އިންޑިޔާގެ މަޝްހޫރު ފޮޓޯ ޖަރނަލިސްޓް ދާނިޝް ސިއްދީގީ އަފްޣާނިސްތާނުގައި މަރާލާއިފި

ރޮއިޓަރސް ގައި މަސައްކަތްކުރަމުން އަންނަ މަޝްހޫރު ފޮޓޯ ޖަރނަލިސްޓް ދާނިޝް ސިއްދީގީ އަފްޣާނިސްތާނުގައި މިހާރު ހިނގަމުންދާ ހަނގުރާމަ ކަވަރުކުރަމުންދަނިކޮށް މަރާލައިފިއެވެ.

ރޮއިޓަރސް ގައި އަފްޣާނިސްތާނުގެ ކޮމާންޑަރަކާއި ހަވާލާދީ ރިޕޯޓްކޮށްފައިވާ ގޮތުގައި އިންޑިޔާއަށް ނިސްބަތްވާ ދާނިޝް ސިއްދީގީ މަރާލާފައިވަނީ ޕާކިސްތާނު ބޯޑަރާއި ކައިރި ސަރަހައްދެއްގައި ތާލިބާނުންނާއި އަފްޣާނިސްތާނުގެ ސިފައިންނާ ދެމެދު ކުރިޔަށްދިޔަ ހަމަލާ ބަދަލުކުރުންތަކުގެ ތެރޭގައެވެ.

އަފްޣާނިސްތާނުގެ ސިފައިން މަސައްކަތް ކުރަމުންދިޔައީ ތާލިބާންގެ އަތްދަށުގައިވާ ސްޕިން ބޮލްޑަކް ސަރަހައްދު އަފްޣާންގެ އަސްކަރިއްޔާގެ ދަށަށް ގެނައުމަށްޓަކައެވެ. ރޮއިޓަރސްގައި އޮފިޝަލާއި ހަވާލާދީ ބުނެފައިވަނީ ސިއްދީގީއާއެކު އަފްޣާނިސްތާނުގެ ސީނިއަރ އޮފިސަރުންތަކެއްވެސް ތާލިބާނުން ދިން ހަމަލާގައި މަރުވެފައިވާކަމަށެވެ.

އަފްޣާނިސްތާނުގައި ހިނގަމުންދާ ހަނގުރާމަ ކަވަރުކުރުމަށް ސިއްދީގީ ހަމަޖެއްސީ ނިމެމުންމިދާ ހަފްތާގެ ކުރީކޮޅުއެވެ. ސިއްދީގީ މަސައްކަތްކުރަމުން އަންނަނީ ކަންދަހާރުގެ ދެކުނުގައިވާ ޕްރޮވިންސެއްގައި އަފްޣާނިސްތާނުގެ އަސްކަރިއްޔާއާއެކުއެވެ. ހަމަލާބަދަލުކުރުންތަކުގެ ތެރޭގައި ސިއްދީގީ މަރުވުމާއި ގުޅިގެން ރޮއިޓަރސްގެ ރައީސް މައިކަލް ފްރެޑިންބާގު ނެރެފައިވާ ބަޔާނެއްގައި ބުނެފައިވަނީ އެސަރަހައްދުގެ ކަމާބެހޭ ފަރާތްތަކާ ގުޅިގެން އިތުރު މައުލޫމާތު ހޯދަމުން އަންނަކަމަށެވެ.

"ދާނިޝް ސިއްދީގީއަކީ ކުޅަދާނަ ނޫސްވެރިއެއް، އެހާމެ ރަނގަޅު ފިރިޔެއް އަދި ބައްޕައެއް، އެންމެންގެ ލޯބި ލިބިފައިވާ މީހެއް. އަހަރުމެންގެ ދުއާ މިވަގުތު ވަނީ ދާނިޝް ސިއްދީގީ އާއި އޭނާގެ އާއިލާއާއެކު." ބަޔާނުގައި އިތުރަށް ބުނެފައިވެއެވެ.

