ރަައްޔިތުންގެ މަޖިލީހުގެ ތުޅާދޫ ދާއިރާގެ އެމްޑީޕީ މެންބަރު ހިސާން ހުސައިން އަކީ ދަންޖައްސަން ޖެހޭ މީހެއްކަމަށާއި ހިސާން މަރާލިއަސް ފާފަވެރި ނުވާނެކަމަށް މީދޫ ދާއިރާގެ މެންބަރު އަހުމަދު ސިޔާމް މުހައްމަދު ވިދާޅުވި މައްސަލައިގައި މެންބަރު ސިޔާމަށް ލިޔުމުން ނަސޭހަތް ދީފިއެވެ.
ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި ރިޔާސަތުގައި އިންނެވި މަޖިލީހުގެ ނާއިބު ރައީސް އީވާ އަބްދުﷲ ވިދާޅުވީ މި މައްސަލަ އިމްތިޔާޒާއި ސުލޫކު ކޮމިޓީން ބަލާފައިވާ ކަމަށާއި މެންބަރަށް ލިޔުމުން ނަސޭހަތް ދިނުމަށް ނިންމާފައިވާ ކަމަށެވެ.
އިވާ ވިދާޅުވީ މަޖިލީހުގެ ކަރާމާތާއި ގަދަރާއި އަބުރު ދެމެހެއްޓޭހެން އަމަލުތައް ބެހެއްޓުމަށްޓަކައި މިފަދަ ކަމެއް ތަކުރާރު ނުކުރެއްވުމަށް މެންބަރު ސިޔާމަށް ނަސޭހަތްތެރިވާ ކަމަށާއި އެ ލިޔުން މެންބަރަށް ފޮނުވާނެ ކަމަށެވެ.
މި ހާދިސާ ހިނގާފައިވަނީ ޖޫން މަހުގެ 6 ވަނަ ދުވަހު ކުރިޔަށްދިޔަ 241 ކޮމިޓީގެ ބައްދަލުވުމަށް ފަހުއެވެ. ސިޔާމް، ހިސާން އާ ދިމާލަށް އެހެން ވިދާޅުވާ އޯޑިއޯއެއް ހޯމަ ދުވަހުގެ ރޭގެ ވަގުތެއްގައި ވަނީ ލީކުކޮށްލާފައެވެ. ލީކުކޮށްލާފައިވާ އޯޑިއޯގައި ސިޔާމް ވިދާޅުވާކަމަށް އިވެނީ "ހަގީގަތުގައި ވެސް ހިސާން ދައްޖަންސަން ޖެހޭކަމަށް. އެކަން ކޮށްގެން ފާފަވެރި ވެސް ނުވާނެ." އެވެ.
ކޮމިޓީއަށް މި މައްސަލަ ފޮނުއްވުމާއެކު ކޮމިޓީގެ ބައްދަލުވުމުގައި މިކަމުގައި މަނަދޫ ދާއިރާގެ މެންބަރު އަހުމަދު ހާރޫން ހުށަހެޅުއްވީ ސިޔާމަށް މިފަދަ ކަމެއް އިތުރަށް ތަކުރާރުނުކުރުމަށް އެދި ނަސޭހަތްތެރިވުމަށާއި މާފަށް އެދިވަޑައިގަތުމަށް އެންގުމަށެވެ. މިހުށަހެޅުން ފާސްކޮށްފައިވަނީ ކޮމިޓީގެ އިއްތިފާގުންނެވެ.
މިހުށަހެޅުން ހުށަހެޅި އެކަމަށް ބަހުސް ކުރުމަށް ހުޅުވާލުމާއެކު 241 ކޮމިޓީގައި ވެސް އިންނަވާ އިމްތިޔާޒު ކޮމިޓީގެ މެމްބަރ މަޑުއްވަރީ ދާއިރާގެ މެމްބަރ އާދަމް ޝަރީފް ވިދާޅުވީ ސިޔާމް މިހާރު ވަނީ ހިސާންގެ ކިބައިން މާފަށް އެދިވަޑައިގެންފައިކަމަށެވެ. އަދި އެ ދެ ބޭފުޅުން މިހާރު ސަލާންގަލާންކޮށް މައްސަލަ ހައްލުކޮށްފައިވާ ކަމަށް ޝަރީފް ވިދާޅުވިއެވެ.
މައްސަލަ ހައްލުކޮށްފައިވާ ކަމަށް ޝަރީފް ވިދާޅުވުމުން އެ މައްސަލަ ބޭރުކޮށްލަން ނޮޅިވަރަމް ދާއިރާގެ މެންބަރު މުހައްމަދު ނަޝީދު އަބްދުﷲ ހުށަހެޅުއްވި އެވެ. ނަޝީދު ވިދާޅުވީ މައާފަށް އެދިފައިވާކަން ނުރަސްމީކޮށް އެނގިފައިވާތީ ރަސްމީކޮށް މިކަން ބަލާ މައްސަލަ ބޭރުކޮށްލުމަށް ހުށަހަޅުއްވާ ކަމަށެވެ.
