ދެކުނު އޭޝިއާގެ މަސައްކަތްތެރިން ކަރަންޓީންވާން 3 ހޮޓަލެއް
ވެކްސިންގެ ދެ ޑޯޒް ފުރިހަމަ ނުކުރާނަމަ 14 ދުވަހުގެ ކަަރަންޓީން މުއްދަތު ފުރިހަމަކުރަން ޖެހޭ
ގިޔާސުއްދީން ކުރިމަތީގައި ބިދޭސީން މުޒާހަރާ ކުރުން
ދެކުުނު އޭޝިއާގެ ގައުމުތަކުން ރާއްޖެ އަންނަ ބިދޭސީ މަސައްކަތްތެރިން ކަރަންޓީންވާ ތިން ހޮޓަލެއް ހާއްސަކޮށްފިއެވެ.
ދެކުނު އޭޝިއާގެ ރައްޔިތުންގެ ތެރެއިން ރާއްޖޭގެ ވޯކް ޕާމިޓް އޮންނަ ފަރާތްތަކަށް ރާއްޖެ އައުމުގެ ފުރުސަތު މިހާރު ހުޅުވާލާފައިވާއިރު، ރާއްޖެއަށް އެތެރެވުމުގެ ކުރިން 96 ގަޑިއިރުނުވާ ޕީސީއާރު ނެގެޓިވް ނަތީޖާއެއް ބޭނުންވާނެއެވެ. އަދި މަސައްކަތްތެރިން ރާއްޖެ އައިސް ކަރަންޓީންގެ މުއްދަތު ފުރިހަމަކުރަންޖެހެއެވެ.
އެގޮތުން ވެކްސިންގެ ދެ ޑޯޒް ފުރިހަމަ ނުކުރާނަމަ 14 ދުވަހުގެ ކަަރަންޓީން މުއްދަތު ފުރިހަމަކުރަން ޖެހޭއިރު، ވެކްސިންގެ ދެ ޑޯޒް ފުރިހަމަކޮށްފައިވާ ފަރާތްތަކަށް ވަނީ ލުއިދީފައެވެ. އެގޮތުން ދުނިޔޭގެ ސިއްހަތު ޖަމުޢިއްޔާއިން ހުއްދަ ދީފައިވާ ވެކްސިންތަކުގެ ތެރެއިން ވެކްސިނެއްގެ ދެ ޑޯޒް ފުރިހަމަކޮށް 14 ދުވަސް ހަމަވެފައިވާނަމަ ފުރިހަމަ ކުރަންޖެހޭނީ ހަތް ދުވަހުގެ ކަރަންޓީންގެ މުއްދަތެކެވެ. ކަރަންޓީންގެ މުއްދަތު ހަމަވުމުން ޕީސީއާރު ޓެސްޓު ހަދަންޖެހޭ އިރު، ކަރަންޓީނުން ނުކުމެވޭނީ އެ ޓެސްޓުގެ ނަތީޖާ ނެގަޓިވް ވުމުންނެވެ.
ބިދޭސީ މަސައްކަތްތެރިން ރާއްޖެއަށް ދަތުރުކުރުމުގެ ކުރިން ބިދޭސީ މަސައްކަތްތެރިޔާ އަމިއްލައަށް ނުވަތަ މަސައްކަތްތެރިޔާއާ ޒިންމާވާ ފަރާތުން އިމިގްރޭޝަންގެ "އިމުގާ" ޕޯޓަލްގަައި މައުލޫމާތު ފުރިހަމަކޮށް ދަތުރުކުރުމުގެ 24 ގަޑިއިރު ކުރިން ކަރަންޓީންވުމަށް އެދި އެޗްއީއޯސީ އަށް ހުށަހަޅަންޖެހެއެވެ.
ބިދޭސީ މަސައްކަތްތެރިން ރާއްޖެ އައިސް ކަރަންޓީން ވުމަށް ކަނޑައަޅާފައިވާ ތިން ހޮޓަލަކީ "ބީހައިވް ހޮޓަލް"، "ތްރީ އިން" އަދި "ވައިޓް ހާޕް" އެވެ.
