ރާއްޖޭގެ އެކި ރަށްރަށުގައި ގެސްޓްހައުސް ހިންގާ ފަރާތްތަކަށް ދިމާވާ ގޮންޖެހުންތައް ދެނެގަނެ، އެކަންތައްތަކަށް ހައްލުހޯދުމުގެ މަސައްކަތް ގެސްޓްހައުސް އެސޯސިއޭޝަން އޮފް މޯލްޑިވްސް (ގޭމް) އިން ފަށައިފިއެވެ.
ގޭމް އިން އިސްނަގައިގެން، އެރަށްރަށުގެ ކައުންސިލްތަކާ އެކު ދަނީ މަޝްވަރާ ބައްދަލުވުންތައް ބާއްވަމުންނެވެ. އެގޮތުން މިހާތަނަށް މަޝްވަރާ ބައްދަލުވުންތައް ބާއްވާފައިވާ ކައުންސިލްތަކުގެ ތެރޭގައި، ފުވައްމުލަކު ސިޓީ ކައުންސިލް، އައްޑޫ ސިޓީ ކައުންސިލް، އަދި ނ. އަތޮޅު ކައުންސިލް ހިމެނެއެވެ.
ގޭމް އިން ބުނީ މި ބައްދަލުވުންތަކުގެ ބޭނުމަކީ ރަށްރަށުގައި ގެސްޓްހައުސް ހިންގާ ފަރާތްތަކުގެ ކަންބޮޑުވުންތައް ހޯދައި، އެކަންކަން ހައްލުކުރުމަށް ރަށު ކައުންސިލްތަކާއި އަދި ސިޓީ ކައުންސިލްތަކާއެކު ދަނީ މަސައްކަތްކުރަމުން ކަމަށެވެ. އެ އެސޯސިއޭޝަންގެ އަމާޒަކީ، ސަރުކާރާއި އަދި ކައުންސިލްތަކުގެ އެއްބާރުލުމާއެކު، މިވިޔަފާރި ކުރިއެރުވުމަށް ހުރި ގޮންޖެހުންތައް ހައްލުކޮށް، ގެސްޓްހައުސްތައް މާކެޓްކޮށް، އަދި މިވިޔަފާރި އިތުރަށް ފުޅާކުރުން ކަމަށެވެ. އަދި މިކަންތައް ހާސިލްކުރުމަށްޓަކައި ފަތުރުވެރިކަމުގެ ސިނާއަތުގެ އިތުރު ޖަމިއްޔާތަކާއެކު މަސައްކަތްކުރަން ތައްޔާރުކަމަށްވެސް އެ އެސޯސިއޭޝަނުން ބުނެއެވެ.
ރާއްޖޭގެ ގެސްޓްހައުސް ވިޔަފާރިތަކަށް ދިމާވާ އެންމެ ބޮޑު ގޮންޖެހުމަކީ ރަށްރަށުގައި ޓޫރިސްޓު ބީޗެއް ނެތުން ކަމަށް ގޭމް އިން ފާހަގަކުރެއެވެ. އަދި ރަށް ކައިރީގައި ޕިކްނިކް އައިލެންޑެއް ނެތުމާއި ދަތުރުފަތުގެ ދަތިކަންވެސް ގޭމް އިން ފާހަގަކުރެއެވެ.
ރާއްޖެއަށް ކޮވިޑް-19ގެ އަސަރުކުރުމާއި އެކު އެންމެ ބޮޑު ގެއްލުމެއް ވެގެންދިޔައީ ގެސްޓްހައުސް ވިޔަފާރިއަށެވެ. ފަތުރުވެރިން ރަށްރަށަށް ދިއުން މަނާކުރުމާއެކު އެތައް ގެސްޓްހައުސެއް ބަންދުކުރަން ޖެހުނެވެ.
ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލިނަމަވެސް ގެސްޓްހައުސް ވިޔަފާރި ކުރިއަށް ގެންދިއުމުގެ ފުރުސަތު ލިބުނީ އެތައް މަހެއް ފާއިތުވެ ދިޔަފަހުންނެވެ.
