ދިވެހި ފަނޑިޔާރުންގެ ޖަމްޢިއްޔާއިން އިންތިޒާމުކޮށް، ކުރިއަށްދާ "ފަނޑިޔާރުންގެ އަހަރީ ބައްދަލުވުން 2021" ފަށައިފިއެވެ.

މި ބައްދަލުވުން ފަށާފައި ވަނީ ހޮނިހިރު ދުވަހު ހެނދުނުގެ 9:00 ޖެހި އިރުއެވެ. މި ބައްދަލުވުމުގެ ޝަރަފުވެރި މެހެމާނަކީ ދިވެހިރާއްޖާގެ އުއްތަމަ ފަނޑިޔާރު އަލްއުސްތާޛު އަޙްމަދު މުޢުތަޞިމް ޢަދުނާނެވެ.

ބައްދަލުވުން ފެށުމަށް ބޭއްވި ރަސްމިއްޔާތުގައި އުއްތަމަ ފަނޑިޔާރު ވަނީ ކޮވިޑްގެ ޙާލަތާއި ގުޅިގެން މިހާރުގެ މަސައްކަތުގެ ނިޒާމް އިލެކްޓްރޯނިކް ނިޒާމަކަށް ބަދަލުވެފައިވާކަމާއި، އަދި ދުރުން ނުވަތަ ރިމޯޓްކޮށް ޝަރީޢަތްކުރުން ބަދަލުވެފައިވާކަން ފާހަގަކުރައްވާފައެވެ. މިގޮތަށް ޝަރީޢަތް ހިންގުމުގައި ވަރަށް ބޮޑެތި ގޮންޖެހުންތަކެއް ހުރިކަމާއި، ކުރިއަށް މިދާ ބައްދަލުވުމުގައި މެޖިސްޓްރޭޓުން މަސައްކަތްކުރުމުގައި، އަދި މެޖިސްޓްރޭޓް ކޯޓުތަކަށް ދިމާވެފައިވާ ގޮންޖެހުންތަކާއި ދަތިތައް ފާހަގަކުރައްވައި އެކަންކަން ރަނގަޅުކުރާނެ ގޮތުގެ ރިކޮމެންޑޭޝަން ހުށަހެޅުމުން، އެކަންކަން ޙައްލުކުރުމުގެ މަސައްކަތް ކުރިއަށް ގެންދަވާނެކަމަށް ވިދާޅުވިއެވެ.

މި ބައްދަލުވުމުގައި މެޖިސްޓްރޭޓުންނަށާއި މެޖިސްޓްރޭޓް ކޯޓުތަކަށް ކުރިމަތިވެފައިވާ ގޮންޖެހުންތައް ފާހަގަކޮށް، ހުރިހާ މެޖިސްޓްރޭޓު ކޯޓުތައް ތަމްސީލުވާގޮތަށް ކަރުދާސްތަކެއް ހުށަހަޅަމުންދާ ކަމަށް ފަނޑިޔާރުންގެ ޖަމިއްޔާއިން މައުލޫމާތު ދިނެވެ. އޮންލައިންކޮށް ކުރިއަށްގެންދާ މި މި ބައްދަލުވުމުގައި ރާއްޖޭގެ އެކި ކަންކޮޅުތަކުގައި ފަނޑިޔާރުން ބައިވެރިވެވަޑައިގެންނެވި އެވެ.