދުއްވޭނީ ހުއްދަ ލިބިފައިވާ ފަރާތްތަކަށް
މާލެ، ވިލިމާލެ އަދި ހުޅުމާލޭގައި ހަވީރު 4:00ން ރޭގަނޑު 8:00ށް ހިނގާފައި އުޅޭ ގޮތަށް ވަނީ ހަމަޖައްސާފައި
ފައިމަގުގައި އުޅުމަށް ކަނޑައަޅާފައިވާ ވަގުތުގައި ކޮންމެ ޓެކްސީ ސެންޓަރަކަށް ދޫކުރާނީ 2 ސްޓިކާ ކަަމަށް މާލެ ސިޓީ ކައުންސިލުން ބުނެފިއެވެ.
ސިޓީ ކައުންސިލުން ބުނީ ސްޓިކާ ދޫކުރަމުން ދާނީ މެންދުރު 01:00ން މެންދުރުފަހު 03:00ށް ބޮޑުތަކުރުފާނު މަގުގައި ހުންނަ މާލޭ ސިޓީ ކައުންސިލްގެ އާންމު ޚިދުމަތްތަކާ ބެހޭ އޮފީހުން ކަމަށެވެ.
އަޟްހާ އީދު ދުވަހުގެ ހަވީރު 4:00ން ރޭގަނޑު 8:00ށް މާލެ ސިޓީގައި ހިނގާފައި އުޅޭ ގޮތަށް ނިންމާފައިވާއިރު މިކަމާ ގުޅިގެން މާލެ ސިޓީ ކައުންސިލްގައި ބޭއްވި ނޫސްވެރިންގެ ބައްދަލުވުމުގައި މޭޔަރު ޑރ. މުހައްމަދު މުއިއްޒު ވިދާޅުވީ މާލެ އަކީ ތޮއްޖެހިފައިވާ ތަނަކަށްވާއިރު، މިފަދަ ދުވަހެއްގައި އާއިލާއާއެކު ބޭރަށް ނުކުމެ ހިނގާލަން ބޭނުންވާ އާއިލާތައް ވަރަށް ގިނަ ކަމަށެވެ. އަދި ކޮވިޑް-19އާ ގުޅިގެން އަޅާފައިވާ ފިޔަވަޅުތަކަށް ބޮޑެތި ލުއިތަކެއް ދީފައިވާއިރު، ވެހިކަލްގެ ބިރެއް ނެތި ބޭރުގައި އުޅުމުގެ ފުރުސަތު ގިނަ ބަޔަކު ބޭނުންވާކަން މޭޔަރު ފާހަގަކުރެއްވިއެވެ.
މީގެ އިތުރުން މުއިއްޒު ވިދާޅުވީ އެވަގުތުގައި ވެސް ބަލިން ރައްކާތެރިވުމަށް އަޅަންޖެހޭ ފިޔަވަޅުތައް އަޅަން ޖެހޭ ކަމަށެވެ. އެގޮތުން މާސްކް އެޅުމާއި، އިޖުތިމާއީ ގައިދުކުރުކަމަށް ޚާއްސަ ސަމާލުކަމެއް ދިނުމަށް މުއިއްޒު އިލްތިމާސްކުރެއްވިއެވެ.
މާލެ، ވިލިމާލެ އަދި ހުޅުމާލޭގައި ހަވީރު 4:00ން ރޭގަނޑު 8:00ށް ހިނގާފައި އުޅޭ ގޮތަށް ނިންމާފައިވާއިރު، މިވަގުތުގައި ވެހިކަލް ދުއްވޭނީ ހުއްދަ ލިބިފައިވާ ފަރާތްތަކަށެވެ. އެ ވަގުތު ފުލުހުން މަގުމަތީގައި ހަރަކާތްތެރިވަމުން ދާނެ ކަމަށާއި، ގަވާއިދާ ހިލާފަށް އުޅޭ ފަރާތްތަކާ މެދު ފިޔަވަޅުއަޅާނެއެވެ.
މީގެ ކުރިން ވެސް އީދު ދުވަސްތަކާ ގުޅިގެން މާލެ އަދި ވިލިމާލޭގައި ހިނގާފައި އުޅޭ ގޮތަށް ހަމަޖައްސާފައިވެއެވެ. މިގޮތަށް ހަމަޖައްސަނީ މާލޭގެ މަގުތައް ކާރޫބާރުބޮޑު މަގުތަކަކަށް ވެފައި އީދުގެ އުފާ ފާޅުކުރުމުގެ ގޮތުން ގިނަ އަދަދަކަށް މުސްކުޅިންނާއި ކުޑަކުދިން އީދު ކުޅިވަރުތަކުގައި ބައިވެރިވުމަށް މާލޭގެ މަގުތަކަށް ނިކުމެ އުޅޭ ވަގުތު މީހަކަށް ގެއްލުމެއް ލިބިދާނެތީއެވެ. އަދި އާއިލާއެކު އުފާވެރި މަޖާ ވަގުތު ކޮޅެއް ހޭދަކުރުމުގެ ފުރުސަތު ފަހި ކޮށްދިނުމުގެ ގޮތުންނެވެ.
