ނައިފަރުގައި ޒުވާނަކަށް އަނިޔާކުރި މައްސަލަ: ތިން ފުލުހަކު ވަޒީފާއިން ވަކިކޮށްފި
29 ޖޫން 2021 | އަންގާރަ 17:37މިފިޔަވަޅު އެޅުމަށް ނިންމާފައިވަނީ ޖޫން މަހުގެ 22ވަނަ ދުވަހު
ޅ.ނައިފަރު
ޅ.ނައިފަރުގައި ޒުވާނަކަށް އަނިޔާކުރި ކަމަށްބުނާ މައްސަލައެއްގައި ފަސް ފުލުހަކަށް ފިޔަވަޅު އެޅުމަށް ނިންމައިފިއެވެ.
ފުލުހުން އަންގާރަދުވަހު ބުނީ ނަައިފަރުގައި ޒުވާނަކަށް ފުލުހުން އަނިޔާކުރިކަމަށް ތުހުމަތުކުރެވޭ މައްސަލާގައި ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑުގެ ދަށުން ބެލުމަށްފަހު ޑިސިޕްލިނަރީ ބޯޑަށް ހުށަހެޅުމުން، އެ މައްސަލާގައި ހިމެނޭ ތިން ފުލުހަކު ވަޒީފާއިން ވަކިކުރުމަށް، އަދި ދެ ފުލުހަކު މިހާރު ހުރި ރޭންކު ދަށްކުރުމަށް ނިންމާފައިވާ ކަމަށެވެ. އަދި މިފިޔަވަޅު އެޅުމަށް ނިންމާފައިވަނީ ޖޫން މަހުގެ 22ވަނަ ދުވަހު ކަމަށް ފުލުހުން ބުނެއެވެ.
މީގެ އިތުރުން މި މައްސަލައި ފިޔަވަޅު އަޅާފައިވާ ފުލުުންނަށް، އެ ފިޔަވަޅު އިސްތިއުނާފުކުރުމަށް، ބަންދު ދުވަސްތައް ނުލައި ހަތް ދުވަސް ލިބޭނެ ކަމަށް ފުލުހުން ބުނެއެވެ.
މައުލޫމާތު ލިބިފައިވާ ގޮތުގައި މެއި މަހުގެ 16ވަނަ ދުވަހުގެ ރޭ އެޒުވާނާއަށް އަނިޔާކޮށްފައިވަނީ ގޭގައި ހުއްޓައި ނައިފަރު ކުނިކޮށި ސަރަހައްދަށް ގެންގޮސްފައެވެ. އެމީހުން ތިބީ ޔުނިފޯމްގައި ކަމަށާއި، ބޫޓުން ތެޅުމުގެ ސަބަބުން އެޒުވާނާއަށް ވަރަށް ބޮޑަށް އަނިޔާވެފައިވެއެވެ. ފުލުހުން އެޒުވާނާއަށް އަނިޔާކުރީ ފުލުހުންގެ ތެރޭގައި ހިމެނޭ މީހެއްގެ އަތްންބަކާ މަގުމަތިން ފޮށުނު ކަމަށް ބުނުމަށްފަހު ކަމަށް ވެސް މައުލޫމާތު ލިބެއެވެ. އަދި މިމައްސަލައާ ގުޅިގެން އަނިޔާކުރި ފުލުހުންނަށް ފިޔަވަޅު އެޅުމަށް ގޮވާލައި ޒުވާނުންތަކެއް މުޒާހަރާކޮށްފައިވާއިރު، ފޮށުނު ކަމަށް ބުނާ ވާހަކަތައް މުޒާހަރާގައި ބައިވެރިވި ޒުވާނުން ދޮގުކޮށްފައިވެއެވެ.
