އަނެއްކާވެސް އިތުރު 2 މަރު
ނިޔާވެފައި ވަނީ އުމުރުން 62 އަހަރުގެ ދިވެހި ފިރިހެނަކާއި 89 އަހަރުގެ ދިވެހި އަންހެނެއްގެ
ހުޅުމާލެ މެޑިކަލް ފެސިލިޓީ
ކޮވިޑް ބަލީގައި، އަންގާރަދުވަހު އިތުރު 2 މީހަކު ނިޔާވެއްޖެ ކަމަށް ހެލްތް ޕްރޮޓެކްޝަން އޭޖެންސީ (އެޗްޕީއޭ)އިން ހާމަކޮށްފިއެވެ.
އެ އޭޖެންސީން މައުލޫމާތު ދޭ ގޮތުގައި، އަންގާރަ ދުވަހު 01:51 ހާއިރު ނިޔާވެފައި ވަނީ، އައިޖީއެމްއެޗްގައި ފަރުވާދެމުން ދިޔަ އުމުރުން 89 އަހަރުގެ ދިވެހި އަންހެނެއް ކަމަށެވެ.
އޭގެ އިތުރުން އެރޭގެ 02:43ގައި އުމުރުން 62 އަހަރުގެ ދިވެހި ފިރިހެނެއްވެސް ވަނީ ނިޔާވެފައި ކަމަށާއި، އޭނާއަކީ ހުޅުމާލެ މެޑިކަލް ފެސިލިޓީގައި ފަރުވާ ހޯދަމުން ދިޔަ މީހެއް ކަމަށެވެ. މި ދެ މަރާއެކު މިހާތަނަށް މި ބަލީގައި ނިޔާވި މީހުންގެ އަދަދު މިވަނީ 167 އަށް އަރާފައެވެ.
އަންގާރަ ދުވަހު މެންދުރު ކުރިިންވެސް ރާއްޖެއިން ކޮވިޑްގައި ހަތަރު މީހަކު ނިޔާވެގެން ރިޕޯޓު ކޮށްފައިވެއެވެ
ރާއްޖޭގައި ކޮވިޑް-19 ހަލުވިކަމާއެކު ފެތުރެމުން އަންނައިރު ކޮވިޑްގައި ނިޔާވާ މީހުންގެ އަދަދު ވެސް ދަނީ އިތުރުވަމުންނެވެ. ހޯމަ ދުވަހު ވެސް މި ބަލީގައި ތިން މީހަކު ވަނީ ނިޔާވެފައެވެ. ފަރުވާދޭނެ ސިއްހީ ޚިދުމަތްތެރިން ވެސް މަދުވެ އެނދުތައް ވެސް ދަނީ ފުލްވަމުންނެވެ. އޭގެ ސަބަބުން ރާއްޖެ މި ބަލީގެ ބޮޑު އަނދަވަޅަކަށް ވެއްޓިދާނެކަމުގެ ބިރު މިހާރު ވަނީ ހީވެފައެވެ. އެކަމަށްޓަކައި ފިޔަވަޅުތަކެއް ވެސް އަޅާފައިވާއިރު، ކާފިއު ވެސް ވަނީ އިއުލާންކޮށްފައެވެ.
