ކޮވިޑަށް އިތުރު 370 މީހުން ޕޮޒިޓިވްވެއްޖެއެވެ.

ހޯމަ ދުވަހުގެ އިރުއޮއްސި 6:00ން އަންގާރަ ދުވަހުގެ އިރުއޮއްސި 6:00 އާއި ހަމައަށް ނެގުނު 4263 ސާމްޕަލްގެ ތެރެއިން ޕޮޒިޓިވްވެފައިވަނީ 370 މީހުންނެވެ.

ޕޮޒިޓިވްވި މީހުންގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 217 މީހުންނާއި، ރަށްރަށުން ޕޮޒިޓިވްވި 148 މީހުންގެ އިތުރުން ރިސޯޓްތަކުން ޕޮޒިޓިވްވި 4 މީހުންނެވެ. މީގެ އިތުރުން ތަރައްގީކުރަމުން އަންނަ ރަށަކުން އެކަކު ވަނީ ޕޮޒިޓިވްވެފައެވެ.

އަންގާރަ ދުވަހުގެ އަދަދާއެކު މިހާތަނަށް 68،872 މީހަކު ވަނީ ޕޮޒިޓިވްވެފައެވެ. އަދި 51،213 މީހަކު ވަނީ ބަލިން ފަސޭހަވެފައެވެ.

އެކްޓިވް ކޭސްގެ ގޮތުގައި ހިމެނެނީ 17،461 މީހުންނެވެ. އަދި މީގެ ތެރެއިން 152 މީހަކަށް ދަނީ އެޑްމިޓް ކޮށްގެން ފަރުވާ ދެމުންނެވެ.

ހޯމަ ދުވަހުގެ އިރު އޮއްސި 6:00ން އަންގާރަ ދުވަހުގެ އިރުއޮއްސި 6:00އާ ދެމެދު 2 މީހަކު ވަނީ ބަލީގައި ނިޔާވެފައެވެ. މިއާއެކު ރާއްޖޭގައި ނިޔާވި މީހުންގެ އަދަދު ވަނީ 189ށް އަރާފައެވެ.

އެޗްޕީއޭއިން އާންމުކޮށްފައިވާ މައުލޫމާތުތަކަށް ބަލާ އިރު، ނިޔާވި މީހުންގެ ތެރެއިން 93 އިންސައްތަ މީހުންނަކީ ދެވަނަ ޑޯޒް ފުރިހަމަކޮށްފައި ނުވާ މީހުންނެވެ.

މިހާތަނަށް 71 ރަށެއް މޮނިޓަރިންގެ ހާލަތަށް ވަނީ ގެނެސްފައެވެ.