އަފްޣާނިސްތާނުގެ ޖަލެއްގައި ތިބި ދިވެހި އާއިލާއެއްގެ ހަތަރު ކުޑަކުދިން ދިވެހިރާއްޖެއަށް ގެނައުމަށް އަފްޣާނިސްތާނުގެ ސަރުކާރުން ދެކޮޅު ނުހަދާ ކަމަށާއި، އެކުދިން ރާއްޖެއަށް ނުގެނެވުނީ އެކުދިންގެ ބެލެނިވެރިން އެކަމަށް ދެކޮޅު ހެދުމުން ކަމަށް ހިއުމަން ރައިޓްސް ކޮމިޝަން (އެޗްއާރްސީއެމް) އިން ބުނެފި އެވެ.

އެޗްއާރްސީއެމުން ނެރުނު ބަޔާނެއްގައި ބުނީ ހ. މޫންލައިޓްވެލީ، އަލީ ޝާފިއު އާއި އޭނާގެ އަންހެނުން އަދި 4 ދަރިންނާބެހޭ ގޮތުން މީޑިއާގައި ދައުރުވަމުންދާ މައްސަލައަކީ 2019 ޑިސެންބަރު 12 ވަނަ ދުވަހު ޝާފިއުގެ އާއިލާގެ ފަރާތުން ހުށަހެޅި ތަހުގީގު ކުރަމުންދާ މައްސަލައެއް ކަމަށެވެ. މައްސަލައާ ގުޅިގެން އެކިފަހަރުމަތިން އެ އާއިލާއާ ބައްދަލުކޮށްފައިވާ ކަމަށް އެޗްއާރްސީއެމުން ބުނެއެވެ.

އެޗްއާރްސީއެމުން ބުނީ މިމައްސަލަ ސަމާލު ކަމަށް އައިހިސާބުން ޚާއްސަ އިސްކަމެއް ދިނުމުގެ އިތުރުން ކަމާގުޅޭ އެންމެހައި މުއައްސަސާތަކުގެ ސަމާލުކަމަށް މިމައްސަލަ ގެނެސް މައްސަލައާ ގުޅޭ މައުލޫމާތު ދިޔައީ ހޯދަމުން ކަމަށެވެ. މިމައްސަލައާ ގުޅިގެން ކޮމިޝަނުން ބެލިބެލުމުން މައްސަލާގައި ހިމެނޭ ޝާފިއުއާ އޭނާގެ އަންހެނުންނަކީ އެމީހުންގެ މައްޗަށް ތުހުމަތުކުރެވުނު މައްސަލައާ ގުޅިގެން އަފްޣާނިސްތާނުގެ ކަމާބެހޭ އިދާރާތަކުން އެ މައްސަލަ ތަހުގީގުކޮށް އެގައުމުގެ ސުޕްރީމްކޯޓުން ދިގު މުއްދަތަކަށް ޖަލަށް ހުކުމް ކޮށްފައިވާ ދެމަފިރިންކަން ފާހަގަކުރެވިފައިވާ ކަމަށެވެ. އަދި މި ދެމަފިރިންނާއެކު 4 ކުޑަކުދިން ވެސް ޖަލުގައި ތިބިކަން ފާހަގަކުރެވުނު ކަމަށް އެޗްއާރްސީއެމުން ބުނެއެވެ.

އެޗްއާރްސީއެމުން ބުނީ މިހާދިސާ ހިނގިތާ ކުރީކޮޅު މައްސަލާގައި ހިމެނޭ 4 ކުޑަކުދިން ރާއްޖެ ގެނައުމަށް އަފްޣާނިސްތާނުގެ ސަރުކާރުން ވެސް ދެކޮޅު ނޫންކަމާއި ކުދިން ރާއްޖެ ގެނެވޭގޮތަށް އޮތް ކަމަށެވެ. ނަމަވެސް ކުދިންގެ ބެލެނިވެރިން އެކަމަށް ދެކޮޅު ހެދުމުގެ ސަބަބުން އޭރު ކުދިން ގެނައުމުގެ މަސައްކަތް ހުއްޓުނުކަން ކަމާބެހޭ ފަރާތްތަކުން ހިއްސާކުރި މައުލޫމާތުން ފާހަގަކުރެވުނު ކަމަށް އެކޮމިޝަނުން ބުނެއެވެ.

