މަރާލި 13 އަހަރުގެ ކުއްޖާގެ ހަށިގަނޑު ޕޯސްޓްމޯޓަމް ހެދުމަށް މިހަފްތާ ތެރޭގައި ފޮނުވަނީ
27 ޖޫން 2021 | އާދީއްތަ 14:09މިހަފްތާ ތެރޭގައި ހަށިގަނޑު އިންޑިއާއަށް ފޮނުވާލުމުގެ މަސައްކަތް ދަނީ ކުރަމުން
ފުލުހުން ހުޅުމާލޭގައި ކުރިއަށް ގެންދިޔަ ޚާއްސަ އޮޕަރޭޝަނެއްގެ ތެރެއިން
ރަހީނުކޮށް، މަރާލި 13 އަހަރުގެ ކުއްޖާގެ ހަށިގަނޑު ޕޯސްޓްމޯޓަމް ހެދުމަށް މިހަފްތާ ތެރޭގައި ފޮނުވާލުމުގެ މަސައްކަތް ކުރަމުންދާ ކަމަށް ފުލުހުން ބުނެފިއެވެ.
ފުލުހުން ބުނީ ހަށިގަނޑު ޕޯސްޓްމޯޓަމް ހެދުމަށް މިހަފްތާ ތެރޭގައި އިންޑިއާއަށް ފޮނުވާލުމަށް މަސައްކަތް ކުރަމުންދާ ކަމަށެވެ. މީގެ އިތުރު އައިޖީއެމްއެޗަށް ގެންގޮސް، ހަށިގަނޑަށް ލިބިފައިވާ އަނިޔާތައް ދެނެގަތުމަށް އިތުރު ތަހުލީލުތައް ވަނީ ކުރިއަށް ގެންގޮސްފަވެއެވެ.
ފުލުހުން ބުނެފައިވަނީ 13 އަހަރުގެ ފިރިހެން ކުއްޖަކު ރަހީނުކޮށްގެން ގެންގުޅޭ މައްސަލައެއް ޖޫން މަހުގެ 20 ވަނަ ދުވަހު ރިޕޯޓް ކޮށްފައިވާތީ، އެ ކުއްޖާ ހޯދުމުގެ މަސައްކަތް ކުރަމުންދަނިކޮށް، ކުއްޖާ މަރާލާފައި އޮއްވައި ފެނުނީ ޖޫން މަހުގެ 21 ވަނަ ދުވަހުގެ ރޭ، ދަންވަރު 2:38ހާއިރު ކަމަށެވެ.
މި މައްސަލައާ ގުޅިގެން 17 އަހަރުގެ ދިވެހި ފިރިހެން ކުއްޖަކާއި، 27 އަހަރުގެ ދިވެހި ފިރިހެނަކު ހައްޔަރުކޮށްފައިވެއެވެ. 27 އަހަރުގެ މީހާ ޝަރީއަތް ނިމެންދެން ބަންދުކުރުމަށް ނިންމާފައިވާއިރު، 17 އަހަރުގެ ކުއްޖާގެ ބަންދަށް 15 ދުވަސް ވަނީ ޖަހާފައެވެ. ދެ މީހުންގެ މައްޗަށް ވެސް ގަސްދުގައި މީހަކު މެރުން، މާރާމާރީ ހިންގުން، ރަހީނުކުރުން، އަދި ކުޑަކުއްޖަކާ މެދު ޖިންސީ ގޯނާކުރުމުގެ ތުހުމަތު ވަނީ ކޮށްފައެވެ.
ފުލުުހުން ބުނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުން އަންނައިރު، ތަހުގީގަށް ބޮޑު ކުރިއެރުމެއް ލިބިފައިވާ ކަމަށެވެ.