ސިއްދީގީގެ މަރުގެ ޚަބަރާއެކު އަފްޣާނިސްތާނުގެ ރައީސް އަޝްރަފް ޣަނީވެސް ވަނީ ބަޔާނެއް ނެރުއްވާފައެވެ. އެބަޔާނުގައި ވިދާޅުވެފައިވަނީ "ސިއްދީގީގެ މަރުގެ ޚަބަރު އަޑުއެހީ ފުން ހިތާމައާއެކު, އާއިލާއަށް ތައުޒިޔާ ދަންނަވަން" އެވެ.

ރޮއިޓަރސް އިން ރިޕޯޓްކޮށްފައިވާ ގޮތުގައި ސިއްދީގީ ވަނީ ހުކުރު ދުވަހުގެ ކުރީކޮޅު ބަދަލުކުރި ހަމަލާތަކެއްގައި ޒަޚަމްވެފައެވެ. ނަމަވެސް ފަރުވާދިނުމަށްފަހު ރަނގަޅުވެފައިވާކަމަށް އޭނާ ބުނިކަމަށް ރޮއިޓަރސް އިން ވަނީ ރިޕޯޓްކޮށްފައެވެ. ސިއްދީގީ މަރާލާފައިވަނީ އޭގެ ފަހުން ތާލިބާނުން ދިން ހަމަލާތަކެއްގައެވެ.

އަފްޣާނިސްތާނުގެ ކޮމާންޑަރ ބުނެފައިވަނީ ތާލިބާނުން ހަމަލާދިންއިރު ސިއްދީގީ ހުރީ ފިހާރައިގެ ސޭޓުންތަކަކާއި ވާހަކަދައްކާށެވެ.

ރޮއިޓަރސް އިން ބުނެފައިވަނީ ލިބިފައިވާ މިމައުލޫމާތުގެ ތެދު ދޮގު އަދި ބެލިފައިނުވާކަމަށެވެ. އަފްޣާނިސްތާނުގެ ޑިފެންސް މިނިސްޓްރީން ބަޔާނެއް ނެރުމުގެ ކުރިން ރޮއިޓަރސް އަށް މައުލޫމާތު ދީފައިވާ އަފްޣާނިސްތާނުގެ އޮފިޝަލްގެ ނަން ހާމަކުރުމަށް އޭނާ އިންކާރުކޮށްފައިވާ ކަމަށް ރޮއިޓަރސްއިން ބުނެއެވެ.

ސިއްދީގީގެ މަރާގުޅިގެން ތާލިބާންގެ ސްޕޯކްސްމަން ޒަބީހުﷲ މުޖާހިދު ބުނެފައިވަނީ ހަނގުރާމަ ހިނގަމުންދިޔަ ސަރަހައްދުގައި ނޫސްވެރިއަކު ހަރަކާތްތެރިވަމުންދިޔަ ކަން އެމީހުންނަށް ނޭނގޭކަމަށެވެ. އަދި ކުރިޔަށްދިޔައީ ވަރަށް ވަރުގަދަ ކުރިމަތިލުންތަކެއް ކަމަށާއި އެހެންކަމުން ސިއްދީގީ މަރުވި ގޮތް ސާފުނުވާކަމަށް ވަނީ ބުނެފައެވެ.

ސިއްދީގީ ދިޔައީ 2010 ވަނަ އަހަރުން ފެށިގެން ރޮއިޓަރސްގައި ފޮޓޯ ޖަރނަލިސްޓެއްގެ ގޮތުގައި ހަރަކާތްތެރިވަމުންނެވެ. އޭނާވަނީ އިރާގާއި އަފްގާނިސްތާން ފަދަ ގައުމުތަކުގައި ހިނގާ ހަނގުރާމަތައް ކަވަރު ކުރުމުގައި ހަރަކާތްތެރިވެފައެވެ. ހަމައެއާއެކު ރޮހިންގްޔާ ރެފިޔުޖީންގެ ހާލަތު ކަވަރުކުރުމުގައިވެސް ހަރަކާތްތެރިވި ރޮއިޓަރސްގެ ޓީމާއެކު އޭނާ ވަނީ މަސައްކަތްކޮށްފައެވެ. މިފޮޓޯތަކުގެ ސަބަބުން އޭނާ ވަނީ 2018 ވަނަ އަހަރު ޕުލިޒަރ ޕްރައިޒް ހޯދާފައެވެ. ޕުލިޒަރ ޕްރައިޒް އަކީ ނޫސްވެރިކަމާއި އާރޓާއި މިޔުޒިކާ ގުޅުންހުރި ކަންކަމުގައި ފާހަގަކޮށްލެވޭ ފަރާތްތަކަށް ދޭ ޕްރައިޒެކެވެ. 1917 ވަނަ އަހަރުން ފެށިގެން މިޕްރައިޒް އަންނަނީ ދެމުންނެވެ.