މި 4 ކުދިންނަކީ އެއްވެސް ކުށެއްނެތި ޖަލުގައި ތިބޭ ކުދިންތަކެއް ކަމުން ކުދިން ގެނައުމާ ގުޅޭގޮތުން ޝާފިއުގެ އާއިލާއާ އިސްވެ މަޝްވަރާކޮށްފައިވާކަން ފާހަގަކޮށް އެޗްއާރްސީއެމުން ބުނީ އެކުދިންގެ ބެލެނިވެރިން ކުދިން ގެނައުމަށް ފަހުން އެއްބަސްވާ ކަމަށް އާއިލާއިން މައުލޫމާތު ހިއްސާކުރުމުން އެކަން ކަމާބެހޭ އިދާރާތަކާ ހިއްސާކޮށްފައިވާ ކަމަށެވެ. އަދި ކުދިން ގެނައުމުގެ މަސައްކަތް ކުރިއަށްދާގޮތް އެޗްއާރްސީއެމުން ގާތުން ބަލަމުންދާ ކަމަށް ކޮމިޝަނުން ބުނެއެވެ. އަދި ކޮވިޑް-19 ގެ ހާލަތާ އަދި އެހެނިހެން މައްސަލަތަކާ ހެދި ކުދިން ރާއްޖެ ގެނައުމުގައި ގޮންޖެހުންތައް ހުރިކަމަށް ކަމާބެހޭ މުއައްސަސާތަކުން ހިއްސާކުރި މައުލޫމާތުން ހާމަވެފައިވާ ކަމަށެވެ.

މިމައްސަލައާ ގުޅިގެން ލިބެމުންދާ ކުރިއެރުންތަކާ ގުޅޭ މައުލޫމާތާއި، މައްސަލައާއި ގުޅިގެން އާއިލާއިން ފާޅުކުރަމުންދާ ކަންބޮޑުވުންތަކާ އަދި ޖަލުގައި ތިބި 4 ކުދިން ގެނައުމާ ގުޅޭގޮތުން، ކަމާގުޅުންހުރި މުއައްސަސާތަކާއެކު އެކިފަހަރުމަތިން އެޗްއާރްސީއެމުން ވަނީ ބައްދަލުވުންތަކެއް ބާއްވާފައެވެ. އަދި މިމައްސަލަ ކުރިއަށްދާ ގޮތުގެ އެންމެފަހުގެ މައުލޫމާތު އާއިލާއާ ހިއްސާކުރަމުންދާކަން ކޮމިޝަނުން ބުނެއެވެ.

މީގެ އިތުރުން އެޗްއާރްސީއެމުން ބުނީ މިމައްސަލައާ ގުޅިގެން އަފްޣާނިސްތާނުގެ ހިއުމަން ރައިޓްސް ކޮމިޝަނާ ލިޔުމުން މުއާމަލާތްކޮށް އެ އާއިލާއަށް ޒިޔާރާތް ކުރުމަށް އެދިފައިވާ ކަމަށެވެ. ކޮމިޝަންގެ އެދުމުގެ މަތިން އަފްޣާނިސްތާނުގެ ހިއުމަން ރައިޓްސް ކޮމިޝަނުން އެ އާއިލާއަށް ޒިޔާރާތްކޮށް ހާލަތު ބެލުމަށްފަހު ފާހަގަވިކަންކަން ހިއްސާކޮށްފައިވާ ކަމަށް އެޗްއާރްސީއެމުން ބުނެއެވެ.

އެޗްއާރްސީއެމުން ބުނީ މި މައްސަލައިގައި ހިމެނޭ 4 ކުދިން ރައްކާތެރި މައުހާލަކަށް ގެންދިއުމަށް އެދިފައިވާތީ އެމުއައްސަސާއިން މަސައްކަތް ކޮށްފައިވާ ކަމަށެވެ. ނަމަވެސް ކުދިން ބަހައްޓާ މަރުކަޒުތަކުން މިކުދިން އެ މަރުކަޒުތަކަށް ނެގުމުގައި ގޮންޖެހުންތައް ހުރިކަން ފާހަގަކޮށްފައިވާ ކަމަށެވެ. އެހެންކަމުން، މިކަން އަދި ހަމަޖެހިފައިނުވާ ކަމަށް އެޗްއާރްސީއެމުން ބުނެއެވެ.