މަޖިލިސް އިދާރާ ގޮއްވާލާނެ ކަމުގެ އިންޒާރުދިން މީހާ ދޫކޮށްލައިފި

ރައްޔިތުންގެ މަޖިލީހުގެ އިދާރާ ގޮއްވާލާނެ ކަމުގެ އިންޒާރުދިން މީހާ އެއްމަސްދުވަހަށް ފަހު ފުލުހުންގެ ބަންދުން ދޫކޮށްލައިފިއެވެ.

ފޭސްބުކް ޕޯސްޓަކަށް މަޖިލިސް އިދާރާ ގޮއްވާލާނެ ކަމަށް ބުނެ ކޮށްފައިވާ ކޮމެންޓަކާ ގުޅިގެން އޭނާ ހައްޔަރުކުރީ މެއި މަހުގެ 28 ވަނަ ދުވަހުއެވެ. އޭނާ އަށް ދެފަހަރު ވަނީ 15 ދުވަހުގެ ބަންދުގެ މުއްދަތު ކޯޓުން ދީފައެވެ. އެ މައްސަލާގައި ހައްޔަރުކުރީ އުމުރުން 28 އަހަރުގެ ދިވެހި ފިރިހެނެކެވެ.

ފުލުހުން ބުނީ އޭނާ ދޫކޮށްލީ އެ މައްސަލައިގެ ތަހުގީގު ނިމިފައިވާތީ ޕްރޮސެކިއުޓާ ޖެނެރަލް އޮފީހާ މަޝްވަރާކުރުމަށް ފަހު ކަމަށެވެ. އެމީހާގެ ކޮމެންޓުގައިވާ ފަދައިން ތަނެއް ގޮއްވާލާނެ ކަމަށް ބުނުމަކީ ޓެރަރިޒަމްގެ އަމަލެއްގެ އިންޒާރު ދިނުމެވެ. އަދި އެއީ ގާނޫނީ ކުށެކެވެ. ގާނޫނުގައި "އިންޒާރުދިނުން" ގެ މާނައިގައި މުއާޞަލާތީ ވަސީލަތެއް ބޭނުންކޮށްގެން ނުވަތަ އެނޫންވެސް ޒަރީޢާއެއް މެދުވެރިކޮށް، ލިޔުމުން ނުވަތަ އަނގަބަހުން ދެވޭ އިންޒާރު ހިމެނެއެވެ. އެފަދަ ކަމެއް ކޮށްފި މީހެއްގެ އަދަބަކީ ހަތަރު އަހަރާއި ހައަހަރާ ދެމެދުގެ މުއްދަތަކަށް ޖަލަށްލުން ކަމަށް ވެސް ގާނޫނުގައި ބުނެފައި ވެއެވެ.

އެމީހާގެ އިންޒާރަށް ފަހު އޭރު ވަނީ ރައްޔިތުންގެ މަޖިލީސް އިދާރާގެ ސެކިއުރިޓީ ވެސް ވަރުގަދަކޮށްފައެވެ. އެ ދުވަސްވަރަކީ ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ޓެރަރިސްޓު ހަމަލާއާ ގުޅިގެން މާލެ ތެރެ ހަލަބޮލިވެ އެފަދަ ކަންކަމަށް ވަރަށް ބޮޑު ސަމާލުކަމެއް އެންމެންގެ ފަރާތުން ވެސް ލިބެމުން އައި ދުވަސްވަރެކެވެ. އަދި އޭގެ ފަހުން އަދިވެސް މަޖިލިސް އިދާރާއާއި އެ ނޫން ވެސް ބައެއް އެހެން ތަންތަނުގެ ސެކިއުރިޓީ ވަނީ ވަރުގަދަކޮށްފައެވެ.

މިފަދަ އިތުރު އިންޒާރެއް އަނެއްކާވެސް ޓުވިޓާގައި ފެންމަތިވެފައިވާއިރު، އެމީހާ އިންޒާރުދީފައިވަނީ ރާއްޖޭގައި ހުންނަ އިންޑިއާގެ ހައިކޮމިޝަން ގޮއްވާލާނެ ކަމަށެވެ. އަދި އެކަމަށް ވަކި ފިޔަވަޅެއް ފުލުހުންނާއި ރާއްޖޭގެ ކަމާބެހޭ އިދާރާތަކުން އަޅާފައި ނުވިނަމަވެސް ޓުވިޓަރއިން ވަނީ އެ އެކައުންޓު ސަސްޕެންޑް ކޮށްފައެވެ. އަދި އިންޑިއަން ހައިކޮމިޝަނުން އެދިގެން އެތަނުގެ ސެކިއުރިޓީވެސް އެމްއެންޑީއެފިން ވަނީ ވަރުގަދަކޮށްފައެވެ.