ރައީސް ޞާލިހަށް ދެ ދައުރުދޭން އެމްޑީޕީއަށް މަޖުބޫރުވާނެ - މޫސަ

ކުރިއަށް އޮތް 2023 ވަނަ އަހަރަށް މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން ޕްރައިމަރީ އިލެކްޝަނެއް ބާއްވައިފިނަމަ ބަހާއި އަމަލާ ދިމާނުވާނެ ކަމަށާއި، ރައީސް އިބްރާހިމް މުހައްމަދު ޞާލިހަށް ދެ ދައުރު ދޭން ޕާޓީއަށް މަޖުބޫރު ވާނެ ކަމަށް އެމްޑީޕީގެ ކުރީގެ ޗެއަރ ޕަރސަން މޫސާ މަނިކު ވިދާޅުވެއްޖެއެވެ.

ރާއްޖެޓީވީގެ "ފަށާއިރު" ޕްރޮގްރާމްގައި ވާހަކަދައްކަވަމުން މޫސާ މަނިކު ވަނީ 2023 ވަނަ އަހަރަށް އެމްޑީޕީގައި ޕްރައިމަރީއެއް ބޭއްވިގެން ނުވާނެ ކަމަށް ވިދާޅުވެ، 2013 ވަނަ އަހަރު ރައީސް މުހައްމަދު ނަޝީދު ވާދަ ކުރެއްވިއިރު، އެއް ދައުރު ވެރިކަން ކުރެއްވި ބޭފުޅަކަށް ދެ ވަނަ ދައުރެއް ދޭން ޕާޓީން ނިންމާފައިވާނެކަން ފާހަގަކުރައްވާފައެވެ. އެނިންމުން އެގޮތަށް އޮވެ، އެމްޑީޕީގެ ޕްރައިމަރީއެއް ބާއްވައިފި ނަމަ ބަހާއި އަމަލާ ދިމާނުވާނެ ކަމަށް މޫސަ ވިދާޅުވިއެވެ.

އެ ޕްރޮގްރާމްގައި ވާހަކަދައްކަވަމުން މޫސަ ވަނީ ރައީސް ޞާލިހަށާއި ސަރުކާރަށް ތާއީދު ކުރައްވާ ކަމަށާއި ދުނިޔެއަށް މިހާރު ކުރިމަތިވެފައިވާ ހާލަތަށް ބަލާއިރު، ސަރުކާރުުގެ ދުވެލި ލަހެއް ނޫން ކަމަށް ވިދާޅުވެފައެވެ. އެގޮތުން ރާއްޖޭގެ އެކި ކަންކޮޅުތަކުގައި ތަރައްގީގެ މަޝްރޫއުތައް ނުހުއްޓި ކުރިއަށްދާކަން މޫސަ ފާހަގަކުރެއްވިއެވެ.

މޫސަ ވަނީ އެމްޑީޕީގެ އާންމު މެމްބަރުންނަކީ ހިތްވަރުގަދަ ބައެއް ކަމަށާއި ޕާޓީ ދެބައިވެ ރޫޅިގެންދާން އެ މެމްބަރުން ތަން ނުދޭނެ ކަމަށް ވިދާޅުވެފައެވެ. އަދި އެމްޑީޕީގެ އާންމު މެމްބަރުގެ ބޮޑު މެޖޯރިޓީއެއް ރައީސް ޞާލިހަށް ތާއީދު ކުރާ ކަމަށާއި އެކަން އެގޮތަށް ހިފެހެއްޓިއްޖެނަމަ ޕާޓީ ދެބައި ވެގެން ނުދާނެ ކަމަށް ވެސް މޫސަ ވިދާޅުވިއެވެ. އެހެން ނަމަވެސް ރައީސް ނަޝީދަށް ތާއީދު ކުރައްވާ ފަރާތްތަކުގެ ތެރެއިން ކޮންމެ ގޮތެއްވިޔަސް ރައީސް ނަޝީދު ވެރިކަމަށް ގެންނަން ބޭނުންވާ ފަރާތްތަކުގެ ސަބަބުން ޕާޓީއަށް ގޮންޖެހުންތަކާ ކުރިމަތިވާނެކަމަށް ވިދާޅުވިއެވެ.

އޭގެ އިތުރުން ރައީސް ނަޝީދާއި ރައީސް ޞާލިހްއާ ދެބޭފުޅުން އެއް ގަލަކަށް އަރާވަޑައިނުގަންނަވާ ކަމަށްވާނަމަ ކުރިއަށް އޮތް އިންތިޚާބު އެމްޑީޕީއަށް ކާމިޔާބު ނުކުރެއްވޭނެ ކަމަށާއި ކުރިއަށް އޮތްތަނުގައި ރައީސް ނަޝީދު ރާއްޖޭގެ ވެރިކަމަށް ނުކުމެވަޑައިގަންނަވަން ތާއީދު ނުކުރައްވާ ކަމަށް ވެސް އެ ޕްރޮގްރާމްގައި މޫސަ ވަނީ ވިދާޅުވެފައެވެ. އަދި ރައީސް ނަޝީދު ތާއީދު ނުކުރެއްވިއަސް، ރައީސް ޞާލިހްގެ ހިތްވަރާއި ސަރުކާރުގެ ބާރު އޮވެއްޖެނަމަ 2023 ވަނަ އަހަރުގެ އިންތިޚާބު ކާމިޔާބުކުރުމުގެ ފުރުސަތު ރައީސް ޞާލިހަށް އެބައޮތް ކަމަށް މޫސަ ވިދާޅުވިއެވެ. އަދި އެމްޑީޕީއަށް އެ ކާމިޔާބީ ދޭން ބޭނުންނުވާނަމަ ރައީސް ނަޝީދު ފަހަތަށް ޖެހިވަޑައިގަންނަވަން ޖެހޭނެ ކަމަށް ވިދާޅުވިއެވެ.

ރައީސް އަބްދުﷲ ޔާމީން ރާއްޖޭގައި ތަރައްގީގެ ގިނަ މަޝްރޫއުތައް ހިންގެވިކަމަށް ފާހަގަކުރައްވައި މޫސަ ވަނީ ރައީސް ޔާމީން ވެރިކަމުގައި ހުންނެވިއިރު، އެ މަނިކުފާނަށް ތާއީދުކުރެއްވި ކަމަށާއި އެހެން ނަމަވެސް އަލުން އެ މަނިކުފާނު ވެރިކަމަށް ގެންނަން ތާއީދު ނުކުރައްވާނެ ކަމަށް ވިދާޅުވެފައެވެ. ނަމަވެސް ދެވަނަ ފަހަރަށް ރައީސް ޔާމީން ރާއްޖޭގެ ވެރިކަމަށް އައުމުގެ ފުރުސަތު ބޮޑުކަމަށް ގަބޫލުކުރައްވާ ކަމަށް ވިދާޅުވިއެވެ. މޫސަ ވަނީ އަދިވެސް ރައީސް މައުމޫން އަބްދުލްގައްޔޫމުގެ ސިޔާސަތުތަކަށް ތާއީދު ނުކުރެއްވޭނެ ކަމަށް ވިދާޅުވެފައެވެ.