ރޮހިންގްޔާ ރެފިޔުޖީ ކޭމްޕްގެ ހާލަތު ދައްކުވައިދޭ މިފޮޓޯތަކަކީ އެމީހުންގެ ހާލަތު ދުނިޔެއަށް ވަރަށް ރަނގަޅަށް ދައްކުވައިދިން ފޮޓޯތަކެއްގެ ގޮތުގައި ޖަޖުންގެ ކޮމިޓީން ވަނީ ބުނެފައެވެ.

މީގެއިތުރުން މިފަހުން ސިއްދީގީގެ އެންމެ ފާހަގަކޮށްލެވުނު މަސައްކަތަކީ ކޮވިޑް-19ގެ ތެރޭގައި އިންޑިއާގައި އޭނާކޮށްފައިވާ މަސައްކަތެވެ. އިންޑިޔާއަށް ކުރިމަތިވި ކޮވިޑްގެ ނުރައްކާތެރި ދެ ވަނަ ރާޅުގެ ހާލަތު ދުނިޔެއަށް ގެނެސްދިނުމަށް އޭނާ ނަގާފައިވާ ފޮޓޯތަކަކީ އަދިވެސް ގިނަ ބަޔެއްގެ ސަމާލުކަން ލިބެމުން އަންނަ ފޮޓޯތަކެކެވެ.

ތާލިބާނު ހަނގުރާމަވެރިންގެ ކޮންޓްރޯލްގެ ދަށަށް ދިޔަ ސަރަހައްދެއްގައި ޒަޚަމްތަކަކާއެކު ތާށިވެ ހުރެ އެހީއަށް އެދުނު އަފްޣާނު ފުލުހަކު ސަލާމަތްކުރުމަށްޓަކައި އަފްޣާނިސްތާނުގެ ސަލާމަތީ ބާރުތަކުން ދާދި ފަހުން ހިންގި ޚާއްސަ އޮޕަރޭޝަނެއްގައި ސިއްދީގީ ވަނީ ބައިވެރިވެފައެވެ. ކަންދަހާރުގެ ރަށްބޭރުގައި ހިންގި މި މިޝަން ހިނގައިދިޔަ ގޮތް ސިއްދީގީ ވަނީ އޭނާގެ ޓްވިޓާގައި ޑޮކިއުމެންޓުކޮށް, އަދި ރޮއިޓާޒްގައި މިކަމާއި ބެހޭގޮތުން ލިޔެފައެވެ.

އަފްޣާނިސްތާނުގައި ހިނގަމުންދާ ހަނގުރާމައިގައި 2018 ވަނަ އަހަރުން ފެށިގެން 2021 ވަނަ އަހަރުގެ މިހާތަނަށް 33 ނޫސްވެރިން މަރާލާފައިވާކަމަށް އދން ވަނީ ބުނެފައެވެ.

2018 ވަނަ އަހަރުގެ އޭޕްރީލް މަހުގެ 30 ވަނަ ދުވަހު އެކަނިވެސް 10 ނޫސްވެރިން މަރާލާފައިވެއެވެ. އޭގެތެރޭގައި ނުވަ ނޫސްވެރިންނާއި ފޮޓޯގްރާފަރެއް ހިމެނެއެވެ. އެއީ ކާބުލްގައި ދިން ހަމަލާއެއްގައެވެ. އެދުވަހަކީ 2001 ވަނަ އަހަރުން ފެށިގެން އަފްޣާނިސްތާނުގައި އެމެރިކާގެ ސިފައިން ކުރިޔަށްގެންދާ ހަނގުރާމައިގައި އެންމެ ގިނަ ނޫސްވެރިން މަރާލި ދުވަހެވެ.